ەلىمىزدە تۇرمىستىق قاتتى قالدىقتاردى (تقق) جيناۋعا, سۇرىپتاۋعا جانە كومۋگە ارنالعان تاريفتەر ارنايى كاسىپورىنداردىڭ شىعىندارىن جاپپايدى. بۇل تۋرالى ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانباەۆ مالىمدەدى, دەپ جازادى Egemen.kz.
رەسپۋبليكادا جىل سايىن 4,5 ملن توننادان استام قالدىق تۇزىلەدى. بىلتىر قوقىستى قايتا وڭدەۋ دەڭگەيى شامامەن 26%-دى قۇراپ, جوسپارلانعان 30%-عا جەتپەگەن. اتالعان ماسەلەنى شەشۋ ءۇشىن مينيستر مەملەكەتتىك-جەكەشەلىك ارىپتەستىك ء(مجا) تەتىگىن ەنگىزۋدى ۇسىندى. وسى تەتىك شەڭبەرىندە تقق-عا شەكتى, ەكونوميكالىق نەگىزدەلگەن ءتاريفتى بەكىتۋ, سونداي-اق ونى اكىمدىكتەر دەڭگەيىندە بەلگىلەۋ جونىندەگى قۇزىرەتتى ايقىنداۋدى ورتاعا سالدى. ول بويىنشا قازىرگى جانە ۇسىنىلاتىن تاريفتەر اراسىنداعى ايىرماشىلىقتى ۋتيل الىمدارى ەسەبىنەن جابۋ جوسپارلانىپ وتىر. بۇعان قوسا, مەملەكەت باسشىسىنىڭ ءىرى قالالاردا قوقىس وڭدەۋ زاۋىتتارىن سالۋ جونىندەگى تاپسىرماسىن ىسكە اسىرۋ شەڭبەرىندە ۋتيل الىمدارى ەسەبىنەن جەڭىلدىكپەن قارجىلاندىرۋ تەتىگى بەكىتىلگەن. بۇل ۋتيل تولەمى ەسەبىنەن قارجىلاندىرىلاتىن, تولەمدەر بويىنشا ەكى جىلعا دەيىنگى دەمالىسى بار جىلدىق 3%-دان 15 جىلعا دەيىنگى قارىزداردى قامتيدى. بۇگىنگى تاڭدا مينيسترلىك اكىمدىكتەر ۇسىنعان قۇنى شامامەن 317 ملرد تەڭگە بولاتىن 67 جوبانى ماقۇلدادى, ونىڭ 43-ءى قالدىقتاردى قايتا وڭدەۋگە باعىتتالعان. مينيسترلىك جۇرگىزگەن تالداۋ ناتيجەسىندە وڭىرلەردە جوبالاردى ىسكە اسىرۋ جانە قايتالاما شيكىزاتتى بارىنشا ءوندىرۋ كەزىندە تۇرمىستىق قاتتى قالدىقتاردى قايتا وڭدەۋ جونىندەگى قۋاتتاردى ۇلعايتۋ ءۇشىن ايتارلىقتاي الەۋەت بار ەكەنى انىقتالعان.