«Taldau Talks» پودكاسىنىڭ سالىق رەفورماسىنا ارنالعان جاڭا شىعارىلىمى جاريالاندى. سالىق كودەكسىنىڭ جوباسىنا ەنگىزىلەتىن تۇزەتۋلەر پارلامەنت دەپۋتاتتارىنىڭ قاراۋىنا ۇسىنىلۋىنا بايلانىستى وسى تاقىرىپتى تالقىلاۋ ماڭىزدى بولىپ وتىر.
پارلامەنت سەناتىنىڭ توراعاسى ماۋلەن اشىمباەۆ, پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين, «اتامەكەن» ۇكپ تورالقاسىنىڭ توراعاسى رايىمبەك باتالوۆ, سونداي-اق بەلگىلى ەكونوميست الماس چۋكين ءۇش ساعاتتىق اشىق اڭگىمە بارىسىندا سالىق رەفورماسىنىڭ العىشارتتارى جانە ونىڭ نەگىزگى باعىتتارىن, ەلىمىزدەگى بيزنەس پەن جالپى ەكونوميكالىق جاعدايعا اسەرىن ەگجەي-تەگجەيلى تالدادى.
پودكاستا كوتەرىلگەن ماسەلەلەردىڭ قاتارىندا ققس مولشەرلەمەسىن وزگەرتۋ, بيزنەسكە سالىق جەڭىلدىكتەرى, مەملەكەتتىك شىعىنداردى وڭتايلاندىرۋ, سالىق ساياساتىنىڭ ينفلياتسياعا اسەرى, سونداي-اق وتەماقى مەن اتاۋلى الەۋمەتتىك كومەك تەتىكتەرى بار. سەنات توراعاسى اتاپ وتكەندەي, سالىق رەفورماسى – ەلىمىزدىڭ ۇزاقمەرزىمدى دامۋىنا باعىتتالعان ستراتەگيالىق ماڭىزدى باستاما.
«پرەزيدەنت قاسىم-جومارت توقاەۆ وڭتايلى جانە تەڭگەرىمدى سالىق جۇيەسىن قۇرۋ مىندەتىن جۇكتەدى. سوندىقتان ءبارىمىز وسى ماڭىزدى, قاجەتتى جانە ءتيىمدى قۇجاتتى قابىلداۋعا بىرلەسىپ جۇمىس ىستەۋىمىز كەرەك. سالىق رەفورماسى ەلىمىزدىڭ ۇزاق مەرزىمدى, ساپالى جانە تۇراقتى دامۋىنا, سونداي-اق بارلىق الەۋمەتتىك مىندەتتەمەلەردى ورىنداۋعا باعىتتالعان», دەپ اتاپ ءوتتى م.اشىمباەۆ.