كوكتەمگە ىلەسە كەلەتىن قىز-كەلىنشەكتەر مەرەكەسىنە وراي ماڭعىستاۋ اۋدانىندا كەلىندەر ءوزارا سايىسقا ءتۇستى. «پاي, پاي, قازاقتىڭ كەلىندەرى-اي!» تاقىرىبىمەن وتكەن بايقاۋعا اۋدانداعى ءار اۋىلدان ءبىر كەلىن قاتىسىپ, وزدەرىنىڭ ونەرى مەن شەبەرلىگىن, ءتالىمى مەن تاربيەسىن ورتاعا سالدى.
قازاق حالقىنىڭ سالت-ءداستۇرىن دارىپتەپ, كەلىندەر ينستيتۋتىنىڭ ماڭىزدىلىعىن ناسيحاتتاۋ ماقساتىندا ۇيىمداس-تىرىلعان بايقاۋ بىرنەشە بولىمنەن تۇردى, ءاربىر كەزەڭدە قاتىسۋشىلار جان-جاقتى دايىندىقتارىن كورسەتتى.
«مەن – قازاقتىڭ كەلىنىمىن» تانىستىرۋ بولىمىندە ولار وزدەرىن تانىستىرىپ, وتباسى, اتا-ەنەسى, تۇرمىس قۇندىلىقتارى تۋرالى اسەرلى اڭگىمەلەرىن جەتكىزدى. كەلىننىڭ يباسى مەن يناباتتىلىعى وسى كەزەڭنەن-اق كورىندى. سايىستىڭ «ونەرلى كەلىن – ونەگەلى كەلىن» كەزەڭىندە ءار كەلىن ءوز قابىلەتىن كورسەتىپ, ءبىرى اۋەلەتە ءان سالسا, ەندى ءبىرى مىڭ بۇرالا بي بيلەپ, مونولوگ, ولەڭ وقىپ كورەرمەندەردىڭ ىقىلاسىنا بولەندى. قاتىسۋشى كەلىندەر ءۇشىنشى كەزەڭدە قازاقتىڭ ۇلتتىق تاعامدارىن دايىنداۋ شەبەرلىگىنەن سىنعا ءتۇستى. بۇل كەزەڭدە كەلىندەر باۋىرساق, تابا نان, ۇمىت بولىپ بارا جاتقان تاعامداردى ازىرلەپ, قازىلار تالقىسىنا ۇسىندى. كەلىننىڭ وتباسىنداعى, قوعامداعى ءرولىن باعالاۋ, تاپقىرلىعى مەن كورەگەندىگىن سىناۋ ماقساتىندا ءارتۇرلى تۇرمىستىق جاعدايلار ۇسىنىلىپ, ولاردىڭ شەشۋ جولدارى سۇرالدى. سونداي-اق كەلىندەرگە جارتىلاي ايتىلعان ماقالدى تولىقتىرۋ تاپسىرماسى بەرىلۋ ارقىلى ولاردىڭ ءتىل بايلىعى مەن ۇلتتىق مۇراعا دەگەن قۇرمەتى كورىندى.
ءاربىر قاتىسۋشى ءوزىنىڭ ونەرىمەن, شەبەرلىگىمەن ەرەكشەلەندى.
باس جۇلدەنى جىڭعىلدىلىق ريمما قورعانباەۆا السا, ءبىرىنشى ورىن ۇشتاعاندىق اندىز نۇرلىبەكوۆاعا, ەكىنشى ورىن سايوتەستىك فاتيما ارالباەۆاعا بۇيىردى, ءۇشىنشى ورىندى وڭدىلىق رايگۇل كوسەموۆا مەن تۇششىبەكتىك نۇرزادا ەدىلباەۆا بولىسسە, «كورەرمەن كوزايىمى» اتالىمى شەتپەلىك ايدانا بەكتاسوۆاعا بۇيىردى. بايقاۋعا قاتىسقان كەلىندەردىڭ بارلىعى ديپلومدارمەن جانە باعالى سىيلىقتارمەن ماراپاتتالدى.
«بۇل ءىس-شارا تەك جارىس قانا ەمەس, اۋداندىق ايەلدەر ىستەرى جانە وتباسى-دەموگرافيالىق ساياسات جونىندەگى كوميسسيا جوسپارىنا ساي قازاقتىڭ وتباسى قۇندىلىقتارىن, كەلىن تاربيەسىنىڭ ماڭىزدىلىعىن دارىپتەگەن ءمانى زور مەرەكە بولدى. وسىنداي يگى داستۇرلەر جالعاسىن تاۋىپ, ۇرپاقتار ساباقتاستىعى ۇزىلمەسىن» دەيدى ۇيىمداستىرۋشىلار.
ماڭعىستاۋ وبلىسى