ناۋرىز مەرەكەسىنە وراي «جىبەك جولى» حالىقارالىق پويىز باعىتىمەن تۇركىستانعا 300-دەن استام تۋريست ساپارلاپ كەلدى. قوناقتار قالانىڭ تاريحي-مادەني ورىندارىن ارالاپ, كوكتەمنىڭ باستى مەرەكەسىن تاماشالاۋدى جوسپارلاعان, دەپ حابارلايدى Egemen.kz.
ساياحاتشىلار ساپار بارىسىندا تۇركىستاننىڭ باستى نىساندارىمەن تانىسادى. ولار ارىستانباب كەسەنەسى مەن وتىرار قالاشىعىنا بارىپ, قوجا احمەت ياساۋي كەسەنەسىنە زيارات ەتەدى. سونداي-اق «جاستار» ساياباعى مەن «كەرۋەن ساراي» كەشەنى سياقتى زاماناۋي ساۋلەت نىساندارىن تاماشالايدى.
ايتا كەتەيىك, «جىبەك جولى» تۋريستىك پويىزى وتكەن جىلى ىسكە قوسىلعان بولاتىن. بۇل باعىت اياسىندا ساياحاتشىلار بىرنەشە كۇن ىشىندە الماتى, تۇركىستان, تاشكەنت, سامارقاند جانە شىمكەنت قالالارىن ارالاپ, ولاردىڭ كورىكتى جەرلەرىمەن تانىسادى.
ەستەرىڭىزگە سالا كەتەيىك, تۇركىستاندا تۋريستىك ماۋسىم 19 ناۋرىزدا رەسمي تۇردە اشىلدى. بيىلعى جىلدىڭ قاڭتار-اقپان ايلارىندا E-qonaq جۇيەسىندە تىركەلگەن شەتەلدىك تۋريستەر سانى 1310 ادامدى قۇرادى. ال «ازىرەت سۇلتان» قورىق-مۋزەيىنىڭ دەرەكتەرىنە سۇيەنسەك, وسى كەزەڭدە 47 مىڭنان استام ادام كەسەنەگە كەلگەن.
2024 جىلى تۇركىستان – تۇركى الەمىنىڭ تۋريستىك استاناسى مارتەبەسىنە يە بولدى. بۇل وڭىرگە كەلەتىن تۋريستەر سانىن ارتتىرۋعا ايتارلىقتاي ىقپال ەتتى. وتكەن جىلدىڭ ناۋرىز ايىندا قالاعا 79,8 مىڭ ادام ساپارلاعان. ەرەكشە مارتەبەگە بايلانىستى بۇل كورسەتكىشتەر الداعى ۋاقىتتا دا وسەدى دەپ كۇتىلەدى.
بۇگىندە وڭىردە 235 قوناق ءۇي مەن 75 ساناتوري-كۋرورتتىق مەكەمە جۇمىس ىستەيدى. 2024 جىلدىڭ قورىتىندىسى بويىنشا, تابيعي ايماقتارعا 128,6 مىڭ ادام, تاريحي ورىندارعا 880,1 مىڭ ادام ساياحات جاساعان.