اقتوبەدە ۇزدىك ەكسكۋرسيا جۇرگىزۋشىسى انىقتالدى

وعان وبلىستىق جانە اۋداندىق  مۋزەيلەر مەن  تۋريستىك قىزمەت كورسەتۋ سالالارىنان 15  مامان  قاتىستى. مۋزەي  ىسىندە    قۇندى جادىگەرلەر مەن ەكسپوناتتار جيناي بىلۋدەن وزگە,  كورنەكىلىككە قويىلعان جانە قوردا ساقتالعان دۇنيەلەردى  كەلۋشىلەرگە  ساۋاتتى دا قىزعىلىقتى ەتىپ تانىستىرا ءبىلۋ وتە ماڭىزدى. ەرتە  داۋىردەن جەتكەن ەكسپوناتتىڭ  بويىندا وتكەن تاريحتىڭ  بوياۋى سىڭگەن, سول ءداۋىر ادامدارى قولىنىڭ ءىزى قالعان.  مۇنى سىرت ادام كوپ بايقاي بەرمەيدى. ەكسكۋرسيا جۇرگىزۋشىسى بويىندا   ەكسپوناتتى ۇعىنا بىلەتىن بايقامپازدىق پەن ونى   كەلۋشىلەرگە   ساۋاتتى تۇردە بايانداي بىلەتىن  شەبەرلىك قاسيەت ۇشتاسا بىلسە, مۋزەي جۇمىسىنىڭ باعى جاندى دەۋگە بولادى. سوندىقتان وسى  سالانىڭ ماماندارىنان مۋزەي قىزمەتىنىڭ زاماناۋي تاسىلدەرىن مەڭگەرۋ مەن كاسىبي شەبەرلىگىن ۇزدىكسىز جەتىلدىرۋ تالاپ ەتىلەدى. وسى ماقساتتا وتكىزىلگەن سايىس ءتورت كەزەڭنەن تۇردى: ءوزىن  جانە جۇمىسىن  جۇرت الدىندا تانىستىرۋ, كاسىبي جەتىستىكتەرىن كورسەتەتىن پورتفوليو دايىنداۋ, ەڭبەك ەتەتىن مەكەمەسىنىڭ  تاريحىنان ءۇش مينۋتتىق كورىنىس  ازىرلەۋ, وڭىردەگى  قانداي دا ءبىر تاريحي-مادەني ەسكەرتكىش بويىنشا تەاترلاندىرىلعان  ەكسكۋرسيا جۇرگىزۋ.    

جەڭىمپازدارعا بىرنەشە جۇلدە قورى بەلگىلەندى. ەڭ ءبىرىنشى ورىنعا – 300 مىڭ تەڭگە, ءبىرىنشى ورىنعا – 200 مىڭ تەڭگە,  ەكىنشى ورىنعا  150 مىڭ, ءۇشىنشى ورىنعا 100 مىڭ تەڭگە تاعايىندالدى. سونداي-اق, باسقا دا نوميناتسيالار بويىنشا 50 مىڭ تەڭگە كولەمىندە ىنتالاندىرۋ سىيلىقتارى بەلگىلەندى.       

ناتيجەسىندە  وڭىردەگى  ۇزدىك ەكسكۋرسيا جۇرگىزۋشى اتاعىن كەڭەستەر  وداعىنىڭ باتىرى ءاليا مولداعۇلوۆانىڭ  مەموريالدىق مۋزەيى قىزمەتكەرى  يەلەنسە, ءبىرىنشى ورىن قارابۇتاق اۋىلىنىڭ مۋزەيىنە, ەكىنشى ورىن «ىرعىز-تورعاي» رەزەرۆاتى مۋزەيىنە, ءۇشىنشى ورىن مۇعالجار اۋداندىق مۋزەيىنە بۇيىردى.  ايتا كەتۋ كەرەك,  «ۇزدىك ەكسكۋرسيا جۇرگىزۋشىسى»  بايقاۋى  وڭىردە العاش رەت بىلتىر مەكتەپ  وقۋشىلارى اراسىندا ۇيىمداستىرىلعان. بيىلعى جىلى سايىس  مادەنيەت مەكەمەلەرى  ماماندارىنىڭ اراسىندا ءوتتى. الداعى جىلدارى تىڭ باستاما جالعاسىن تابادى دەگەن ءۇمىت بار.  بايقاۋ  جۇرگىزۋشىلەردىڭ ادال باسەكەدە شىڭدالىپ, كاسىبي بىلىكتىلىگىنىڭ ارتۋىنا, ىزدەنىس اياسىن كەڭەيتۋىنە جول اشادى دەگەن سەنىم بار.