ۆيتسە-پرەمەر قانات بوزىمباەۆ ارشالى اۋدانىنداعى جىبەك جولى اۋىلىندا, تسەلينوگراد اۋدانىنداعى تايتوبە, تالاپكەر اۋىلدارىندا جانە اقمولا وبلىسىنىڭ قوسشى قالاسىندا بولدى.
جۇمىس ساپارى بارىسىندا قانات بوزىمباەۆ وبلىس اكىمى مارات احمەتجانوۆپەن بىرگە ەسىل جانە نۇرا وزەندەرىنىڭ ساعاسىنداعى بوگەتتەردىڭ, سۋ وتكىزۋ قۇرىلىستارىنىڭ, سۋ توراپتارىنىڭ جاي-كۇيىن تەكسەردى. سونداي-اق استانا كونتر رەتتەۋىشى مەن ەلوردا ىرگەسىندەگى جىبەك جولى اۋىلىمەن اراداعى ۇزىندىعى 6,5 شاقىرىمعا سوزىلعان توسپا بوگەتتىڭ قۇرىلىسىن قاداعالادى.
ۆيتسە-پرەمەر قوسشى قالاسىنىڭ ماڭىنداعى تايتوبە اۋىلىنداعى تاسقىننان قورعانىس ءۇشىن تۇرعىزىلعان ءۇيىندىنىڭ بەرىكتىگىن تەكسەردى. ءىس جۇزىندە اۋىلدا 7 مىڭ ادام تۇرادى. مۇنداعى توپىراق ءۇيىندىسى ەلدى مەكەندى دالانىڭ ەرىگەن سۋىنان قورعاۋ قىزمەتىن اتقارادى.
سونىمەن قاتار قانات بوزىمباەۆ نۇرا-ەسىل وزەندەرىندەگى پرەوبراجەن سۋ تورابىنىڭ جاي-كۇيىمەن جانە تالاپكەر اۋىلى ارقىلى وتەتىن سۋ بۇرۋ كانالىنىڭ جاعالاۋلارىن كوتەرۋ جۇمىستارىمەن تانىستى.
اقمولا وبلىسىندا بارلىعى 144 سۋ تاسقىنى قاۋپى بار ەلدى مەكەن بار. اكىمدىكتىڭ مالىمەتىنشە, الدىن الۋ شارالارى تولىعىمەن اياقتالدى.
وسىلايشا, تسەلينوگراد اۋدانىندا ەسىل جانە نۇرا وزەندەرىنىڭ قاۋىپتى ۋچاسكەلەرىندە جاعالاۋدى بەكىتۋ جانە ارناسىن كەڭەيتۋ جۇمىستارى جۇرگىزىلدى. كوكشەتاۋ قالاسىنداعى قىلشاقتى وزەنىنىڭ باسسەينى بويىنشا ءتۇبىن تەرەڭدەتۋ شارالارى اتقارىلدى.
وبلىس باسشىلىعى بۇگىنگى تاڭدا وڭىردە 107,4 شاقىرىم سۋ بۇرۋ كانالدارى جابدىقتالعانىن, 38 شاقىرىم وزەن ارنالارى تازارتىلعانىن, ۇزىندىعى 35 شاقىرىمنان اساتىن وزەندەردىڭ سۋ تاسقىنى قاۋپى بار ۋچاسكەلەرىندە جاعالاۋدى بەكىتۋ جانە ءتۇبىن تەرەڭدەتۋ جۇرگىزىلگەنىن باياندادى. 131 شاقىرىم بوگەت نىعايتىلدى, 21 شاقىرىمنان استام جاڭادان ۇيىندىلەر تۇرعىزىلدى جانە 336 سۋ وتكىزۋ قۇرىلىستارى جابدىقتالدى.
قانات بوزىمباەۆ جۇمىس ساپارىنىڭ قورىتىندىسى بويىنشا سۋ تاسقىنى كەزەڭىن قاۋىپسىز وتكىزۋ ءۇشىن قاجەتتى تەحنيكا مەن جەكە قۇرامدى دايىنداۋدى تاپسىردى.