بيىل 1 قاڭتاردان باستاپ ەلىمىزدە «مەملەكەتتىك ساتىپ الۋ تۋرالى» زاڭ كۇشىنە ەنگەنى ءمالىم. ساتىپالىمنىڭ جاڭا ءتارتىبى جوبالاردى ىسكە قوسۋدى جەدەلدەتىپ, سىبايلاس جەمقورلىقتىڭ سىن-قاتەرىن ازايتۋ مەن جەرگىلىكتى بيزنەستى قولداۋعا باعىتتالعان, دەپ حابارلايدى Egemen.kz.
ماسەلەن, بىلتىرعى كەزەڭدە 860,3 ملرد تەڭگە سوماسىنا 327 206 كەلىسىمشارت جاسالعان بولسا, وسى جىلدىڭ 11 ناۋرىزىنداعى جاعداي بويىنشا 2 727,6 ملرد تەڭگە سوماسىنا 554 240 كەلىسىمشارت جاسالدى.
بۇعان قوسا رەيتينگتى-بالدىق جۇيەنى پايدالانۋ ارقىلى كونكۋرس جەڭىمپازدارى 5-9 جۇمىس كۇنى ىشىندە انىقتالاتىن بولعان. اتالعان ادىس جەڭىمپازدى انىقتاۋ پروتسەسىنە كونكۋرستىق كوميسسيانىڭ قاتىسۋىن قاجەت ەتپەيدى. وسى ارقىلى سىبايلاس جەمقورلىق قاتەرى ازايادى.
مىسالى, استاناداعى №3 قالالىق اۋرۋحانانىڭ بىرنەشە عيماراتىن كۇردەلى جوندەۋىنە بايلانىستى ساتىپالىمدى وتكىزۋگە نەبارى 6 جۇمىس كۇنى جەتكىلىكتى بولدى. كەلىسىمشارتتىڭ سوماسى – 1,8 ملرد تەڭگە. مەردىگەر ۇيىم استانادا تىركەلگەن. كۇردەلى جوندەۋگە بايلانىستى جوبا ينفراقۇرىلىمدى جاڭعىرتۋمەن قاتار اۋرۋحانانى جاڭا مەديتسينالىق جابدىقتارمەن جاراقتاندىرۋدى دا قامتيدى, جالپى وسىنداي مىسالدار جەتكىلىكتى.
تۇتاستاي العاندا, مەملەكەتتىك ساتىپ الۋدى جۇزەگە اسىرۋدىڭ جاڭا ءتارتىبى كونكۋرستى وتكىزۋ مەرزىمىن قىسقارتىپ, قىزمەت كورسەتۋشىلەرگە ساتىپالىمعا قاتىسۋعا تەڭدەي مۇمكىندىكتەر بەردى, سونداي-اق جەرگىلىكتى كومپانيالاردى قاجەتتى جۇمىسپەن قامتاماسىز ەتتى.