پرەزيدەنت يتاليا دەلەگاتسياسىنا ءىلتيپات بىلدىرە وتىرىپ, بۇگىنگى كەزدەسۋ ءوزارا مۇددەگە ساي كەلەتىن ەكىجاقتى قاتىناستاردىڭ ماڭىزدى اسپەكتىلەرىن تالقىلاۋ ءۇشىن وڭتايلى مۇمكىندىك ەكەنىن ايتتى, دەپ حابارلايدى Egemen.kz اقپارات اگەنتتىگى.
– يتالياعا بىلتىرعى ساپارىمنان جاقسى اسەر الدىم. ءسىزدىڭ قوناقجايلىق تانىتىپ, ناتيجەلى كەلىسسوز جۇرگىزۋگە بارىنشا جاعداي جاساعانىڭىزدىڭ ارقاسىندا ساپارىم وتە ءساتتى ءوتتى. ەكى مەملەكەت ءتۇرلى سالادا تىعىز قارىم-قاتىناس ورناتقان. ءبىزدىڭ نارىقتا ءبىراز يتاليالىق كومپانيا جۇمىس ىستەيدى. ولاردىڭ قاتارى قارقىندى ارتىپ كەلەدى. مادەني-گۋمانيتارلىق بايلانىستارىمىز دا ويداعىداي دامىپ جاتىر. سوندىقتان ەلدەرىمىزدىڭ اراسىندا بەرىك ىنتىماقتاستىق قالىپتاسقان دەپ سانايمىن, – دەدى قاسىم-جومارت توقاەۆ.
يتاليا پرەزيدەنتى قۇشاق جايا قارسى العانى ءۇشىن ريزاشىلىعىن ءبىلدىرىپ, بۇل كەزدەسۋ ەكى ەل اراسىنداعى شىنايى دوستىقتىڭ كورىنىسى ەكەنىن ايتتى. سونداي-اق ول ەكىجاقتى قاتىناستاردىڭ قازىرگى جاعدايىن جوعارى باعالاپ, ءوزارا ستراتەگيالىق سەرىكتەستىكتى كەڭەيتۋگە مول مۇمكىندىك بار ەكەنىن اتاپ ءوتتى.
– ءبىز شىن مانىندە بارلىق باعىتتا, سونىڭ ىشىندە ساياسي, ەكونوميكالىق, ساۋدا جانە مادەني سالالاردا تاماشا بايلانىس ورناتتىق, – دەدى سەردجو ماتتارەللا.
اڭگىمەلەسۋ بارىسىندا پرەزيدەنتتەر ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋ پەرسپەكتيۆاسىن ەگجەي-تەگجەيلى تالقىلادى.
مەملەكەت باسشىسىنىڭ ايتۋىنشا, يتاليا قازاقستاننىڭ باستى ساۋدا سەرىكتەستەرىنىڭ اراسىندا ءۇشىنشى ورىن الادى, سونداي-اق ەكونوميكامىزعا قارجى قۇيعان بەس ءىرى ينۆەستوردىڭ قاتارىنا كىرەدى. وتكەن جىلدىڭ قورىتىندىسى بويىنشا ءوزارا ساۋدا اينالىمى 20 ميلليارد دوللارعا جۋىقتاعان. قازاقستاندا كاسىبىن جۇرگىزەتىن 250-گە تارتا يتاليالىق كومپانيا مۇناي-گاز, جاڭارتىلاتىن ەنەرگيا, ماشينا جاساۋ جانە اۋىل شارۋاشىلىعى سالالارىنىڭ دامۋىنا ەلەۋلى ۇلەس قوسىپ كەلەدى.
بۇدان بولەك, مەملەكەتتەر باسشىلارى جاھاندىق كۇن تارتىبىندەگى وزەكتى ماسەلەلەر جونىندە پىكىر الماستى.