ورتالىق كوممۋنيكاتسيالار قىزمەتى الاڭىندا وتكەن «جوعارى سوت كەڭەسى جانىنداعى سوت ءجيۋريىنىڭ جۇمىسىنداعى جاڭا تاسىلدەر تۋرالى» اتتى ءباسپاسوز ءماسليحاتىندا سۋديالاردىڭ زاڭ بۇزىپ, ورەسكەل قاتەلىكتەر جىبەرۋ فاكتىلەرىن تەكسەرۋدىڭ جاڭا تەتىگى قولدانىسقا ەنگىزىلگەنى حابارلاندى.
جوعارى سوت كەڭەسى جانىنداعى سوت ءجيۋريى بارلىق سوت ساتىسىنداعى سۋديالارعا قاتىستى تارتىپتىك ىستەر مەن ماتەريالداردى قاراپ, تەكسەرۋگە ۋاكىلەتتىگى بار ورگان سانالادى. سوت ءجيۋريىنىڭ توراعاسى نۇرجان قايىپجان بىلتىر سۋديالاردىڭ تارتىپتىك جاۋاپكەرشىلىگىن كۇشەيتۋ ماقساتىندا زاڭناماعا تۇزەتۋلەر جاسالىپ, 2024 جىلدىڭ 1 قازانىنان باستاپ سۋديالار تاراپىنان زاڭدى ورەسكەل بۇزۋدىڭ بارلىق فاكتىسىن تەكسەرۋدىڭ جاڭا جۇيەسى قولدانىسقا ەنگىزىلگەنىن مالىمدەدى.
«اتالعان وزگەرىسكە بايلانىستى زاڭدى ورەسكەل بۇزۋ فاكتىسى انىقتالسا, جوعارى تۇرعان سوت ساتىسى (اپەللياتسيا نەمەسە كاسساتسيا) سۋديانى تارتىپتىك جاۋاپكەرشىلىككە تارتۋعا ۇسىنىس جاساپ, ول ءىس مىندەتتى تۇردە سوت ءجيۋريىنىڭ قاراۋىنا جىبەرىلەدى», دەدى سپيكەر.
بۇرىن سۋديالار تاراپىنان جاسالعان زاڭسىزدىقتار جوعارعى سوت توراعاسىنىڭ ۇسىنۋى نەمەسە جوعارعى جانە وبلىستىق سوتتاردىڭ جالپى وتىرىستارىنىڭ شەشىمدەرىمەن عانا قازىلار القاسىنا جىبەرىلەتىن. بۇل ءۇردىس تىم كۇردەلى بولعاندىقتان, ورەسكەل زاڭ بۇزۋشىلىق ورىن العان ىستەردىڭ باسىم بولىگى جاۋاپسىز قالاتىن.
«جاڭا جۇيە مۇنداي فاكتىلەردىڭ ءبارىن سوت ءجيۋريى قاراۋعا مۇمكىندىك تۋعىزادى. بۇل ءىس سوت تورەلىگىن ىسكە اسىرۋ ساپاسىن ارتتىرىپ, ازاماتتاردىڭ سۋديالارعا دەگەن سەنىمىن كۇشەيتەرى انىق», دەدى ن.قايىپجان.
سپيكەردىڭ ايتۋىنشا, قازىر سوت ءجيۋريىنىڭ قۇرامىندا جوعارعى سوتتىڭ 4, وبلىستىق سوتتاردىڭ 5, اۋداندىق دەڭگەيدەگى 4 سۋدياسى بار. بارلىق سوت ينستانتسياسى وكىلدەرىنىڭ پىكىرىن ەسكەرە وتىرىپ جاساقتالعان بۇل قۇرام نەعۇرلىم وبەكتيۆتى, سالماقتى شەشىمدەر قابىلدايدى.
ء«ىسى قارالعان سۋديا سوت ءجيۋريىنىڭ شەشىمدەرىمەن كەلىسپەگەن جاعدايدا جوعارى سوت كەڭەسىنە شاعىمدانا الادى. بۇل كەڭەس سۋديانىڭ دالەلدەرىن مۇقيات زەردەلەپ, سوت ءجيۋريىنىڭ جۇرگىزىپ جاتقان تارتىپتىك ءىسىن توقتاتۋعا, ماتەريالداردى قايتا قاراۋعا جىبەرۋگە, ءتىپتى شەشىمىنىڭ كۇشىن جويۋعا قۇقىلى», دەدى ن.قايىپجان.
سونىمەن قاتار سوت جيۋريىنە جىبەرىلگەن ماتەريالدارمەن ءىسى قارالىپ جاتقان سۋديا تانىسا الاتىنى, قاجەت بولعان جاعدايدا ىسكە ادۆوكاتتار مەن زاڭ كونسۋلتانتتارىن تارتۋعا قۇقىلى ەكەنى ايتىلدى. سپيكەرلەر سۋديالاردىڭ تاۋەلسىزدىگىن نىعايتۋ جانە سۋديالارعا قىسىم جاساۋ تاۋەكەلدەرىن بولدىرماۋ ماسەلەلەرىنە قاتىستى دا ويلارىن ورتاعا سالدى.