مەملەكەتتىك ورتالىق مۋزەيدە شىعارماشىل حانىمداردىڭ قولتاڭباسىن كورسەتەتىن «قاراعىم-اي» كوركەمونەر كورمەسى ەسىك اشتى. بەلگىلى سۋرەتشى, پەداگوگ ينديرا ەليف بادامباەۆا جەتەكشىلىك ەتەتىن ART-ستۋديادا ونەر توعىستىرعان تالانتتى قىلقالام شەبەرلەرىنىڭ ايتارى بار.
كورمە ايەل بەينەسىنە جانە ونىڭ اينالاسىندا قالىپتاساتىن ەرەكشە رۋحاني الەمگە ارنالعان. بۇل — نازىكتىك پەن تاباندىلىق, ءداستۇر مەن زاماناۋي كوزقاراس, دانالىق پەن تەرەڭ پايىم ۇيلەسىم تاپقان كەڭىستىك. ەكسپوزيتسيادا ۇسىنىلعان جۇمىستار ەموتسيونالدىق اسەرىمەن, باتىل كوركەمدىك شەشىمدەرىمەن, كوز تارتارلىق تۇستىك پاليتراسىمەن ەرەكشەلەنەدى.
مەملەكەتتىك ورتالىق مۋزەيدىڭ سىرتقى بايلانىستار ءبولىمىنىڭ جەتەكشىسى اننا كۋششەنكو سۋرەتشىلەردىڭ قولتاڭباسى سان ءتۇرلى بولعانىمەن, ولاردىڭ جان دۇنيەسىن توعىستىراتىن قۇندىلىق – ونەرگە ءھام ومىرگە دەگەن سۇيىسپەنشىلىك ەكەنىن اتادى. ول كورمەدەگى ءاربىر تۋىندى ادام بويىنا ءۇمىت ۇيالاتىپ, سەنىم مەن شابىت بەرەتىنىن ايتادى.
كورمەدە ۇسىنىلعان شىعارمالاردا قازىرگى ءومىردىڭ شىندىعىن كورسەتەتىن الەۋمەتتىك تاقىرىپتاعى تۇجىرىمدامالىق جۇمىستاردان باسقا, فيلوسوفيالىق ويلار, دەرەكسىز كەسكىندەمە دە كەزدەسەدى. گرافيكا, اكۆارەل مانەرىمەن ۇسىنىلعان كەيبىر تۋىندى وي تەرەڭدىگىمەن, ۇيلەسىمدى كولوريستيكالىق كومبيناتسياسىمەن ەرەكشەلەنەدى.
ونەر جارمەڭكەسىندە ءسوز العان جوبا كۋراتورى — قازاقستان سۋرەتشىلەر وداعىنىڭ مۇشەسى ينديرا ەليف بادامباەۆا قاتىسۋشىلاردى العاشقى كورمەلەرىمەن قۇتتىقتاپ, شىعارماشىلىق تابىس تىلەدى. «بۇل كورمە — ءبىزدىڭ ورتاق جولىمىزدىڭ ناتيجەسى. ءبىزدىڭ سۋرەتشىلەر شىن مانىندە قايسار, شىنايى ءارى ەرەكشە جاندار. بۇگىن مۇندا قولتاڭبامىزدى عانا ۇسىنعان جوقپىز, الەمگە ءوز ءۇنىمىزدى جەتكىزدىك. شاكىرتتەرىمنىڭ تىرناقالدى تالپىنىسىن ونەر جاناشىرلارى جوعارى باعالاعانى كوڭىلگە قۋانىش ۇيالاتادى», دەيدى ول.
ستۋديا قاتىسۋشىلارى ونەر الەمىنە جول اشقان شىعارماشىلىق ۇجىم مەن ۇستازدارىنا العىس ءبىلدىرىپ, جۇرەكجاردى لەبىزىن جەتكىزدى. ولاردىڭ كەيبىرى ءۇشىن بۇل كورمە العاشقى قادام عانا ەمەس, جەكە جەڭىس پەن شىعارماشىلىق جولداعى ماڭىزدى بەلەسكە اينالعان.
كورمەدە ايجان ابديروۆا, نۇرگۇل ابىشەۆا, ءمادينا اقمولداەۆا, دينا ءالىحانوۆا, ايگەرىم باقاەۆا, راۋشان يمانباەۆا, نۇراي يسەنعۇلوۆا, ءىنجۋ قاسىموۆا, مارينا كيم, گاۋحار مۇرزابەكوۆا, ەلەونورا ورازوۆا, اسەل ساگىمباەۆا, دينارا ساكەنوۆا, كاتەرينا سيدرا, تاڭسۇلۋ سىمتىكوۆا, پولينا ترەگۋبوۆا, جىبەك تولەگەنوۆا, عايني تورەباەۆا, ءالينۇر ۋاليەۆا, ايدا ۇسەنباەۆالاردىڭ جانە ستۋديا جەتەكشىسى ينديرا ەليف بادامباەۆانىڭ 70-تەن اسا جۇمىسى ۇسىنىلعان.
الماتى