تۇپ-تۋرا 154 جىل بۇرىن اقمولا ۋەزى, قاراوتكەل اۋىلىندا ۇلتىمىزدىڭ ۇلىق بالۋانى قاجىمۇقان مۇڭايتپاس ۇلى دۇنيەگە كەلدى, دەپ حابارلايدى Egemen.kz.
ول ەل تاريحىنداعى كاسىبي سپورتپەن شۇعىلدانعان تۇڭعىش سپورتشى.
1901 ج.ومبىدا بالۋانداردىڭ جارىسى ءوتىپ, قاجىمۇقان بەلگىلى اتلەت ي. زلوبينمەن كەزدەسەدى. ول مۇنىڭ بالۋاندىق كۇشىن بايقاپ, بەلگىلى بالۋان ي.ۆ. لەبەدەۆكە جولىعۋىن ۇسىنادى. وسىلايشا قاجىمۇقان 1904-1907 جج. ي.ي. لەبەدەۆ مەكتەبىندە كلاسسيكالىق كۇرەس پەن تسيرك ونەرىن ۇيرەنەدى.
وسىلايشا ول كۇرەستىڭ بىرنەشە ءتۇرىن مەڭگەرىپ, 48 مەدال ەنشىلەدى.
1895 جىلى كيەۆتە وتكەن بالۋاندار كۇرەسىندە ق. مۇڭايتپاسوۆ دۇنيەجۇزىنىڭ چەمپيونى اتاعىن ءبىرىنشى رەت جەڭىپ الدى. 1905 جىلى قىتايدىڭ حاربين قالاسىندا جاپون چەمپيونى ساراكيكيدى, 1906 جىلى گەرمانيانىڭ بەرلين قالاسىندا نەمىس بالۋانى فون كەنيگتى, 1910 جىلى دۇنيەجۇزىنىڭ چەمپيونى گانس-كاۆاندى, 1913-1916 جىلدارى پاريجدە دۇنيەجۇزى چەمپيونى ستۋرمەنتتىڭ جاۋىرىن جەرگە تيگىزدى.
الەمدىك دودالارعا ءوز اتىمەن قاتىسۋىن ورىس بيلىگى جاقتىرا قويعان جوق. سول سەبەپتى بالۋانعا ەل الدىنا بىرنەشە لاقاپ اتتارمەن شىعۋعا تۋرا كەلدى.
1909 جىلعى حالىقارالىق بالۋاندار جارىسىنا ول «قارا مۇستافا» دەگەن اتپەن شىققان.
1910 جىلى ەۋروپا جانە رەسەي بالۋانداردىڭ ۇلكەن توبى امەريكاعا اتتاندى. ولاردىڭ ىشىندە قاجىمۇقان دا بولدى. وڭتۇستىك امەريكا قالالارىنا جاسالعان تۋرنەدە قاجىمۇقاننىڭ ەڭ ءساتتى ونەر كورسەتكەن جەرى – ارگەنتينا استاناسى بۋەنوس-ايرەس قالاسى. سول جەردە ول التىن مەدالمەن ماراپاتتالدى.
1911 جىلى ق.مۇڭايتپاسوۆ ىستامبۇلعا باردى. وندا دا بالۋان جوعارعى دەڭگەيدە ونەر كورسەتتى.
1913 جىلى قاجىمۇقان يۆان پوددۋبنىي, يۆان زايكين, نيكولاي ۆاحتۋروۆ جانە الەكس ابەرگ سياقتى اتاقتى بالۋاندارمەن بىرگە بىرنەشە ءىرى حالىقارالىق جارىستارعا قاتىستى, كەيبىرەۋلەرىندە العاشقى ۇشتىك جەڭىمپازدار قاتارىنان كورىندى.
1914 جىلى قاجىمۇقان نيجني نوۆگورود قالاسىنداعى جارىستا نەگىزگى قارسىلاسى ۆەستەرگارد ءشميدتتى جەڭدى.
ق. مۇڭايتپاسوۆ ازامات سوعىسىنان كەيىن كۇرەستى دامىتۋدى قولعا الدى, قازاقستان اۋماعىندا ءتۇرلى چەمپيوناتتار ۇيىمداستىردى.
1937 جىلى ق.مۇڭايتپاسوۆتىڭ ىزىنە سول ۋاقىتتا «كگب» دەپ اتالاتىن مەملەكەتتىك قاۋىپسىزدىك كوميتەتى قىزمەتكەرلەرى ءتۇسىپ قۋدالاۋعا ۇشىراتتى. سول سەبەپتى وتباسىن تاستاپ, تۇركىستان مەن وزبەكستاندا باس ساۋعالادى.
قاجىمۇقان مۇڭايتپاس ۇلى ۇلى وتان سوعىسى باستالعان تۇستا ەكى جىلعا جۋىق تسيرك ونەرىن كورسەتىپ, 100 مىڭ سومداي اقشا تاۋىپ, مايدانعا جىبەردى. بۇل ەلىنە جانىمەن دە, تانىمەن دە بەرىلگەن ناعىز ءوتانپارۋار ازاماتتىڭ ەرلىگى ەدى.
ءسويتىپ قارا كۇشتىڭ يەسى 1948 جىلى تۇركىستان وبلىسى, بوگەن اۋدانى, لەنين تۋى كولحوزىندا قايتىس بولدى.
تەمىرلان اۋىلىندا ەسكەرتكىش ورناتىلىپ, 1980 ج. وڭتۇستىك قازاقستان وبلىسى, ارىس اۋدانى, تەمىرلان اۋىلىندا مەموريالدىق مۋزەيى اشىلعان. ال 1986 ج. باستاپ قازىرگى كۇنگە دەيىن ق. مۇڭايتپاس ۇلى اتىندا كلاسسيكالىق كۇرەستەن حالىقارالىق تۋرنيرلەر ءوتىپ كەلەدى.