بيىل الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعى مۇگەدەكتىگى بار ادامدارعا كورسەتىلەتىن قىزمەتتەر كولەمىن ۇلعايتتى.
ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعى بىلتىر حالىققا كورسەتىلەتىن قىزمەتتەردىڭ ساپاسىن جاقسارتۋ مەن كولەمىن ارتتىرۋدا ايتارلىقتاي جەتىستىككە جەتكەن. ونىڭ شىندە سۋردولوگيالىق ادىستەردىڭ سانى جانە كوحلەارلى يمپلانتتارى بار بالالارعا كورسەتىلەتىن كومەك كولەمى وسكەن. 3D-تەحنولوگيالاردى پايدالانا وتىرىپ پروتەزدەۋ جەتىلدىرىلگەن. مىسالى, بىلتىر ۇلتتىق عىلىمي ورتالىقتا حالىقتى سۋردولوگيالىق قابىلداۋ 10%-عا, مەديتسينالىق-تەحنيكالىق كوميسسيانىڭ كونسۋلتاتسياسى 28%-عا ارتقان. ازاماتتاردىڭ وتىنىشتەرى كوبەيگەنىنە بايلانىستى ەستۋ-سويلەۋدى وڭالتۋعا تارتىلعان قىزمەتكەرلەر شتاتى كەڭەيتىلدى. جۇمىستىڭ وسى باعىتىندا 25 مامان بىلىكتىلىگىن ارتتىرۋ كۋرسىنان ءوتىپتى.
كۇندىزگى جانە تاۋلىك بويى باقىلاۋ جاعدايىندا ەستۋ-سويلەۋدى وڭالتۋ بارىسىندا كوحلەارلىق يمپلانتتاۋدان كەيىن بالالارمەن جۇمىس ىستەۋ ءۇشىن جاڭا ادىستەمەلىك جانە ءبىلىم باعدارلامالارى ازىرلەندى. ەلدىڭ شالعاي وڭىرلەرىنەن كوحلەارلىق يمپلانتتارى بار بالالارعا كومەك كورسەتۋ دەڭگەيى ارتقان. سونىڭ ىشىندە اباي, ۇلىتاۋ وبلىستارىنىڭ پاتسيەنتتەرى دە قوسىمشا قامتىلدى. وسىلايشا, 17 وڭىردەگى وسىنداي جاردەمگە مۇقتاج بالالارعا ءتيىستى كومەك كورسەتىلىپتى.
جالپى, الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعى پاتسيەنتتەرىنىڭ 80%-دان استامى كورسەتىلەتىن قىزمەتتەردىڭ ساپاسىنا قاناعاتتاناتىنىن ايتتى. بۇدان باسقا, ورتالىقتا پروتەزدىك-ورتوپەديالىق سالادا يننوۆاتسيالىق تەحنولوگيالار ەنگىزىلگەن. 3D-تەحنولوگيالاردى پايدالانا وتىرىپ پروتەزدەۋدىڭ تەحنولوگيالىق ۇدەرىستەرى جەتىلدىرىلگەن. مەملەكەتتىك تاپسىرىس اياسىندا 248 پروتەزدىك-ورتوپەديالىق بۇيىم جاسالسا, ونىڭ 6-اۋى يننوۆاتسيالىق, 242-ءسى جاڭا تەحنولوگيالار ارقىلى ىسكە اسقان.