ەلىمىزدە حالىقارالىق پاندىك وليمپيادالاردىڭ جەڭىمپازدارى مەن ولاردىڭ ۇستازدارىن ىنتالاندىرۋعا ەرەكشە كوڭىل بولىنەدى. پرەزيدەنتتىڭ باستاماسىمەن 2022 جىلدان باستاپ جۇلدەگەرلەرگە اقشالاي سىياقىلار مەن ءبىلىم گرانتتارى بەرىلە باستادى, دەپ حابارلايدى Egemen.kz.
مىسالى, حالىقارالىق وليمپيادالاردا جۇلدەلى ورىندارعا يە بولعان وقۋشىلار اقشالاي سىياقى الادى: التىن مەدال ءۇشىن – 1500 اەك, كۇمىس مەدال ءۇشىن – 1000 اەك, قولا مەدال ءۇشىن – 500 اەك.
2024 جىلى بۇل ماقساتتارعا 26 وقۋشى ءۇشىن 77,5 ملن تەڭگە جانە ولاردى دايىنداعان 24 پەداگوگ ءۇشىن 6,5 ملن تەڭگە بولىنگەن. سونىمەن قاتار حالىقارالىق وليمپيادالاردىڭ جەڭىمپازدارى قازاقستاننىڭ جوعارى وقۋ ورىندارىندا وقۋعا گرانتتار العان.
«حالىقارالىق وليمپيادالار مەن عىلىمي جارىستارداعى قازاقستان قۇرامالارىنىڭ جوعارى جەتىستىكتەرى ەلدىڭ الەمدىك ءبىلىم بەرۋ كەڭىستىگىندەگى باسەكەگە قابىلەتتىلىگىن ايقىن كورسەتەدى. بۇل رەتتە قازاقستان بيولوگيا بويىنشا حالىقارالىق وليمپيادانىڭ ەڭ بەدەلدى وليمپيادالارىنىڭ ءبىرىن وتكىزۋ ءۇشىن تاڭدالعانى كەزدەيسوق ەمەس. 2024جىلى ءبىزدىڭ ەلىمىز 35-ءشى حالىقارالىق بيولوگيالىق وليمپيادانى قابىلدادى. وعان 81 ەلدەن 305 وقۋشى مەن 275 عالىم قاتىستى. قازاقستان قۇراماسى ۇزدىك ناتيجە كورسەتىپ, 100% ناتيجەگە قول جەتكىزدى», دەدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى گاجدەمبەك تۇرسىنوۆ وكق-دا وتكەن دوڭگەلەك ۇستەل بارىسىندا.