ماڭعىستاۋدا مامىر ايىنىڭ 17-18 كۇندەرى قىزىقتى سپورتتىق ءىس-شارا وتەدى. «Tour De Bozjyra» ۆەلوجارىسى – سالاماتتى ءومىر سالتىن, سپورتتى ناسيحاتتايتىن بەلسەندى جانداردى بىرىكتىرەتىن, ءوڭىر ءتۋريزمىن تانىتاتىن ماڭىزدى دودا. جارىسقا قاتىسۋشىلارعا باتىس ءوڭىرىمىزدىڭ, سونىڭ ىشىندە ماڭعىستاۋدىڭ كورىكتى تابيعي ورىندارىنا ساپار شەگۋ ۇسىنىلادى.
سپورتشىلار ءبىرىنشى كۇنى, 17 مامىردا ۇزىندىعى 150 شاقىرىمدىق قاشىقتىقتا, جاڭاوزەننەن بوزجىراعا دەيىن جارىسادى. 18 مامىردا اقتاۋدان TetysBlu تاقىرىپتىق ساياباعىنا دەيىن 35 شاقىرىمدى باعىندىرىپ, مارەگە جەتەدى.
«جەڭىسكە جەتۋ وڭايعا تۇسپەيدى. قوزعالىس باعدارى كۇردەلى. قاتىسۋشىلاردىڭ كەلەسى مەجەگە دەيىن جولدا ايالداپ, دەمالىپ, تاماقتانۋىنا ارنالعان ايالدامالار قاراستىرىلعان. «Rixos Water World Aktau» قاتىسۋشىلاردىڭ قاۋىپسىزدىگىن قامتاماسىز ەتەدى. مەديتسينالىق جانە تەحنيكالىق قولداۋ دا ويلاستىرىلعان. سونىمەن قاتار سپورتشىلارعا ارنايى باعدارلانعان ەكسكۋرسيا اياسىندا بوزجىرا پانوراماسىنا بارۋ مۇمكىندىگى بەرىلەدى. بارلىق قاتىسۋشىلارعا ەستەلىك مەدالدار تابىستالادى», دەيدى ۇيىمداستىرۋشىلار.
ۆەلوجارىس بوزجىرانىڭ بوز جولىمەن ساپار شەگەمىن دەۋشىلەر ءۇشىن قىزىقتى, ءارى ەستە قالارلىق ءىس-شارا بولاتىنى انىق.
ماڭعىستاۋ وبلىسى