ۇلتتىق مۋزەيدە مادەنيەت جانە اقپارات مينيسترلىگىنىڭ قولداۋىمەن مىرجاقىپ دۋلات ۇلىنىڭ 140 جىلدىعىنا ارنالعان «قازاق رۋحىن وياتقان تۇلعا» اتتى كورمە مەن دوڭگەلەك ۇستەل ءوتتى.
القالى جيىنعا بەلگىلى عالىمدار, مەملەكەت جانە قوعام قايراتكەرلەرى, اقىننىڭ تۋىستارى, قوستاناي وبلىسىنىڭ دەلەگاتسياسى مەن استانا قالاسىنداعى م.دۋلات ۇلى اتىنداعى مەكتەپ مۇعالىمدەرى مەن وقۋشىلارى قاتىستى.
ءىس-شارا تىزگىنىن ۇستاعان ۇلتتىق مۋزەي ديرەكتورى بەرىك ابدىعالي ۇلى الاش ارىسىنىڭ ۇلتقا سىڭىرگەن ەڭبەگى تۋرالى ايتا كەلە, 140 جىلدىق مەرەيتويىن مەملەكەتتىك دەڭگەيدە اتاپ ءوتۋدىڭ ماڭىزىنا توقتالدى.
سونداي-اق قوستاناي وبلىسى اكىمىنىڭ ورىنباسارى ارمان ابەنوۆ مەرەيلى داتانىڭ اياسىندا توبىل – تورعاي وڭىرىندە الاش ارىسىنىڭ ەلگە سىڭىرگەن ەڭبەگىن اتاپ ءوتىپ, مۇراسىن حالىق اراسىندا ناسيحاتتاۋعا باعىتتالعان 140 ءىس-شارا ۇيىمداستىرىلاتىنىن جەتكىزدى.
جيىن بارىسىندا ءسوز العان ادەبيەتشى, تاريحشى عالىمدار م.دۋلات ۇلىنىڭ قازاق تاريحىنداعى ءرولىن, ونىڭ الاش قوزعالىسىنا بەلسەندى قاتىسۋىن, ۇلت تاۋەلسىزدىگى مەن ۇلتتىق سانا-سەزىمىن دامىتۋداعى ەڭبەگىن كەڭىنەن تالدادى. سونداي-اق ونىڭ تاريحي كوزقاراستارى مەن ساياسي كۇرەستەرىنىڭ قازاق حالقىنىڭ بولاشاق تاريحى ءۇشىن ۇلكەن ماڭىزعا يە ەكەنىن ايتتى. « ۇلى دالا وركەنيەتى كۇيرەپ جاتقان كەزدە اقىن-جىرشىلار مەملەكەتتىلىگىمىزدەن ايىرىلىپ, بودان بولدىق دەپ جۇرگەندە, ۇلتىمىزدىڭ رۋحاني جاڭعىرۋىن جاساعان وسى الاش زيالىلارى ەدى. مىرجاقىپ سىندى قايراتكەرلەر – قازاقتى ساپالى ۇلتقا اينالدىرعان تۇلعالار. «قازاق رۋحىن وياتقان تۇلعا» دەگەنىمىز – كوركەم ءسوز ەمەس, بۇل ناقتى فاكت», دەدى ءماجىلىس دەپۋتاتى ەركىن ءابىل.
اتالعان ءىس-شارا «تورعاي جانگەلدين مۋزەيلەر كەشەنى» كمم-مەن بىرلەسىپ ۇيىمداستىرىلىپ وتىر. ەكسپوزيتسيادا م.دۋلات ۇلىنىڭ وتباسىنا بايلانىستى جادىگەرلەر جۇرتشىلىق نازارىنا العاش رەت ۇسىنىلىپ وتىر. فوتو جانە ارحيۆ قۇجاتتارىمەن قاتار م.دۋلات ۇلى مەن ايەلى عاينيجامالدىڭ, بالالارى الىبەك پەن گۇلناردىڭ جەكە زاتتارى, سونداي-اق وتباسىندا قولدانعان تۇرمىستىق زاتتار بار.
كورمە ۇلتتىق مۋزەيدىڭ 6-قاباتىنداعى كورمە زالىندا 27 ساۋىرگە دەيىن جالعاسادى.