سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى ء«جاسوسپىرىم قىزداردىڭ قۇقىعىن قورعاۋ, ەرتە جۇكتىلىكتىڭ الدىن الۋ» اتتى دوڭگەلەك ۇستەل وتكىزدى.
كوميتەت توراعاسى نۇرتورە ءجۇسىپ ءوز سوزىندە ءجاسوسپىرىم قىزداردىڭ جۇكتىلىگى پروبلەماسى كەشەندى ءتاسىلدى تالاپ ەتەتىن قۇقىقتىق جانە الەۋمەتتىك وتكىر ماسەلە ەكەنىن اتاپ ءوتتى. ونىڭ ايتۋىنشا, ەرتە انا بولۋ جاس انالار مەن ولاردىڭ بالالارىنىڭ دەنساۋلىعىنا كەرى اسەرىن تيگىزەدى, ءبىلىم الۋ مەن تولىققاندى دامۋ مۇمكىندىكتەرىن شەكتەيدى.
ء«بىزدىڭ دوڭگەلەك ۇستەل ءجاسوسپىرىم قىزداردىڭ قۇقىقتارىن قامتاماسىز ەتۋ جونىندە اتقارىلعان جانە الداعى جۇمىستاردى تالقىلاۋعا باعىتتالعان. پروفيلاكتيكالىق شارالاردى كۇشەيتۋ, جاستاردىڭ حاباردارلىق دەڭگەيىن ارتتىرۋ, جاسوسپىرىمدەرگە دارىگەرلىك جانە پسيحولوگيالىق قىزمەتتەردىڭ قولجەتىمدىلىگىن جاقسارتۋ باسىم مىندەتتەردىڭ قاتارىنا جاتادى. مەكەمەارالىق ءوزارا ءىس-قيمىلدىڭ ءتيىمدى تەتىكتەرىن ازىرلەۋ دە ماڭىزدى. ول وسى ماسەلەنى كەشەندى تاسىلمەن شەشۋدى قامتاماسىز ەتۋگە مۇمكىندىك بەرەدى», دەدى ن.ءجۇسىپ.
وتىرىس بارىسىندا رەپرودۋكتيۆتى دەنساۋلىق بويىنشا ءبىلىم باعدارلامالارىنىڭ ساپاسىن ارتتىرۋ ماسەلەلەرى, جاسوسپىرىمدەر جۇكتىلىگىنىڭ الدىن الۋداعى مەملەكەتتىك جانە ۇكىمەتتىك ەمەس ۇيىمداردىڭ ءرولى, سونداي-اق ءجاسوسپىرىم قىزداردى قولداۋ ءۇشىن قولايلى جاعداي جاساۋ جونىندەگى شارالار تالقىلاندى.
قاتىسۋشىلار كامەلەتكە تولماعانداردىڭ قۇقىقتارىن قورعاۋ جۇمىستارى تۇراقتى نەگىزدە جۇرگىزىلىپ جاتقانىن اتاپ ءوتتى. بۇل باعىتتا مەملەكەتتىك قۇرىلىمدار عانا ەمەس, سونىمەن قاتار قوعامدىق ۇيىمدار, ساراپشىلار قاۋىمداستىعى جانە حالىقارالىق ارىپتەستەر دە ەرەكشە ءرول اتقارادى.
قاتىسۋشىلار دوڭگەلەك ۇستەلدى قورىتىندىلاي كەلىپ, زاڭ ەرەجەلەرىن جەتىلدىرۋ, اعارتۋشىلىق باستامالاردى دامىتۋ جانە ومىردە قيىن جاعدايعا تاپ بولعان جاسوسپىرىمدەردى قولداۋ جۇيەسىن كەڭەيتۋ جونىندەگى جۇمىستى ودان ءارى جالعاستىرۋ قاجەتتىگىن اتاپ ءوتتى.