اتىراۋدا تۇنگى مەزگىلدە بىرنەشە بۇزاقى ەر ادامدى اياۋسىز سوققىعا جىققان. زارداپ شەككەن جىگىت اۋرۋحاناعا جەتكىزىلدى, دەپ حابارلايدى Egemen.kz.
وبلىستىق پوليتسيا دەپارتامەنتىنىڭ ءباسپاسوز قىزمەتى اتالعان وقيعاعا قاتىسى بار قۇقىق بۇزۋشىلاردىڭ ۇستالعانىن حابارلادى. «قۇقىق بۇزۋشىلارعا قاتىستى قىلمىستىق ءىس قوزعالدى. تەرگەۋ امالدارى جۇرگىزىلىپ جاتىر», دەپ مالىمدەدى دەپارتامەنتتىڭ ءباسپاسوز قىزمەتى.
ال وبلىستىق دەنساۋلىق ساقتاۋ باسقارماسى ءباسپاسوز دەرەگىنە قاراعاندا, 5 ساۋىردە تۇنگى ساعات 02:58-دە جەدەل جاردەم قىزمەتىنە شاقىرتۋ تۇسكەن.
«اتىراۋ قالاسىنىڭ س.ساۋىرعاليەۆ كوشەسىندەگى تۇرعىن ءۇيدىڭ الدىندا بولعان وقيعا ورنىنا جەدەل جاردەم قىزمەتىنىڭ بريگاداسى جىبەرىلدى. جەدەل جاردەم بريگاداسىنىڭ قىزمەتكەرلەرى 1984 جىلعى ەر ادامعا العاشقى مەديتسينالىق كومەك كورسەتتى. ول دەنە جاراقاتتارىمەن وبلىستىق اۋرۋحاناعا جەتكىزىلدى. قازىرگى كەزدە ناۋقاستىڭ جالپى جاعدايى – ورتاشا تۇراقتى», دەپ حابارلادى باسقارمانىڭ ءباسپاسوز قىزمەتى.