ماڭعىستاۋدا ءوڭىردىڭ ماقامى بولەك جىرىن, اۋەنى وزگە ءانى مەن كۇمبىرى ەرەن كۇيىن تۋمىسىنان بويىنا ءسىڭىرىپ تۋىپ, ەسىن بىلە قوڭىر دومبىرانى سەرىك ەتىپ, ساحنانىڭ ساڭلاعى جانە ءسانى اتانىپ كەتەتىن ونەردىڭ ءوز ادامدارى بار. ايرىقشا ونەردى ءناسىپ ەتكەن ولكەگە تابيعات ونىڭ مارقاسقا وكىلدەرىن دە سىيلايتىن ءتارىزدى.
ولار تىلسىمنان موينىنا جۇكتەلگەن امانات-پارىزدى قالتقىسىز ءتۇسىنىپ, ءمىنسىز اتقارىپ, شاكىرت تاربيەلەپ, كەشەدەن كەلگەن, بۇگىن ءوزى ۇستاعان ونەردى شاكىرتتەرى ارقىلى كەلەشەككە جالعايدى. ونەردىڭ اۋىر جۇگىن ارقالاعان ءمۇيىزى قاراعايداي ازاماتتار اراسىندا بۇرمە كويلەگى مەن ويۋلى قامزولى كوزگە ۇرىپ, سىرعاسى مەن شولپىسى سىڭعىرلاپ, ماڭعىستاۋدىڭ التىن شۋاعىنا ماڭدايىن سۇيگىزىپ, ەركە سامالىنا شاشىن سيپاتىپ, كوك تەڭىز جاعاسىندا ك ۇلىمدەي ونەر كورىگىن قىزدىرىپ جۇرگەن قىزداردىڭ ءبىرى – دومبىراشى, كۇيشى, ءانشى رۋحيا باتىرشيەۆا.
ماڭعىستاۋ وبلىسى تۇپقاراعان اۋدانى فورت-شەۆچەنكو قالاسىندا كوپبالالى وتباسىندا دۇنيەگە كەلگەن رۋحيا ورتا مەكتەپتى بىتىرگەن سوڭ فورت-شەۆچەنكو قالالىق مادەنيەت جانە ءبىلىم بولىمدەرىندە قىزمەت اتقاردى. مادەنيەت ءۇيى جانىنان قۇرىلعان ۇلت-اسپاپتار وركەسترىنىڭ بەلدى مۇشەسى جانە «اقبوبەك» ارۋلار انسامبلىندە جەتەكشىلىك قىزمەتتە ءجۇرىپ وبلىستىق كومسومول كوميتەتىنىڭ جولداماسىمەن بولگاريا ەلىنىڭ ءتورت قالاسىندا گاسترولدىك ساپارمەن حالىقارالىق فەستيۆالعا قاتىسىپ باس جۇلدە الىپ قايتتى. جەڭىس قاناتتاندىرعان ءارى ءوزىنىڭ تاعدىرى ونەرمەن قابىسا ورىلەتىنىن تۇسىنگەن رۋحيا الماتىدا قازىرگى ج.ەلەبەكوۆ اتىنداعى ونەر كولەدجىندە پروفەسسور قۇبىش مۇحيتوۆتىڭ كلاسىندا دومبىرا اسپابى بويىنشا ءبىلىم الا ءجۇرىپ, قوسىمشا قازاقستاننىڭ حالىق ءارتىسى عاريفوللا قۇرمانعاليەۆتەن ءداستۇرلى ءان-تەرمە بويىنشا ساباق الدى. ونەردى سۇيگەن قىز مۇنىمەن توقتاپ قالعان جوق, الماتى مەملەكەتتىك قۇرمانعازى اتىنداعى ۇلتتىق كونسەرۆاتوريادا وقي ءجۇرىپ, اكادەميالىق قۇرمانعازى اتىنداعى ۇلت-اسپاپتار وركەسترىنىڭ ءارتىسى بولىپ قىزمەت اتقاردى. تۋعان جەرگە كاسىبي جوعارى ءبىلىمدى مامان بولىپ ورالعان ول ەڭبەك جولىن فورت-شەۆچەنكو قالاسى مۇرىن جىراۋ ساز مەكتەبىنىڭ ديرەكتورى قىزمەتىنەن باستادى. وسى كەزدەن باستاپ رۋحيا ماحمۇتقىزى ۇلتتىق ونەردى ناسيحاتتاۋ, جاس ونەرپازداردى تاربيەلەۋ ىسىنەن اۋىتقىپ كورگەن جوق. اقتاۋ قالاسى ونەر مەكتەبىندە ءبولىم مەڭگەرۋشىسى, ابىل تاراق ۇلى اتىنداعى قازاق بالالار ونەر مەكتەبىنىڭ ديرەكتور قىزمەتىن جاساي ءجۇرىپ, 1992 جىلى ماڭعىستاۋ وبلىستىق فيلارمونياسى جانىنان قۇرىلعان «اقجارما» فولكلورلىق ءانسامبلىنىڭ مۇشەسى جانە جەكە ورىنداۋشىسى, ا.تاراق ۇلى اتىنداعى ۇلت اساپاپتار وركەسترىندە ارتىستىك قىزمەتىن اتقاردى. كەيىن اتالعان فيلارمونيا ديرەكتورى, سوسىن ا.تاراق ۇلى اتىنداعى قازاق بالالار ونەر مەكتەبى ديرەكتورى قىزمەتىن اتقاردى. تەك ۇستاز رەتىندە ەڭبەك ەتىپ قويماي, قازاق ونەرىن دامىتۋ جولىندا ەرلەرمەن بىرگە تالاي ماسەلە كوتەردى, تالاپ ەتتى, ناتيجەگە جەتتى. ۇلت ونەرىنىڭ بولاشاعى ءۇشىن اقتاۋ قالاسىنان قازاق بالالار ونەر مەكتەبىن اشۋ, ول مەكتەپكە ابىل تاراق ۇلىنىڭ ەسىمىن بەرۋدىڭ باسى-قاسىندا تالاي تابالدىرىقتى توزدىرىپ, تالاي ەسىكتى قاعىپ بارعانداردىڭ ءبىرى وسى رۋحيا اپامىز.
2018 جىلى زەينەتكە شىققانمەن ۇلاعاتتى ۇستازدىق جۇمىسىنان قول ۇزگەن جوق, داۋلەسكەر دومبىراشى, تاجىريبەلى ۇستازدىڭ جاس وسكىنگە بەرەر رۋحاني ازىعى مول ەكەندىگىن بىلگەن باسشىلار قىزمەتتە قالدىردى. قازاقستاننىڭ وقۋ ءىسىنىڭ ۇزدىگى, قازاقستاننىڭ ەڭبەك سىڭىرگەن قايراتكەرى, اقتاۋ قالاسىنىڭ قۇرمەتتى ازاماتى, «ەرەن ەڭبەگى ءۇشىن» مەدالىنىڭ يەگەرى رۋحيا ماحمۇتقىزىنىڭ شاكىرتتەرى بۇگىندە ەلىمىزدىڭ ءار تۇكپىرىندە ونەر ساپىندا ءجۇر, كوللەدج, كونسەرۆاتوريا ءبىتىرىپ, كاسىبي مامان رەتىندە ونەر وردالارىندا جۇمىس ىستەپ, وقۋ ورىندارىندا شاكىرتتەرگە ءبىلىم بەرىپ جۇرگەندەرى قانشاما؟ ۇستاز مۇراتى, ونەر ساباقتاستىعى دەگەن وسى بولسا كەرەك. بۇل تۇرعىدان كەلگەندە رۋحيا وزىنە تابيعاتتان بەرىلگەن امانات-پارىزدى ورىندادى دەپ بىلەمىز. شاكىرتىنىڭ ءبىرى – ءداستۇرلى ءانشى, دومبىراشى, قازاقستاننىڭ ەڭبەك سىڭىرگەن قايراتكەرى, «دارىن» مەملەكەتتىك جاستار سىيلىعىنىڭ لاۋرەاتى, «قۇرمەت» وردەنىنىڭ يەگەرى, قازاق ۇلتتىق ۋنيۆەرسيتەتىنىڭ پروفەسسورى, مادەنيەت سالاسىنداعى پرەزيدەنت ستيپەندياسىنىڭ يەگەرى ايگۇل قوسانوۆا. رۋحيا ايگۇل شاكىرتىن ماقتانىشپەن ايتىپ جۇرەدى.
جانى جايساڭ, قاراپايىم, ءاردايىم ك ۇلىمدەپ, جان-جاعىنا جىلۋ شاشىپ جۇرەتىن ءانشى, دومبىراشى رۋحيا – وتباسىندا اياۋلى انا, اسىل اجە. ۇلى باقىتجان مۇناي سالاسىندا ەڭبەك ەتسە, كىشى ۇلى الماس ءوزى سياقتى قوڭىر دومبىرانى قۇيقىلجىتقان داۋلەسكەر دومبىراشى, قارشادايىنان كۇي دودالارىندا توپ جارعان جۇيرىك, ۇلتتىق كونسەرۆاتوريا تۇلەگى. شاتتىعى شالقىعان وتباسىندا نەمەرەلەرىن قىزىقتاپ, قوعامدا ۇلتتىق ونەردى ناسيحاتتاپ جۇرگەن رۋحيا ماحمۇتقىزى حالىققا شىعارماشىلىق ءارى ەسەپتىك كونتسەرتىن بەرىپ, كورەرمەنگە اسەرلى دە ادەمى كەش سىيلايتىنى ءسوزسىز.
ماڭعىستاۋ وبلىسى