ەرتىس–بايان وڭىرىندە ەل ەسىندە قالارلىق ەرەكشە كونتسەرت ءوتتى. جەرگىلىكتى كومپوزيتورلاردىڭ شىعارمالارى ورىندالعان كەشتە بۇرىن ۇلكەن ساحناعا اياق باسپاعان الىس اۋدانداردىڭ ونەرپازدارى جارق ەتىپ كورىندى.
كورەرمەندەردىڭ زور ىقىلاسىنا يە بولعان «التىن بەسىك – تۋعان ەل!» كونتسەرتى وسىمەن وڭىرىمىزدە ەكىنشى رەت وتكىزىلىپ وتىر. يسا بايزاقوۆ اتىنداعى وبلىستىق فيلارمونيا ۇيىتقى بولعان رۋحاني ءىس-شارادا بىرقاتار اندەر وركەستردىڭ سۇيەمەلدەۋىمەن ورىندالىپ, انسامبلدەر مەن جەكە ورىنداۋشىلار كوڭىل حوشىن اشاتىن شىعارمالارمەن قۇلاق قۇرىشىن قاندىردى.
جوبا اۆتورى, رۇستەمبەك وماروۆ اتىنداعى قازاق ۇلت اسپاپتار وركەسترىنىڭ كوركەمدىك جەتەكشىسى تالعات كارىموۆ ارقا دالاسىنداعى ءان ورىنداۋشىلىق ونەرى وسىنداي كونتسەرتتەر ارقىلى جالعاسىپ, جاڭعىرىپ وتىراتىنىن ايتادى.
– كەشەگى جارىلعاپبەردى, جاياۋ مۇسا, يسا, ەستاي, مايرا, ءيمانجۇسىپ سياقتى حالىق كومپوزيتورلارى ءان-جىرعا بولەگەن ەرتىس–بايان وڭىرىندە بۇگىندە ۇلتتىق كولوريتىمىز – ءداستۇرلى انشىلىك ءوز دەڭگەيىندە ساقتالىپ وتىر. قانشاما جاستارىمىز ەل جادىنان ءوشىپ بارا جاتقان كونە شىعارمالاردى قايتا جاڭعىرتتى. ەندى ءبىرى زامانعا ساي لايىقتاپ, كەيبىر اندەرگە ەكىنشى ءومىر سىيلادى. «التىن بەسىك – تۋعان ەل!» جوباسىنىڭ ماقساتى – ەل ىشىندەگى تالانتتارىمىزدى ۇلكەن ساحناعا جەتەلەۋ, جەرگىلىكتى كومپوزيتورلاردىڭ اندەرىن ناسيحاتتاۋ. باياناۋىلداعى «بەۋ, جىگىتتەر» حالىق ءانسامبلىنىڭ ورىنداۋىندا ۇزاق جىلدار ورىندالىپ كەلە جاتقان امان ءبايازيتوۆتىڭ «بايانىم», مارقۇم كومپوزيتور قايىربەك ساتيەۆتىڭ «اقمارال» اندەرى بۇگىن وركەسترمەن ورىندالىپ, جۇرت جىلى قابىلداعانىن كوزىمىز شالدى. ءبىز ءۇشىن بيىل جاس كۇيشى ۇعىبايدوللا ءمۇفتاننىڭ «الاش اماناتى», بەلگىلى كۇيشى, مادەنيەت سالاسىنىڭ ۇزدىگى سەرىك سىزدىقوۆتىڭ «تەرىسقاقپا تولعاۋى», «تۇرار اقجەلەڭ» كۇيلەرى ەرەكشە جاڭالىق بولىپ وتىر. ۇ.ءمۇفتاننىڭ اتالعان تۋىندىسىن ءبىزدىڭ وركەستر بىلتىرعى دومبىرا كۇنىندە ەرتىس جاعالاۋىندا ورنالاسقان «Ertis Promenade» ساحناسىندا ورىنداپ, كورەرمەندەر زور قوشەمەتپەن قابىلداعان ەدى, – دەيدى قازاقستاننىڭ ەڭبەك سىڭىرگەن مادەنيەت قايراتكەرى تالعات كارىموۆ.
بيىل «بەۋ, جىگىتتەر» ءانسامبلىنىڭ قۇرىلعانىنا 40 جىل تولىپ وتىر. حالىق ءانسامبلىنىڭ مۇشەلەرى وسى جىلدار ىشىندە ءۇش مارتە اۋىسقان. 1986 جىلى باياناۋىل اۋدانىنداعى مادەنيەت ءۇيىنىڭ جانىنان ۇگىت-ناسيحات بريگاداسى رەتىندە قۇرىلعان ونەر ۇجىمىنىڭ العاشقى جەتەكشىسى – ءجۇرسىنباي مۇقاەۆ ەدى. كىلەڭ جىگىتتەردەن قۇرالعان انسامبل 1991 جىلى قاباردين – بالقار ەلىندە وتكەن دۇنيەجۇزىلىك تۇركىتىلدەس فەستيۆالىندە جانە 1993 جىلى داعىستاندا وتكەن «راديگا» فەستيۆالىندە ونەر كورسەتىپ, لاۋرەات اتانادى. ودان بەرى دە كوپتەگەن رەسپۋبليكالىق جانە حالىقارالىق كونتسەرتتەر مەن كەشتەرگە قاتىسىپ, ارقا دالاسىنىڭ ونەرىن پاش ەتتى. جۋىقتا الماتى قالاسىندا وتكەن رەسپۋبليكالىق «سامعاۋ» بايقاۋىندا ءداستۇرلى ءان اتالىمى بويىنشا جۇلدەلى ورىنعا يە بولدى.
– تۇڭعىش رەت وركەستردىڭ سۇيەمەلدەۋىمەن ۇلكەن ساحنادا ءان ورىندادىق. يسا بايزاقوۆ اتىنداعى وبلىستىق فيلارمونيا ۇجىمى بىزگە وسىنداي مۇمكىندىك سىيلاعانىنا ريزامىز. بيىل جەلتوقسان ايىندا ءانسامبلىمىزدىڭ قۇرىلعانىنا 40 جىل تولعالى وتىر. سوعان وراي بىرنەشە ءاندى رەپەرتۋارىمىزعا قوسپاق ويىمىز بار. مىسالى, ءسوزىن ايگىلى مۇزافار الىمباەۆ جازعان «مارالدىم» ءانىن, نۇرعيسا تىلەنديەۆتىڭ «باياناۋىل ءۆالسىن» وزگەشە مانەردە, جاڭاشا ىرعاقتا جازىپ جاتىرمىز. جىل سوڭىندا پاۆلودار جانە قاراعاندى وبلىستارىنىڭ اۋدان-قالالارىن ارالاپ, كونتسەرت بەرۋ ويىمىزدا تۇر, – دەپ جوسپارلارىمەن ءبولىستى «بەۋ, جىگىتتەردىڭ» ورىنداۋشىسى جاندوس اداموۆ.
تالعات كارىموۆ اتاپ وتكەندەي, داستۇرگە اينالىپ كەلە جاتقان بيىلعى كونتسەرت جاياۋ مۇسانىڭ – 190, ابايدىڭ – 180, مايرانىڭ – 135, سونداي-اق يسا بايزاقوۆتىڭ 125 جىلدىعىنا ارنالدى. الداعى ۋاقىتتا جەرگىلىكتى اۆتورلاردىڭ ءان-جىرى تاسپاعا ءتۇسىرىلىپ, ساز جيناعىن شىعارۋ ويدا بار. ال ودان سوڭ مۇنداي رۋحاني كەشتەردى وزگە اۋدان-قالالاردا ۇيىمداستىرۋ كوزدەلىپ وتىر.
كونتسەرتتىك كەشتە جەرگىلىكتى كومپوزيتورلاردىڭ 20-دان استام ءان-كۇيى ورىندالدى. كەشتە ر.وماروۆ اتىنداعى قازاق ۇلت اسپاپتار وركەسترىنەن بولەك, «شەرنياز» بي ءانسامبلى, كامەرالىق حور, «Samiyan» ۆوكالدىق توبى, «رەترو» ۆوكالدىق ءانسامبلى, فيلارمونيانىڭ جەكە ورىنداۋشىلارى, انشىلەر ەربولات بورتىباي, ارمان راي, التىنگۇل باقىتحان, ەسىم بەيبىتحان, «RUH» ەتنو-ميكس ءانسامبلى, داۋرەنبەك سلامعالي, شىڭعىس اسىعات ۇلى, تاعى باسقالارى ونەر كورسەتتى.
پاۆلودار وبلىسى