وڭىردە تاسقىن سۋ قاۋىپ ءتوندىرىپ تۇرعان ەلدى مەكەندەردەن مال باسىن الدىن الا ەۆاكۋاتسيالاۋ ءجۇرىپ جاتىر. اپات ايتىپ كەلمەيدى, بىلتىر كوكتەمدە توتەننەن كەلگەن تەلەگەي سۋ تالاي مالدى جالماپ كەتكەنى بەلگىلى. وتكەن كۇننىڭ اششى ساباعى بيىل توتەنشە جاعداي قىزمەتى مەن جەرگىلىكتى اتقارۋشى بيلىك وكىلدەرىن ەرتەرەك قامدانۋعا ماجبۇرلەپ وتىر.
ءتيىستى ورىندار قىزىل سۋ قىسپاققا العان جاعدايدا اۋىلشارۋاشىلىق شىعىندارىنىڭ الدىن الاتىن, ءتورت ت ۇلىكتىڭ قاۋىپسىزدىگىن قامتاماسىز ەتەتىن ارنايى ەۆاكۋاتسيا ورىندارىنىڭ كارتاسىن ازىرلەپ قويدى. اتالعان كارتادا قاۋىپسىز تۇراقتاردىڭ ورنى قاي جەردە, وعان نەشە مال سىيادى, مالدى قالاي ايداپ اپارۋ كەرەك, سۋ قۇرساۋىندا قالعان ءتورت تۇلىككە جەمشوپ قايتىپ جەتكىزىلەدى دەگەن ماسەلەلەرگە دەيىن ناقتىلانعان.
اقپاراتتىق شتابتىڭ مالىمەتىنشە, بۇگىنگە دەيىن بىلتىر الاپات تاسقىن بولعان ايماقتارداعى مالدىڭ دەنى ەۆاكۋاتسيالانعان. ماسەلەن, ارقالىق قالاسىنا قاراستى ەكىدىڭ, قايىڭدى, ابدىعاپار حان, جالعىزتال ەلدى مەكەندەرىندەگى 14 شارۋا قوجالىعىنىڭ مالى قاۋىپسىز جەرلەرگە كوشىرىلگەن. امانگەلدى اۋدانىندا 77 قوجالىققا قاراستى 43 قىستاق پەن ۇرپەك, قابىرعا, قۇمكەشۋ اۋىلدارىنداعى مال تۇگەلدەي قاۋىپسىز ايماققا شىعارىلدى. قالعان 34 قوجالىقتىڭ مالى جاقىن كۇندەرى كوشىرىلمەك.
جەرگىلىكتى اتقارۋشى ورگاندار مەن تجد وكىلدەرى مال يەلەرىنە قاۋىپتى جاعدايدىڭ ءجونىن ءتۇسىندىرىپ, مال تۇراعىنا ارنالعان ۋاقىتشا ورىنداردى دايىنداۋ, جەمشوپ قورىمەن قامتاماسىز ەتۋ سياقتى كەشەندى دايىندىق جۇمىستارىن ويداعىداي اتقارىپ شىقتى.
سونىمەن قاتار شالعايدا جاتقان جانگەلدين اۋدانىندا دا سۋ تاسقىنى قاۋپى بار ايماقتار ءجىتى زەرتتەلدى. ناتيجەسىندە, قاۋىپتى ايماقتا ورنالاسقان 41 شارۋا قوجالىعى انىقتالىپ, بۇل جونىندە جەرگىلىكتى تۇرعىندار حاباردار ەتىلدى. بۇگىنگە دەيىن 13 قوجالىقتىڭ مالى قاۋىپسىز جەرگە كوشىرىلدى.
قوستاناي وبلىسى