اقتوبەدەگى «FIBC Kazakhstan» جشس مۇناي-گاز ونەركاسىبى, قۇرىلىس, تۇرمىستىق تەحنيكا جانە اۆتوموبيل وندىرىسىندە كەڭىنەن قولدانىلاتىن پوليپروپيلەن شيكىزاتىن وڭدەۋ ارقىلى قاپشىق, ۆاگون توسەنىشى مەن قاپتاما, شاتىر, تەحنيكالىق تاسپالاردى ساتىلىمعا شىعارادى. 8 جىل بۇرىن شاعىن تسەح تۇرىندە اشىلعان كاسىپورىن بۇگىندە 104 ادامدى تۇراقتى جۇمىسپەن قامتىپ وتىرعان ىرگەلى وندىرىسكە اينالدى.
ۇزاق جولعا شىداس بەرەتىن جوعارى ساپالى پوليپروپيلەن قاپتامالارىنا ءىرى كومپانيالار تاراپىنان تاپسىرىس كوبەيگەن. ويتكەنى ونەركاسىپ تاۋارىنىڭ ءتيىستى جەرىنە بۇزىلماي ءارى ب ۇلىنبەي جەتۋى ءۇشىن قاپتامانىڭ ساپالى ءارى بەرىك بولعانى ابزال. بۇگىندە «FIBC Kazakhstan»-نىڭ ۆاگون قاپتامالارىن «تەڭىزشەۆرويل», «ارالتۇز», «قتج»-نىڭ اقتوبەدەگى «باتىس» فيليالى تۇراقتى تۇتىنادى. «قازحرومعا» قاراستى اقتوبە فەرروقورىتپا زاۋىتى دا قىزىعۋشىلىق تانىتىپ وتىر.
سەرىكتەستىك ديرەكتورى بوتاگوز ايبوكەنوۆانىڭ ايتۋىنشا, بيىل قاڭتاردان باستاپ ايىنا 100 توننا پوليپروپيلەن وڭدەپ, ودان سينتەتيكالىق ماتەريالدار دايىنداۋ باستالعان. وعان قاجەتتى تۇيىرشىك تۇرىندەگى پوليپروپيلەن شيكىزاتى اتىراۋداعى «KPI» كومپانياسىنان جەتكىزىلەدى.
وندىرىستە تۇيىرشىكتەردى سينتەتيكالىق ماتاعا اينالدىرۋ الدەقايدا تيىمدىرەك. الايدا وڭدەۋ ءوندىرىسىن ىسكە قوسۋ قوسىمشا عيمارات, جاڭا قۇرىلعى جانە جابدىقتارمەن جۇمىس ىستەي الاتىن مامانداردى قاجەت ەتەدى. سوندىقتان 2024 جىلدىڭ سوڭىندا «دامۋ» قورى كومەگىمەن 1 ملرد تەڭگە نەسيە الىپ, وعان ءۇندىستاننان وندىرىستىك ماشينالار اكەلىنگەن.
«تاپسىرىستاردىڭ كوبەيۋىنە بايلانىستى ءونىم تۇرلەرىن شىعارۋدى ارتتىردىق. وندىرىستىك اۋماقتان جاڭا تسەح عيماراتىن الىپ, وندا ءۇندىستاننان اكەلىنگەن ەكسترۋدەر جابدىقتارىن قوندىرىپ جاتىرمىز. بىلتىر KPI-مەن ارىپتەستىك بايلانىس ورناتىپ, ول جاقتان شيكىزات كۇيىندە اكەلىنەتىن ءونىمدى وزىمىزدە وڭدەيتىن بولىپ شەشكەنبىز. الايدا بىزدە پوليپروپيلەن تۇيىرشىكتەرىن قالىپقا سالىپ, ەرىتىپ, لايىقتى پىشىندە ماتا دايىندايتىن, ەكسترۋدەر ماشينالارىن باسقاراتىن جانە تسيليندر, كونۋس پىشىندەس اينالمالى بولشەكتەردى دايىندايتىن مامان بولمادى. ەكسترۋدەر مامانىن اقتوبەدەگى كاسىپتىك-تەحنيكالىق وقۋ ورىندارىنان تابا المادىق. اۋىر ماشينالاردا جۇمىس ىستەيتىن تىگىنشىلەر دە كەرەك. پوليمەر, پلاستيك, رەزەڭكە ماتەريالداردى قىزدىرىپ, ارنايى قالىپتاردان وتكىزەتىن ەكسترۋدەر ماشيناسىنىڭ مامانى قوندىرعىنى باقىلاپ, ءونىم دايىندالىپ جاتقاندا تەمپەراتۋرا, قىسىم, جىلدامدىعىن رەتتەيدى. دايىن ءونىمنىڭ ساپاسى مەن بىركەلكى بولۋىن, قاجەتتى ولشەمگە ساي ەكەنىن تەكسەرەدى. قوندىرعىنىڭ اقاۋىن انىقتاپ, جوندەۋ جۇمىسىمەن دە اينالىسادى. وسى جۇمىسپەن تەحنيكالىق دايىندىقتان وتكەن ماماندار اينالىسادى», دەيدى ب.قىدىربايقىزى.
تىگىن تسەحىنىڭ اعا شەبەرى رۋسلان سۇلەيمەنوۆتىڭ ايتۋىنشا, تىگىنشىلەر ءبىر تاۋلىكتە 1-2,5 توننا سينتەتيكالىق ماتەريالدان 2 مىڭ دانا قاپشىق تىگەدى. كەيدە ەكى اۋىسىممەن دە جۇمىس ىستەيدى. ءبىر اۋىسىمدا ۆاگون قاپتاماسىن تىگۋگە 34 شەبەر, قاپشىق تىگۋگە 70 تىگىنشى كىرىسەدى. جاڭا قوندىرعىلاردى ورناتىپ بولعان سوڭ جۇمىس كولەمى ارتپاق.
اقتوبە وبلىسى