كۇنى كەشە الماتىدا مادەنيەت جانە اقپارات مينيسترلىگىنىڭ قولداۋىمەن ء«تۇبى ءبىر تۇركى ادەبيەتى» اتتى دوڭگەلەك ۇستەل ءوتتى. القالى جيىنعا جازۋشىلار وداعىنىڭ توراعاسى مەرەكە قۇلكەنوۆ, وزبەكستان جازۋشىلار وداعى توراعاسىنىڭ ورىنباسارى مينحودجيددين حوجيماتوۆ, ەكى ەلدىڭ تانىمال قالامگەرلەرى قاتىستى.
كەزدەسۋدىڭ نەگىزگى تاقىرىبى – ادەبي بايلانىستى نىعايتۋ جانە ادەبيەتتىڭ وقىرماندارعا ىقپالى. قازاق پەن وزبەك حالقىنىڭ ادەبيەتى مەن مادەنيەتى تەرەڭ تاريحي جانە رۋحاني بايلانىسقا يە ەكەنى بارشاعا ءمالىم. بۇل جاقىندىقتىڭ قاينار باستاۋى ورتاق تۇركىلىكتە جاتقانى بەلگىلى. قازىرگى ۋاقىتتا دا بۇل ءۇردىس جالعاسىپ جاتىر. قازاق پەن وزبەك ادەبيەتىنىڭ جاڭا بۋىن وكىلدەرى شىعارمالارىن ءبىر-بىرىنە اۋدارىپ, ادەبي بايلانىستاردى نىعايتىپ كەلەدى.
وزبەكستاننان كەلگەن دەلەگاتسيا ۇلتتىق كىتاپحانانى ارالادى. سيرەك كىتاپتار مەن قولجازبالار قىزمەتىندە ارنايى كورمە ۇيىمداستىرىلىپ, قوناقتار قوردا ساقتالعان بىرەگەي مۇرالارمەن تانىستى. ولاردىڭ قاتارىندا XVIII عاسىرداعى قۇران, قوجا احمەت ءياساۋيدىڭ «ريسالا» (XVI ع.), «ديۋاني حيكمەت» (XIX ع.), «حيكمەت حازرەتيى» (XVIII ع.), سونداي-اق ونىڭ اتا-تەگى تۋرالى تاريحي شەجىرە «ناسابناما» (XVII ع.) جانە شاكىرتى سۇلەيمەن باقىرعانيدىڭ «حيكمەتتەرى» بار. سونىمەن قاتار شىعىس ادەبيەتىنىڭ جاۋھارلارى – نيزامي گانجاۋيدىڭ «حامسا» (XV ع.), الىشەر ءناۋايدىڭ «ديۋانى» (XVII ع.), ابىلقاسىم ءفيردوۋسيدىڭ «شاھناماسى» (XVIII ع.) دا ەرەكشە نازارعا ىلىكتى.ء ىس-شارا اياسىندا وزبەكستاننىڭ ادەبيەتى مەن مادەنيەتىنە ارنالعان كىتاپ كورمەسى ۇيىمداستىرىلدى.
سونىمەن قاتار وزبەكستان رەسپۋبليكاسىنان كەلگەن دەلەگاتسيا قۇرامى مەن قازاق قالامگەرلەرى قازاقتىڭ باس اقىنى ابايدىڭ ەسكەرتكىشىنە تاعزىم ەتىپ, گۇل شوقتارىن قويدى. سونداي-اق اكادەميك, كلاسسيك جازۋشى مۇحتار اۋەزوۆتىڭ مۋزەي-ۇيىنە بارىپ, تاريحي جادىگەرلەرمەن تانىستى.
ايتا كەتەيىك, بۇعان دەيىن تۇركىستاندا قازاقستان مەن وزبەكستاننىڭ بەلسەندى جاستارىنىڭ قاتىسۋىمەن «دوستىق كوپىرى» فورۋمى وتكەن بولاتىن. فورۋمدا جۇمىسشى ماماندىقتاردى ناسيحاتتاۋ جانە ەڭبەك نارىعىنا جاساندى ينتەللەكتىنىڭ اسەرى سەكىلدى ماسەلەلەر تالقىلاندى.