39 جاستاعى اقتوبە قالاسىنىڭ تۇرعىنى ءمىناۋرا مۇحتاروۆا جۋىردا ون ءبىرىنشى پەرزەنتىن دۇنيەگە اكەلدى. سالماعى – 3 680 گرامم, بويىنىڭ ۇزىندىعى 57 سم بولىپ تۋعان سابيگە حانتورە ەسىمى بەرىلدى.
وتاعاسى ايدىن رامازانوۆ قالاداعى قۇرىلىس كومپانيالارىنىڭ بىرىندە كولىك جۇرگىزۋشىسى بولىپ ەڭبەك ەتەدى. ءمىناۋرانىڭ ماماندىعى – مۇعالىم. ەندى وتباسىندا حانتورەنى قوسقاندا, جەتى ۇل, ءتورت قىز بار. رامازانوۆتاردىڭ تۇڭعىشى 17 جاستا. ءمىناۋرا ون ءبىرىنشى ءسابيىن ءوزىنىڭ تۋعان كۇنىندە ومىرگە اكەلدى. ولار قالانىڭ ەسەت باتىر شاعىن اۋدانىنداعى كوپقاباتتى ۇيدە تۇرادى.
قاسيەتتى رامازان ايىندا دۇنيەگە كەلگەن ءسابيدى اناسىمەن بىرگە 6 ناۋرىزدا پەرزەنتحانادان شىعاردى. كوپبالالى انانى وبلىستىق پەريناتالدىق ورتالىقتىڭ دارىگەرلەرى سالتاناتپەن شىعارىپ سالدى.
اقتوبە وبلىسى