باتىس قازاقستان وبلىسىندا جەكە ۇيلەردى تونادى دەگەن كۇدىكپەن قىلمىستىق توپتى قولعا ءتۇسىردى, دەپ حابارلايدى Egemen.kz.
بيىل اقپان ايىندا ورال قالاسى مەن بايتەرەك اۋدانىندا بىرنەشە ءىرى ۇرلىق بولدى. قىلمىسكەرلەر ءۇش ۇيگە پلاستيكالىق تەرەزەنى اشىپ كىرىپ, التىن بۇيىمداردى (سىرعا, ساقينالار, القالار جانە ت.ب.) جانە اقشالاي قاراجاتتى ۇرلاعان.
«ۇرلىق كەشكى جانە تۇنگى ۋاقىتتا ءۇي يەلەرى بولماعان كەزدە جاسالعانى انىقتالدى. جەدەل ىزدەستىرۋ ءىس-شارالارى ناتيجەسىندە باتىس قازاقستان وبلىسى پوليتسيا دەپارتامەنتىنىڭ قىزمەتكەرلەرى وبلىستىڭ ءتورت تۇرعىنىن ۇستادى. ولاردىڭ ۇشەۋى بۇرىن بىرنەشە رەت ۇرلىق, توناۋ جانە الاياقتىق قىلمىستارىن جاساعانى ءۇشىن سوتتالعانى بەلگىلى بولدى.
ۇرلانعان زاتتاردىڭ ءبىر بولىگى كۇدىكتىلەر وتكىزىپ جىبەرگەن ورىنداردان تاركىلەندى. قازىرگى ۋاقىتتا كۇدىكتىلەرگە قاتىستى ءۇش ەپيزود بويىنشا الدىن الا تەرگەۋ باستالدى.
ۇستالعاندار ۋاقىتشا ۇستاۋ يزولياتورىنا قاماۋعا الىندى», - دەلىنگەن پد حابارلاماسىندا.
وبلىستىق پد مالىمەتىنشە, جالپى شىعىن سوماسى 2 ميلليون تەڭگەدەن اسادى.
قىلمىسكەرلەردىڭ باسقا دا وسىنداي قىلمىستارعا قاتىستىلىعى تەكسەرىلۋدە.