اتىراۋدا ءبىر وتباسىنىڭ 5 بالاسى بەيىمدەۋ ورتالىعىنا, 3 بالاسى سابيلەر ۇيىنە ورنالاستىرىلدى, دەپ حابارلايدى Egemen.kz.
بالا قۇقىقتارى جونىندەگى اتىراۋ وڭىرلىك ۋاكىلى ايجان سارسەمباەۆانىڭ ايتۋىنشا, 8 بالاسى بار وتباسىنىڭ ءۇيى تۇرۋعا جارامسىز بولعان.
«بۇل وتباسىعا 2020 جىلى «حارەكەت» قايىرىمدىلىق قورى ارقىلى جەكە ءۇي بەرىلگەن. الايدا تۇرعىن ءۇيدىڭ جاعدايى وتە ناشار. ءۇيدىڭ توبەسىنەن سۋ كەتىپ, جىلۋ دا بولماعان. سونىڭ سالدارىنان كوپبالالى انانىڭ الەۋمەتتىك جاعدايى اتىراۋ قالالىق اكىمدىگى جانىنداعى كامەلەتكە تولماعاندار ىستەرى جونىندەگى كوميسسيادا قارالدى. انانىڭ وتىنىشىنە سايكەس كوميسسيا شەشىمىمەن 5 بالاسى اتىراۋ وبلىستىق كامەلەتكە تولماعانداردى بەيىمدەۋ ورتالىعىنا, ال 3 بالاسى «سابيلەر ۇيىنە» ۋاقىتشا ورنالاستىرىلدى», دەيدى ايجان سارسەمباەۆا.
ونىڭ ايتۋىنا قاراعاندا, كوپبالالى انانىڭ ۇيىنە جوندەۋ جۇرگىزىلىپ جاتىر. قازىر جەكە تۇرعىن ۇيدەگى جىلۋ جۇيەسى قالپىنا كەلتىرىلگەن.