ءجۇزىنشى جۇرەك ترانسپلانتاتسياسى

فورۋمعا دەنساۋلىق ساقتاۋ ءمينيسترى اقمارال ءالنازاروۆا, «University Medical Center» باسقارما توراعاسى يۋري پيا, رەس­پۋبليكالىق ترانسپلانتاتسيانى ۇي­لەس­­تىرۋ ورتالىعىنىڭ ديرەكتورى اي­دار سيت­كازينوۆ باستاعان سالا بىلگىر­لەرى قاتىستى. ا.ءالنازاروۆا ترانسپلان­تولوگيانىڭ دامۋ باعىتى تۋرالى باياندادى.

– ءجۇزىنشى جۇرەك ترانسپلانتاتسيا­سى سالانىڭ ودان ءارى دامۋىنا سەرپىن بەرىپ قانا قويماي, حالىقتىڭ مايىتتىك دونورعا دەگەن كوزقاراسىن وزگەرتۋ ءۇشىن كەشەندى ستراتەگيا قالىپتاستىرۋدىڭ ماڭىزدى ەكەنىن كورسەتەدى. ەلىمىزدە ترانسپلانتولوگيانى دامىتۋعا بارلىق جاع­داي جاسالعان. زاماناۋي جابدىقتال­عان ترانسپلانتاتسيالىق ورتالىقتار بار. جوعارى بىلىكتى ترانسپلانتولوگتەر جۇ­مىس ىستەيدى. دونورلىق پەن ترانسپلانتا­تسياعا قاتىستى نورماتيۆتىك-قۇقىقتىق بازا بەكىتىلگەن. دەگەنمەن بۇل سالانى دەن­ساۋلىق ساقتاۋ مينيسترلىگى مەن مە­دي­تسينالىق ۇيىمدار قوعامنىڭ قولداۋىنسىز دامىتا المايدى. دونور­لىق­قا كەلىسىم بەرۋ قارا جامىلعان وتباسىعا دا قيىن. ايتكەنمەن دونورلىق مادەنيەتتى قالىپتاستىرۋ, ءبىر-ءبىرىمىزدى قولداۋ – قوعامنىڭ ورتاق مىندەتى دەپ بىلەمىز,– دەدى مينيستر.

ەلدە دونورلىق جۇرەكتى ترانسپلانتاتسيالاۋ وپەراتسياسى العاش 2012 جىلى 8 تامىزدا UMC جۇرەك ورتالىعىندا جاسالعان. سول كەز وپەراتسياعا كلينيكانىڭ نەگىزىن قالاۋشى يۋري پيا مەن چەحيانىڭ تانىمال كارديوحيرۋرگى يان پيرك قاتىستى. دەنساۋلىق ساقتاۋ سالاسىنداعى بۇل باتىل قادام ترانسپلانتولوگيانىڭ دامۋىنا جول اشىپ, حالىقتىڭ دونور دەگەن كوزقاراسىنا وڭ اسەر ەتتى. ەلدە العاش رەت جۇرەك ترانسپلانتاتسياسىن جاساتىپ, امان قالعان رەتسيپيەنت بۇگىندە دەنى ساۋ, بەلسەندى ءومىر سۇرەدى. ەلىمىزدە جۇرەك ترانسپلانتاتسياسىن كۇتىپ وتىرعاندار تىزىمىندە 142 ناۋقاس بار. ونىڭ ىشىندە بەسەۋى – بالا. دونورلىق ترانسپلانتاتسيا جىلدان-جىلعا دامىپ, وپەراتسيا كوبەيىپ كەلەدى. الايدا بۇل ءتىزىم دونورىن كۇتە الماي قايتىس بولعان ناۋقاستاردىڭ ەسەبىنەن دە قىسقارعان.

دارىگەرلەردىڭ ايتۋىنشا, ەلدە الەۋەتتى دونور تاپشىلىعى جوق. جىل سايىن شامامەن 300 ادامنىڭ مي ءولىمى تىركەلسە, ولاردىڭ ترانسپلانتاتسياعا جارامدى اعزالارى ساۋ كۇيىندە قالا بەرەدى. ەگەر دونوردىڭ تۋىستارى مەديتسينالىق كورسەتكىشتەرگە سايكەس كەلەتىن جاعدايدا كەلىسىم بەرسە, ءبىر دونوردىڭ ورگاندارىمەن 5-6 ادامنىڭ ءومىرىن ساقتاپ قالۋعا بولار ەدى. 100-ترانسپلانتاتسيا وپەراتسيا­سىنا كىرگەن ناۋقاس سوزىلمالى جۇرەك جەتكىلىكسىزدىگىمەن اۋىرعان. 53 جاستاعى ەر ادام ءتورت جىل مەحانيكالىق جۇرەك قولداۋ قۇرىلعىسىمەن ءومىر سۇرگەن.

«University Medical Center» باسقار­ما توراعاسى, ەلىمىزدىڭ جەتەكشى كارديو­حيرۋرگى يۋري پيا ترانسپلانتاتسيا مەديتسيناسى كەز كەلگەن ەلدىڭ دامىعانىن ايقىندايتىن ماڭىزدى كورسەتكىشتەردىڭ ءبىرى ەكەنىن اتاپ ءوتتى.

– جۇرەك ترانسپلانتاتسياسىنىڭ باسقا ورگانداردىڭ ترانسپلانتاتسياسىنان ايىرماشىلىعى – تەك مايىتتىك دونور ارقىلى ىسكە اسادى. اقش-تىڭ بۇرىنعى ۆيتسە-پرەزيدەنتى ريچارد چەيني جۇرەك اۋرۋىنا بايلانىستى ەمدەۋدىڭ بىرنەشە كەزەڭىنەن ءوتتى. وعان كورونارلىق ارتەريالاردى ستەنتتەۋ, شۋنتتاۋ جاسالدى. جۇرەك جەتكىلىكسىزدىگى دامىعان كەزدە جاساندى سول جاق قارىنشا يمپلانتاتسيالاندى. 2012 جىلى 70 جاسىندا وعان دونورلىق جۇرەك ترانسپلانتاتسياسى جا­سال­دى. كەيىن كارديولوگتەرمەن بىرگە «جۇ­رەك» اتتى كىتاپ جازدى. وندا ادام ءومى­­رى­ن­ىڭ ەڭ ۇلكەن قۇندىلىعى – باسقا ادام­عا ءومىر سىيلاۋ مۇمكىندىگى ەكەنى جازىل­عان. ەلىمىزدە ءجۇزىنشى جۇرەك ترانس­پ­لانتا­تسياسىنىڭ جاسالۋى – ومىرگە, ءبىر-بىرىم­ىزگە دەگەن كوزقاراستىڭ وزگەرۋى, – دەيدى يۋ.پيا.

جۇرەك ترانسپلانتاتسياسىنىڭ ءجۇزىن­شى وپارەتسياسىنا ارنالعان فورۋمدا «Heart Center Foundation» قوعامدىق قورى «University Medical Center»-مەن بىرلەسىپ, ەلدە ترانسپلانتولوگيانىڭ دامۋىنا ۇلەس قوسقان ماماندار مەن ۇيىمداردى «100 جۇرەك ترانسپلانتاتسيا­سى» ەستەلىك مۇسىندەرىمەن ماراپاتتادى. قوناقتار دونورلىق اعزالاردى ۇزاق مەرزىم ساقتاۋعا, ەمدەۋگە, تاسىمالداۋعا ارنالعان «Alem» يننوۆاتسيالىق قۇرىل­عىسىنىڭ تانىستىرىلىمىن تاماشالادى. مەديتسينادا مۇمكىندىگى مول, اسا قاجەت قۇرىلعىنى وتاندىق عالىمدار ازىرلەگەن.