قازاق كينوسىنىڭ اتاسى شاكەن ايمانوۆتىڭ كينو الەمىندە تۋدىرعان شەدەۆرلەرىنىڭ ءبىرى – «تاقيالى پەرىشتە». مۋزىكانىڭ حالىق ءانى, كلاسسيكا, دجاز سىندى بارلىق جانر ءتۇرىن قامتىعان ءفيلمدى ونەرتانۋ ماماندارى «قازاقشا ميۋزيكل» دەپ تە اتاپ ءجۇر. ءبىر قىزىعى, «تاقيالى پەرىشتەدە» ورىندالاتىن اندەردىڭ كوبى كينوعا ارنالىپ, ارنايى جازىلعان. ال سيۋجەتىنە ومىردە بولعان شىنايى وقيعا ارقاۋ ەتىلگەن.
تەك كەيىپكەرلەرىنىڭ اتى كينوداعىداي تانا ەمەس – ايناگۇل, تايلاق ەمەس – ساككو. ساككو بەيسەك ۇلى قاراتاەۆ وتباسىنداعى جەتى بالانىڭ كەنجەسى بولعان. كىشىسىنەن وزگەسىن اياقتاندىرعان ايناگۇل انا ۇلىنىڭ تاعدىرىنا الاڭداپ, ءوزى جار ىزدەۋگە كىرىسكەن ەكەن. مىنە, بۇل تۋرالى ءىنىسى كاۋكەن كەنجەتاەۆتىڭ اۋزىنان ەستىگەن شاكەن ايمانوۆ قاتتى ك ۇلىپ, ايناگۇل اپانىڭ قيمىلىنا ريزا بولىپتى. «فيلمگە سۇرانىپ تۇر ەكەن» دەپ شابىتتانىپتى.
ايناگۇل اپانىڭ كۇيەۋ بالاسى بولعان كاۋكەن كەنجەتاي ۇلى ول تۋرالى ءوزىنىڭ «اسىلدار مەن ارداقتار» كىتابىندا بىلاي دەپ اڭگىمەلەيدى: ء«بىر كۇنى شاكەن جولداستارىمەن ءبىزدىڭ ۇيگە كەلىپ, ەت جەپ, شاي ءىشىپ, ماسايراپ وتىرىپ, نەشە ءتۇرلى قىزىق اڭگىمەلەر دە ايتىلىپ, جايدارى وتىردى. سوزدەن ءسوز شىعىپ, مەن ەنەم ايناگۇلدىڭ ءبىر اڭگىمەسىن ايتتىم. ەنەمىز كۇيەۋى ەرتە دۇنيە سالىپ, جەتى بالامەن جەسىر قالعان. تەك ءوزىنىڭ ەتى تىرىلىگىنىڭ ارقاسىندا ءبارىن وقىتىپ, ادام قىلىپ ەل قاتارىنا قوسقان. جەتى بالانىڭ ءتورت قىزى تۇرمىسقا شىعىپ, ەكى ۇلى ۇيلەنگەن. بىراق ايناكەڭ ء«سۇت كەنجەم» دەپ كىشى ۇلى ساككونىڭ قولىندا قالادى. ساككو – باسقا بالالارىنا قاراعاندا بوستاۋ, تىم جۋاس, ەشكىمنىڭ بەتىنە قاراپ سويلەي المايتىن بالا. ونى شەشەسى «كوزىمنىڭ تىرىسىندە ۇيلەندىرەم» دەسە, ساككو ەشبىر قىزعا ءسوز ايتۋ تۇگىلى ماڭايىنا جۋىمايدى. «سەن مىنا قالپىڭدا ەرتەڭ مەن ءولىپ قالسام, نە بولماقسىڭ؟ ۇيلەنسەڭشى, سونى كورىپ كەتسەم ارمانىم جوق» دەپ ەنەمىز زار قاعادى. بىراق ساككودا ۇيلەنۋدەن حابار جوق. ونى بىلگەن اينەكەڭ, شاپانىن كيىپ, بەلىن بايلاپ, قولىنا تاياعىن الىپ, ساككونى جەتەكتەپ جولعا, بولاشاق كەلىن ىزدەۋگە شىعادى. بىراق ساككونىڭ سۇيكىمدىلەرگە سەلت ەتەتىن ءتۇرى كورىنبەيدى. سودان ءۇمىتى ۇزىلگەن ايناگۇل اپا ءبىر كۇنى كوزى ۇيقىعا كەتىپ بارا جاتىر ەكەن. ساككونىڭ داۋسى قاتتى شىعا ۇيگە كىرىپ كەلدى. – ماما, نەعىپ جاتسىز, تۇرساڭىزشى! مىنا كەلىنىڭدى قارسى المايسىڭ با؟ – دەگەن. ايناكەڭ ويىن ەكەن دەپ, ۇيقىلى-وياۋ: – ءاي, كوك شەشەك نەمە, كەت ءارى ۇيقىمدى بۇزباي. ساعان قاتىن ءتيۋشى مە, ەدى! – ويباي-اۋ, تۇرساڭشى, كورمەيسىز بە؟ تۇر عوي, مىنە, اي مەن كۇندەي بوپ!
ايناكەڭ ءبىر-ءبىر كوزىن اشىپ قاراسا, الدىندا ءبىر قىز تۇر: – اپىر-اۋ, قاراعىم-اۋ! سەن قاي ەلدىكىسىڭ؟ قايدا وقيسىڭ؟..». كەلىن ايناكەڭ ىزدەگەندەي ءدال ويىنان شىعادى. قاتتى قۋانىپ اعايىنداردى شاقىرىپ, دەرەۋ توي دا جاسالادى».
وسى ءبىر قىزىقتى وقيعادان قاناتتانعان رەجيسسەر كوپ كىدىرمەي, بىردەن ءتۇسىرىلىم جۇمىسىنا كىرىسەدى. فيلم ستسەناريىن رەجيسسەردىڭ ءوزى ماسكەۋلىك جيتكين ياكوۆپەن بىرلەسە جازىپ شىعادى. كوپ ۇزاماي شاكەننىڭ «تاقيالى پەرىشتە» اتتى ءفيلمى تۇسىرىلە باستايدى.
ال ءبىرى بىلسە, ءبىرى بىلمەس, ايناگۇل اپانىڭ ءپروتوتيپى تانا بەينەسى – كسرو حالىق ءارتىسى ءامينا ومىرزاقوۆا ءۇشىن ارنايى جازىلعان ءرولدىڭ ءبىرى. ونى شاكەن ايمانوۆتىڭ: ء«اميناجان, مەن ادەيىلەپ تۇرىپ ساعان ستسەناري جازدىم. بۇل – كومەديالىق تۋىندى. باستى رولدە سەن وينايسىڭ. وسى كۇلكىڭنەن ايىرىلما!» دەپ جازعان حاتى دا راستايدى. شىنىمەن دە, فيلمدەگى ءامينانىڭ كۇلكىسى – كينونىڭ كوركىن اشقان ۇتقىر كادرلاردىڭ ءبىرى. سول عاجايىپ كۇلكىسىمەن, سول شىنايى بەينەسىمەن كوپ ەسىندە ماڭگىلىك جاتتالعان اكتريسا ەكرانداعى كۇللى انالاردىڭ ەتالونىنا اينالعانداي.
شاكەن ايمانوۆ «تاقيالى پەرىشتەسىن» دە تەز تاپتى. 1965 جىلى الماتىدا كۇرەستەن قاجىمۇقان اتىنداعى تۋرنير وتەدى. سول جارىسقا ارنايى كەلگەن ءبىر بالۋاندى بايقاپ قالىپ, وعان تايلاقتىڭ ءرولىن ۇسىنادى. قاپەلىمدە مۇنداي ۇسىنىسقا دايىن بولماعان بالۋان, البەتتە بىردەن باس تارتادى. بىراق قادالعان جەرىنەن قان الماي تىنبايتىن بىربەتكەي رەجيسسەر اقىرى الىمعازى رايىمبەكوۆتىڭ كەلىسىمىن الىپ, باستى رولگە بەكىتەدى. ول تۋرالى مارقۇم الىمعازى اقساقال باسپاسوزگە بەرگەن ءبىر سۇحباتىندا بىلاي دەپ اعىنان اقتارىلىپتى:
«بۇل فيلمگە تۇسەمىن دەگەن ءۇش ۇيىقتاسام ويىمدا بولعان جوق. الدىڭعى كينولارعا تۇسكەن تيىن-تەبەنىمدى الايىن دەپ كينوستۋدياعا بارسام, دالىزدە شاكەن اعا تۇر. مەنى كورە سالىپ: «بەرى كەل!» دەپ شاقىرىپ الدى. سالەمدەسە بەرگەنىم سول ەدى, جەتەكتەپ كابينەتىنە الىپ كىردى. «بالا, سەنىڭ ءرولىڭدى جازىپ, نۇكتەسىن قويىپ اكەلدىم. «تاقيالى پەرىشتە» – مۋزىكالىق كومەديا. باستى ءرولدى ءوزىڭ وينايسىڭ», دەدى. «اعا, مەن ءارتىس ەمەسپىن, سەنىمىڭىزدى اقتاي الماسام, ءسىزدى ۇياتقا قالدىرامىن عوي! – دەپ ەدىم: «وتتاما, شىق كابينەتتەن, بىراق ەرتەڭ ساعات 10.00-دە وسى جەردە بول. ءرولىڭدى الاسىڭ, – دەدى. «جارايدى» دەپ ىقتيارسىز عانا كەلىسىمىمدى بەردىم. جالپى, فيلم جەتى ايدىڭ ىشىندە ءتۇسىرىلدى عوي».
مىنە, «تاقيالى پەرىشتە» مەن ونداعى باستى رولگە بەكىتىلگەن اكتەرلەرىنىڭ ءتۇسىرىلىم الدىنداعى بار حيكاياسى وسىنداي. ال فيلم سيۋجەتىنە تۇرتكى بولعان ساككونىڭ تاعدىرى ءدال فيلمدەگىدەي باقىتتى دا باي, ماعىنالى دا ءماندى وتەدى. ساككو بەيسەك ۇلى قاراتاەۆ وسى جىلدىڭ 1 اقپانىندا 88 جاسىندا ماڭگىلىككە بەت بۇردى.