اقتوبە وبلىسىندا ەجەلگى عۇن تايپالارىنىڭ قونىستارىن انىقتاۋعا بايلانىستى 2020–2023 جىلدارى ەرەكشە قارقىنمەن باستالعان قازبا جۇمىستارى بۇگىندە سايابىرسىدى. سول جىلدارى ويىل اۋدانىنداعى سارالجىن اۋىلىندا, كوپتوعاي اۋىلىنىڭ شوپتىگولىندە, ش.بەرسيەۆ اتىنداعى اۋىلدىق وكرۋگتىڭ قازدىارالىندا عۇن-سارمات تايپالارىنىڭ وبالارى, نايزا ۇشتارى, قۇمىرالار مەن اشەكەي بۇيىمدارى كوپتەپ تابىلدى.
«وتكەن جىلى ويىل اۋدانىنىڭ كوسەمباي اۋىلىنا جاقىن جەردەگى اقبۇلاق قورىمى قازىلدى. بۇل – ويىل مەن قيىل وزەندەرىنىڭ ورتاسىنداعى ەجەلگى ادامدار تۇراعى. اقبۇلاق تا ەرتەدەگى عۇن بىرلەستىگىنىڭ قورىمى. قازبا جۇمىستارى كەزىندە تابىلعان جادىگەرلەر شامامەن ءىىى–ىV عاسىردا عۇن تايپالارى ەۋروپاعا اتتانار الدىندا ءبىزدىڭ جەرىمىزگە ايالداپ, بىرلەستىك قۇرعانىنا دالەل بولادى. اسلان مامەدوۆ باستاعان ارحەولوگتەر ايتەكە بي, قوبدا, ويىل اۋداندارىنان عۇن-سارماتتاردىڭ قورعان-وبالارىن تاۋىپ, كارتاسىن جاسادى», دەيدى ويىل اۋداندىق شىعاناق بەرسيەۆ اتىنداعى ونەر جانە ولكە تاريحى مۋزەيىنىڭ عىلىمي قىزمەتكەرى دۋلات يساباەۆ.
سۋرەتتەگى – قاراتال اۋىلىنان ءۇش شاقىرىم جەردەگى قازدىارالداعى ەجەلگى ادامدار تۇراعىنان تابىلعان قۇمىرا. بۇل جەردەن ارالارى وتە جاقىن ورنالاسقان ءۇش جەرلەۋ ورنى شىقتى. ءۇشىنشى شۇڭقىردا ەرەسەك ادام مەن سوپاقشا باستى ءجاسوسپىرىم جەرلەنگەن وبا ەرتە داۋىردە تونالعان ەكەن. مۇنداعى ەرەسەك ادامنىڭ باس سۇيەگى جوق. ءسابي كەزدەن بالانىڭ باسىن قاتتى ەتىپ تاڭىپ, سوپاقشا ەتىپ ۇلكەيتۋ عۇن داۋىرىندەگى اقسۇيەكتەر داستۇرىنە ءتان جورالعى. عۇن بالاسى جورىقتا قايتىس بولدى ما, الدە وزەن بويىندا ايالداعاندا وپات بولدى ما, الدە وسى جەردى مەكەندەگەن تايپا كوسەمىنىڭ بالاسى ما؟ بۇل جاعى بەلگىسىز. وبلىستىق تاريحي-ولكەتانۋ مۋزەيىنىڭ ارحەولوگتەرى قازدىارالدا ەرتە قولا, تەمىر داۋىرلەرى مەن ەرتە ورتا عاسىر زامانىنىڭ جەرلەۋ ورىندارى قاتار جاتىر دەپ قورىتىندى جاسادى.
اقتوبە وبلىسى