قاسىم-جومارت توقاەۆ 8 ناۋرىز مەرەكەسىنە ارنالعان سالتاناتتى جيىندا ايەلدەردىڭ لاۋازىمدى قىزمەتتەردى جاۋاپكەرشىلىكپەن اتقارىپ جۇرگەنىن جەتكىزدى, دەپ جازادى Egemen.kz.
«مەملەكەتتىك قىزمەتشىلەردىڭ جارتىسىنان كوبى – ايەلدەر. ءبىلىم بەرۋ, دەنساۋلىق ساقتاۋ سالاسىنداعى مامانداردىڭ 70 پايىزدان استامى دا – ايەلدەر قاۋىمى. سونداي-اق ولار توتەنشە جاعدايلار, قورعانىس جانە قۇقىق قورعاۋ ورگاندارىندا تابىستى جۇمىس ىستەپ ءجۇر. كوپتەگەن ايەلدەر لاۋازىمدى قىزمەتتەر اتقارادى, سىزدەردىڭ ارالارىڭىزدا دا تابىستى باسشىلار از ەمەس. قىز-كەلىنشەكتەر بيزنەستە دە جەتىستىككە جەتىپ ءجۇر.بويلارىڭىزداعى ماقساتكەرلىك پەن جاسامپازدىق قۋاتى ەڭ باتىل باستامالارىڭىزدى جۇزەگە اسىرۋعا كومەكتەسىپ كەلەدى. بەرىك ازاماتتىق ۇستانىمدارىڭىزدى تانىتىپ, قوعامدىق جۇمىسقا دا جان-جاقتى اتسالىساسىزدار. ماڭىزدى باستامالار مەن حالىققا قاجەتتى الەۋمەتتىك جوبالاردى ىسكە اسىرىپ جۇرسىزدەر. قاي ىسپەن اينالىسساڭىزدار دا جاۋاپكەرشىلىكپەن قاراپ, ۇدايى وڭ ناتيجەگە قول جەتكىزىپ كەلەسىزدەر», دەدى مەملەكەت باسشىسى.
«قازاقستاننىڭ ەڭبەك سىڭىرگەن قۇرىلىسشىسى», «قازاقستاننىڭ ەڭبەك سىڭىرگەن ونەركاسىپ قايراتكەرى» قۇرمەتتى اتاقتارى العاش رەت تابىستالدى. «الەمدىك دودالاردا توپ جارىپ, ەلىمىزدىڭ ابىرويىن اسقاقتاتىپ جۇرگەن ارۋلارىمىز دا بار. ءبىز قاجىرلى ەڭبەگىمەن, ەرەن ەرلىگىمەن تانىلعان قىز-كەلىنشەكتەردى ماقتان تۇتامىز. تاۋەلسىزدىك جىلدارى ءوز سالاسىنىڭ ۇزدىگى اتانعان 8 ايەلگە «قازاقستاننىڭ ەڭبەك ەرى» اتاعى بەرىلدى.بيىل ەلىمىزدە – «جۇمىسشى ماماندىقتارى جىلى». قازىر وسى سالاداعى بىلىكتى مامانداردىڭ مارتەبەسىن كوتەرۋ ءۇشىن بەلسەندى جۇمىس جۇرگىزىلىپ جاتىر. مىسالى, مەملەكەتتىك ماراپاتتار جۇيەسىنە جاڭادان 9 قۇرمەتتى اتاق ەنگىزىلدى. بۇگىن وسىنداي ەكى ماراپات العاش رەت تاپسىرىلادى.«قازاقستاننىڭ ەڭبەك سىڭىرگەن قۇرىلىسشىسى» اتاعى ەڭبەك ارداگەرى ولگا شەلۋدكوعا بەرىلەدى.ال ءوندىرىس وزاتى مايرا ەرمانوۆا «قازاقستاننىڭ ەڭبەك سىڭىرگەن ونەركاسىپ قايراتكەرى» اتانىپ وتىر.وسىنداي ناعىز ەڭبەك ادامدارىنا بۇكىل ەل بولىپ قۇرمەت كورسەتىپ, ولاردى جان-جاقتى دارىپتەۋىمىز كەرەك. جۇمىسشى ماماندىقتارى جىلىنىڭ تۇپكى ءمانى دە – وسى», دەپ اتاپ وتتى قاسىم-جومارت توقاەۆ.
سالتاناتتى جيىن سوڭىندا پرەزيدەنت ءتۇرلى سالادا تابىستى ەڭبەك ەتىپ جۇرگەن ءبىر توپ قىز-كەلىنشەككە جوعارى مەملەكەتتىك ناگرادالار تاپسىردى.