پولشا قۇقىق قورعاۋ ورگاندارى ادام اعزالارىن زاڭسىز ساۋدالاۋمەن اينالىسقان حالىقارالىق قىلمىستىق توپتىڭ قىزمەتىنە قاتىسى بار دەگەن كۇدىكپەن 35 جاستاعى قازاقستان ازاماتىن ۇستادى, دەپ حابارلايدى Egemen.kz Polisia.kz-كە سىلتەمە جاساپ.
قر ىشكى ىستەر مينيسترلىگىنىڭ ينتەرپول ۇلتتىق ورتالىق بيۋروسىنىڭ سۇرانىسى بويىنشا ايەل ۋكراينا-پولشا شەكاراسىنداعى تەمىرجول وتكىزۋ پۋنكتىندە ۇستالعان. ول 2020 جىلدان بەرى حالىقارالىق ىزدەۋدە بولعان.
تەرگەۋ مالىمەتتەرىنە سايكەس, 2017-2018 جىلدارى قىلمىستىق توپ قازاقستانداعى مەديتسينالىق مەكەمەلەردە زاڭسىز ترانسپلانتاتسيا وپەراتسيالارىن ۇيىمداستىرعان. بۇل زاڭسىز ارەكەتتەرگە يزرايل, ۋكراينا, قىرعىزستان, تاجىكستان جانە وزبەكستان ازاماتتارى دا تارتىلعان.
كۇدىكتى دونورلار مەن رەتسيپيەنتتەردى قابىلداۋ, ولاردىڭ مەديتسينالىق تەكسەرىستەن ءوتۋىن ۇيىمداستىرۋ, شىعىنداردى وتەۋ جانە قۇپيالىلىقتى ساقتاۋ جۇمىستارىمەن اينالىسقان. سونداي-اق دونورلارعا رەتسيپيەنتتەرمەن تۋىستىق بايلانىستارى تۋرالى جالعان اقپاراتتى جاتتاتقىزعان.
قازىرگى ۋاقىتتا كۇدىكتىنى ەلگە ەكستراديتسيالاۋ ماسەلەسى قاراستىرىلىپ, تەرگەۋ امالدارى جالعاسىپ جاتىر.