تۇركسوي حالىقارالىق تۇركى مادەنيەتى ۇيىمى وسى جىلدى نۇرعيسا تىلەنديەۆتى ەسكە الۋ جىلى دەپ جاريالادى. بۇل تۋرالى ۇيىمنىڭ باس حاتشىسى سۇلتان راەۆ مالىمدەدى, دەپ جازادى Egemen.kz.
نۇرعيسا تىلەنديەۆتىڭ 100 جىلدىعىنا وراي قازاقستان مەن تۇركى ەلدەرىندە كونتسەرتتەر, عىلىمي كونفەرەنتسيالار جانە باسقا دا مادەني شارالار وتەدى. مەرەيتوي يۋنەسكو دەڭگەيىندە دە اتاپ وتىلەدى.
ەسكە سالايىق, 2025 جىلدىڭ 1 ساۋىرىندە قازاقتىڭ ءبىرتۋار كومپوزيتورى, كۇيشى, ديريجەر, حالىق ءارتىسى نۇرعيسا تىلەنديەۆتىڭ تۋعانىنا 100 جىل تولىپ وتىر.
ول الماتى وبلىسى ىلە اۋدانىندا دۇنيەگە كەلگەن. كۇي-اندەرىنەن بولەك نۇرعيسا تىلەنديەۆ 50-دەن استام درامالىق قويىلىمعا, 19 كوركەم فيلمگە, 17 مۋلتيپليكاتسيالىق فيلمگە, 14 دەرەكتى-حرونيكالىق فيلمگە مۋزىكا جازعان.
نۇرعيسا اتاباي ۇلى ءارتۇرلى جىلدارى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديريجەرى, قازاقتىڭ حالىق اسپاپتار وركەسترىنىڭ باس ديريجەرى, قازاقفيلم كينوستۋدياسى مۋزىكا رەداكتسياسىنىڭ باس رەداكتورى, 1981 جىلدان وتىرار سازى فولكلورلىق-ەتنوگرافيالىق ءانسامبلىنىڭ ۇيىمداستىرۋشىسى ءارى كوركەمدىك جەتەكشىسى قىزمەتتەرىن اتقارعان.