قارجى نارىعىن رەتتەۋ جانە دامىتۋ اگەنتتىگى (قنردا) بانكتەر مەن ميكروقارجى ۇيىمدارىندا 21 جاسقا دەيىنگى جانە 55 جاستان اسقان كليەنتتەر تۇتىنۋشىلىق كرەديت الۋعا ءوز كەلىسىمىن بەرەتىن جۇيەنى ەنگىزۋدى جوسپارلاپ وتىر.
قنردا اتاپ وتكەندەي, قارىز ونلاين راسىمدەلگەن جاعدايدا نەسيە بيۋروسىنان نەمەسە «ەلەكتروندىق ۇكىمەت» ۆەب-پورتالىنان كەلىسىم الۋعا بولادى.
بىلتىر ءماجىلىس دەپۋتاتى ماگەررام ماگەرراموۆ ازاماتتاردىڭ كيبەرقىلمىسقا قارسى ءىس جۇزىندە ءالسىز ەكەنىن مالىمدەپ, وسى ورايدا ونلاين-نەسيەلەۋگە تىيىم سالۋدى ۇسىنعان بولاتىن. قارجى تالداۋشىسى يۋري ماسانوۆتىڭ ايتۋىنشا, ونلاين-نەسيە الۋعا تىيىم سالماي, قارجىلىق ساۋاتتىلىقتى ارتتىرۋعا ءمان بەرۋ كەرەك.
«بانكتەردىڭ وزدەرى كۇدىكتى ترانزاكتسيالاردى ەسەپتەپ, الاياقتاردىڭ اتىنا اقشا اۋدارۋدى توقتاتادى, الاياقتاردىڭ اتىنا اقشا اۋداراتىن بانك كارتالارىن بۇعاتتايدى. الاياقتاردىڭ ىقپالىنا ءتۇسۋ قاۋپىن ازايتۋ ءۇشىن حالىقتىڭ قارجىلىق ساۋاتتىلىعىمەن كوبىرەك جۇمىس ىستەگەن ءجون. ونلاين-نەسيەلەندىرۋدى جابۋ – الاياقتار تاراپىنان جەڭىستى مويىنداۋ جانە ادامدار شاعىن نەسيە نەمەسە ءبولىپ-ءبولىپ تولەۋ ءۇشىن بانك بولىمشەلەرىنە نەمەسە تۇرمىستىق تەحنيكا دۇكەندەرىنە بارۋعا ءماجبۇر بولعان 2000 جىلدارعا قايتا ورالۋ», دەيدى.
ساراپشى ماقسات حالىقتىڭ ايتۋىنشا, ەلدەگى ەڭ ءىرى بانكتەردىڭ ءوزى ونلاين الاياقتار ءۇشىن قولجەتىمدى. سول سەبەپتى, تەك جەكەلەگەن بانكتەر ەمەس, قازاقستان قارجىگەرلەرى قاۋىمداستىعى نەمەسە ۇلتتىق بانك بازاسىندا ورتاق كيبەرقاۋىپسىزدىك ورتالىعىن اشاتىن كەز كەلدى.
«بانكتەر جەكە-دارا بۇل ماسەلە الدىندا قورعانسىز ەكەنىن كورىپ ءجۇرمىز. تەحنولوگيا دامىعان سايىن ونىڭ ءالسىز تۇسىن ۇرىمتال جەردەن سوعاتىن كيبەرشابۋىل تەحنولوگياسىنىڭ مۇمكىندىگى دە ءارتاراپتاندىرىلىپ بارادى. قنردا-نىڭ ءبىرىنشى كەزەكتە كامەلەت جاسىنا جەتپەگەندەر مەن زەينەت جاسىنداعى ازاماتتارعا نەسيە الۋدىڭ ءداستۇرلى ءتۇرىن ۇسىنۋى كوڭىلگە قونىمدى. مەنىڭشە, وسى توپقا قاتىستى شەشىم 2000 جىلدارعا كەرى ورالۋدى بىلدىرمەيدى. تىيىم سالۋدىڭ ورنىنا ول تسيفرلاندىرۋ ۇدەرىسىن بۇزباي, ازاماتتاردى قورعاي الاتىن رەتتەۋ شارالارىن ەنگىزۋدى ۇسىنادى. الاياقتاردىڭ ارەكەتتەرى ءۇشىن بانكتەردىڭ ورتاق جاۋاپكەرشىلىگىن زاڭمەن ناقتىلاساق, بانكتەردىڭ ۇرلانعان قاراجات ءۇشىن جاۋاپكەرشىلىگى دە زاڭداستىرىلادى. بانكتەردىڭ جاۋاپكەرشىلىگى زاڭداستىرىلسا, بانك قاۋىپسىزدىك جاعىنا كوبىرەك كوڭىل بولەر ەدى», دەيدى ماقسات حالىق.
ايتا كەتۋ كەرەك, ءبىرىنشى كرەديتتىك بيۋرو جاقىندا جاڭا قىزمەت – قوڭىراۋ شالۋ ارقىلى نەسيە بەرۋگە تىيىم سالاتىن تەتىكتىڭ پايدا بولعانىن حابارلادى.