دايارلىق جۇمىسى پىسىقتالدى

اۋەلى قوبدا اۋدانىنا بارىپ, ودان كەيىن ويىل, تەمىر, بايعانين, مۇعالجار جانە العا اۋداندارىنىڭ اۋماعىن اۋەدەن شولىپ شىقتى. ەلدى مەكەندەردى سۋ تاسقىنىنان قورعاۋدى قامتاماسىز ەتەتىن نەگىزگى نىسانداردى تەكسەردى. قوبدا اۋدانىندا قورعانىس بوگەتتەرىن, ويىل اۋدانىندا ويىل اۋىلىنداعى وزەن ارقىلى وتەتىن كوپىردى جانە قاراتال اۋىلىنداعى قورعانىس بوگەتىن تەكسەردى. تەمىر اۋدانىندا «باباتاي» قىسىمسىز سۋ بۇرۋ بوگەتىنە اەروۆيزۋالدى تەكسەرۋ جۇرگىزدى. بايعانين اۋدانى بويىنشا ەڭبەكشى جانە شۇبارشى اۋىلدارىندا قورعانىس بوگەتتەرىنىڭ قۇرىلىسىن, سونداي-اق شۇبارقۇدىق اۋىلىندا ەرىگەن قار سۋىن بۇرۋ ارنالارىنىڭ قۇرىلىسىن قاراپ شىقتى.

جەم وزەنىنىڭ بويىنداعى قورعانىس قۇرىلىستارىنىڭ جاعدايىنا ەرەكشە نازار اۋدارىلدى. بايعانين اۋدانىندا ۆيتسە-پرەمەر وزەن ساعاسىن ارالاپ كوردى. جاڭاتاڭ اۋىلىندا 1,2 شاقىرىمدى قۇرايتىن قورعانىس بوگەتى نىعايتىلىپ, ارنالار كەڭەيتىلدى, مۇز كەپتەلىسى ارشىلدى. مۇعالجار اۋدانىندا «Tasqyn» اقپاراتتىق جۇيەسىنىڭ دەرەك­تەرىنە سايكەس قاۋىپتى ايماقتاعى ەلدى مە­كەن­دەردىڭ جاعدايى تەكسەرىلدى. جەم وزەنى­نىڭ بويىندا جاعابۇلاق اۋىلى­نان 3,3 شاقىرىم جانە وڭتۇستىك-باتىس­قا قاراي 1 شاقىرىمدىق قورعانىس بوگەت­تەرى سالىندى. ساعاشيلى اۋىلىندا 2 شاقى­رىم­دىق قورعانىس بوگەتى سالىندى, اۋىل­ى­شىلىك جانە اۋداندىق ماڭىزى بار اۆتو­موبيل جولدارىنداعى ارىقتار مەن سۋا­عار قۇبىرلارى تولىعىمەن تازارتىلدى.

وبلىس اۋماعىن باعامداۋ بارىسىندا ۆيتسە-پرەمەر اقتوبە قالاسىنىڭ باتىس بولىگىن سۋ تاسقىنىنان قورعاي­تىن سازدى سۋقويماسىنىڭ سالالارىن قاراپ شىقتى. قارعالى جانە اقتوبە سۋ­قويمالارىنىڭ جايىن اۋەدەن باقىلاپ كوردى. ءبىرىنشى نىسان قايتا جاڭارتۋعا ازىرلىك ۇستىندە, ال ەكىنشىسى تولىعىمەن جوندەۋدەن وتكەن.

وبلىستا سۋ تاسقىنىنىڭ قاۋپى جوعارى 58 ەلدى مەكەن ەرەكشە باقى­لاۋعا الىنعان. سونداي-اق 206 سۋ شارۋا­شىلىعى قۇرىلىمى – قاتاڭ باقىلاۋدا. وبلىس اكىمى اسحات شاحاروۆتىڭ ايتۋىنشا, جاعالاۋلاردى نىعايتۋ, وزەن ارنالارىن تەرەڭدەتۋ جانە تازارتۋ جۇمىستارى جۇرگىزىلدى (45 شاقى­رىم). 38,7 شاقىرىم جاڭا قورعانىس بوگەتتەرى تۇرعىزىلدى, قولدانىستاعى 32 شاقىرىم بوگەتتەر جوندەلدى, 19 گيدروتەحنيكالىق قۇرىلىستار سالىندى, 155 سۋ وتكىزۋ قۇرىلىمدارى مەن قۇبىرلار ورناتىلدى جانە جوندەلدى, 150 شاقىرىمنان استام ارىقتار مەن سۋ اعارلار تازارتىلدى.

ءوڭىردىڭ ازاماتتىق قورعاۋ قىزمەت­تەرى جوعارى دايىندىق رەجىمىنە اۋىس­تىرىلدى. ونىڭ قۇرامىندا 3 625 ادام, 1 122 بىرلىك تەحنيكا, 103 بىرلىك ءجۇزۋ قۇرالى بار. وڭىردە الماتى جانە قىزىلوردا وبلىستارىنىڭ كۇشتەرى مەن قۇرالدارى جۇمىس ىستەپ جاتىر. ويىل وزەنىنىڭ پارومدىق وتكە­لىن قام­تاماسىز ەتۋ ءۇشىن قورعانىس مي­نيستر­­لىگىنىڭ ينجەنەرلىك-ساپەرلىك بري­گا­داسىنىڭ قىزمەتكەرلەرى ايماققا جەتتى.

تۇرعىندار قاۋىپسىزدىگىن قامتاما­سىز ەتۋ جانە ەلدى مەكەندەردى, ينفراقۇ­رىلىمدى, اۋىل شارۋاشىلىعى القاپتارىن سۋ باسۋ قاۋپىن ازايتۋ ماقساتىندا قانات بوزىمباەۆ ءوڭىر اكىمدىگى مەن توتەنشە جاعدايلار مينيسترلىگىنە سۋ تاسقىنى جاعدايىنا تاۋلىك بويى مونيتورينگ جۇرگىزۋدى, وزەندەردەگى سۋ دەڭگەيىن باقىلاۋدى, سۋ قويمالارىنان سۋ جىبەرۋدى رەتتەۋدى ەرەكشە قادالاعاۋدا ۇستاۋدى تاپسىردى.

ايتا كەتەيىك, اقتوبە وبلىسى – سۋ باسۋ قاۋپى جوعارى اۋماقتار تىزىمىندە. جىل سايىن ناۋرىز ايىنىڭ سوڭىندا ەرىگەن قار سۋلارىنان اۋىلدارعا قاۋىپ تونەدى. بۇگىنگى تاڭدا جاعداي – باقى­لاۋدا. احۋال تۇراقتى. «Tasqyn» اقپا­رات­­تىق جۇيەسىن پايدالانۋ ارقىلى ۇدايى مونيتورينگ جۇرگىزىلىپ جاتىر.