شيەلى اۋدانى ورتالىعى مەن اۋىلدارىندا تۇراتىنداردىڭ كوپشىلىگى كولىگىنىڭ اككۋمۋلياتورىنان اقاۋ بايقالىپ, دوڭگەلەگى سىر بەرسە بىردەن نۇرجامال وماروۆانى ىزدەيدى. بۇل ءىس تەك ەر ادامعا ءتان جۇمىس ەمەستىگىن دالەلدەپ جۇرگەن كەيىپكەرىمىز كۇنىنە ون شاقتى كولىكتىڭ دوڭگەلەگىن جوندەپ بەرەدى.
جاڭاقورعاندىق سابىرحان احانوۆ پەن نۇرجامال وماروۆا كوڭىل جاراستىرىپ, شاڭىراق قۇرعان سوڭ جۇمىس بابىمەن شيەلى كەنتىنە كوشىپ كەلەدى. كوپ كەشىكپەي-اق ونسىز دا كوبەسى سوگىلىپ تۇرعان كەڭەس وداعى قۇلاپ, ناعىز «بالاپان – باسىنا, تۇرىمتاي – تۇسىنا» دەيتىن زامان باستالىپ كەتتى. وسى تۇستا ازاماتى سابىرحان بەلدى بۋىپ, جان-جاقتان قۇرىلعى الدىرىپ, اۋدان ورتالىعىندا العاشقىلاردىڭ ءبىرى بولىپ دوڭگەلەك جەلىمدەيتىن ورتالىق اشتى. «ەڭبەك ەپتىلىكتى سۇيەدى» دەگەن. از جىلدا شارۋاسى وڭعا باسقان ولاردى كەنتتەن بولەك اۋىلداردان دا ىزدەپ كەلەتىندەر كوبەيدى. بىراق 2012 جىلى سابىرحان اياقاستى اۋىرىپ, وتباسىلىق كاسىپ توقىراپ قالعانداي بولىپ ەدى. سول تۇستا اۋداندىق مادەنيەت ۇيىندەگى جۇمىسىن تاستاعان نۇرجامال كولىك جوندەۋ ورتالىعىنىڭ جۇمىسىن جالعاستىرىپ اكەتتى.
«جۇمىستىڭ بارىسىن كورگەن بولەك تە, ءوزىڭ قولعا الىپ ىستەگەن ءبىر باسقا. باستاپقىدا كليەنتتەر قىزىقتاپ قاراپ تۇرعاندا قولىم جۇرمەي, قينالعانىم راس. كەيىن ۇيرەنىپ كەتتىم. ءتىپتى وسى كۇنگە دەيىن «اككۋمۋلياتور ىستەيتىن بالا كەرەك ەدى», «دوڭگەلەكتى تەڭەستىرىپ بەرەتىن ماماندى شاقىرساڭىز» دەپ كەلەتىن بەيتانىستار بار. وندايدا بىردەن جۇمىسقا كىرىسىپ كەتەمىن, كليەنتتەر «اپاي, شىنىمەن ءسىز ىستەيسىز بە؟» دەپ تاڭعالىپ سۇراپ جاتادى. كەزىندە زىلدەي دوڭگەلەكتەردى ازەر كوتەرەتىنبىز. ونى قولمەن اشۋدىڭ اۋىرلىعى ءبىر بولەك اڭگىمە. كەيىن تەحنولوگيا جاڭارىپ, جۇمىس الدەقايدا جەڭىلدەدى. اۋەلگىدە قىزدارىم قولعابىس ەتتى, قازىرگى كومەكشىم – ۇلىم. ولار دا وسى كاسىپتىڭ قىر-سىرىن ۇيرەنىپ ءوستى», دەيدى ن.وماروۆا.
ادەتتە مۇندا كوكتەم مەن كۇزدىڭ قىسقا ۇلاسار شاعىندا جۇمىس قىزا تۇسەدى. دوڭگەلەك اۋىستىرۋعا كەلگەن ءار كليەنتتىڭ تاپسىرىسىن مۇلتىكسىز اتقاراتىن مامان ولاردىڭ ءاردايىم امان جۇرۋىنە تىلەكشى بولىپ وتىرادى. شۇكىر, وسى ۋاقىتقا دەيىن جۇرتتىڭ رەنىشىن ەستىگەن كەزى جوق. قايتا كەيدە وزىنەن اقىل سۇراپ كەلەتىندەر كوپ. ولار اكەلگەن اۋىر تەحنيكانىڭ دوڭگەلەگىن جەلىمدەۋدىڭ جولدارىن كورسەتىپ, بىلگەنىن ۇيرەتەدى.
«قازىر كوپ بالالار جۇمىس ىزدەپ, شەتەلگە كەتىپ جاتىر. كوزىن تاپساڭ ەلدە دە اتقارار شارۋا از ەمەس. بىراق «اۋىردىڭ ۇستىمەن, جەڭىلدىڭ استىمەن» ءجۇرۋدى ادەت ەتكەن قازىرگىلەر باللون, كامەرا جاماۋ, اككۋمۋلياتور جوندەۋ سەكىلدى كاسىپتەن التى شاقىرىم اۋلاق جۇرەدى. قاراپ وتىرساڭىز, سولاردىڭ كوبىنىڭ الەۋمەتتىك جەلىدەن باسقا ەرمەگى جوق. سونىڭ سوڭىنا تۇسكەندەردىڭ ميلليوندار ۇستاپ جىرعاپ وتىرۋىنان قولىنداعىسىنان قيداي سىپىرىلىپ ايىرىلىپ قالۋى تەز. بۇل ەندى بەينەتسىز بەرەكە كىرمەيتىنىنىڭ بەلگىسى. سونى ايتاتىن ۇلكەندەر از ەمەس, بىراق ۇعىنا قوياتىن جاس تا بولماي تۇر... جولداسىم اۋىرىپ, بار ءىس ماعان قاراپ قالعان كەزدە قىزدارىم كومەكتەستى. ولار اكەسىنىڭ قاسىندا ءجۇرىپ كورگەنىن كوكەيلەرىنە تۇيە بەرىپتى. ۇيدەگى بەس بالا دا ەڭبەككە بەيىم بولىپ وسكەنىنە شۇكىرلىك ايتامىن», دەيدى كەيىپكەرىمىز.
شۇكىر, وسى كاسىپپەن ءجۇرىپ بالالاردى جەتىلدىردى. قازىر ولاردان تاراعان 14 نەمەرەنىڭ ورتاسىنداعى باقىتتى اجە. ءتۇرلى مەرەكەلەردە جەرگىلىكتى اكىمدىك سالتاناتتى كەشتەردەن قالدىرماي, قۇرمەت كورسەتەدى. جاقىندا عانا وتكەن سونداي ءبىر جيىندا «ىسكەر كوشباسشى» اتالىمىمەن ماراپاتتالدى. بۇل دا بولسا ەڭبەكپەن شىققان ءتوردىڭ قاشاندا بيىك بولاتىنىنىڭ دالەلى.
قىزىلوردا وبلىسى,
شيەلى اۋدانى