جۇمىسسىزدىقتى ازايتۋ جوباسى

اتالعان جوبا – پارتيا مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ بىرلەسكەن باستاماسى. وعان وبلىستار مەن قالالاردىڭ جەرگىلىكتى اتقارۋشى ورگاندارى دا اتسالىسىپ ءجۇر.

– جاستار زياتكەرلىك, يننو­ۆاتسيالىق جانە ەڭبەك الەۋە­تىنىڭ رەزەرۆى بولا وتىرىپ, ەلدىڭ الەۋمەتتىك-ەكونوميكالىق دامۋىنا جاڭا سەرپىن بەرە الادى. بۇگىندە ەكونوميكالىق بەلسەندى جاستاردىڭ ۇلەسى جۇمىس كۇشى جالپى سانىنىڭ 39 پايىزىن قۇرايدى. «جۇمىسشى ماماندىقتارى جىلى» اياسىندا جاڭا جۇمىس ورىن­دارىن قۇرۋ, ەڭبەك نارىعىندا تالاپ ەتىلەتىن داعدىلارعا باۋلۋ ءۇشىن كاسىپتىك ستاندارتتار مەن جاڭا وقۋ باعدارلامالارىن بەكىتۋ, جۇمىس بەرۋشىلەر, مەكتەپتەر مەن كوللەدج­دەر اراسىنداعى ءوزارا ءىس-قيمىلدى كۇشەيتۋ, تالىمگەرلىك ينستيتۋتىن دامىتۋ, قاۋىپسىز جۇمىس ورنىن قۇرۋ, سونداي-اق جۇمىسشى كاسىپتەرىنىڭ ءيميدجىن ارتتىرۋ باعىتىنداعى ءىس-شارالار كوزدەلگەن. الداعى 6 جىلدا كادرلارعا سۇرانىس 1,6 ملن ادامدى قۇراۋى مۇمكىن دەپ بولجانادى. ونىڭ ىشىندە اسىرەسە, كاسىپتىك-تەحنيكالىق ءبىلىمى بار جۇمىسكەرلەرگە قاجەتتىلىك ارتپاق, – دەدى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ.

بىلتىر 1,5 مىڭنان اسا ءىس-شارا وتكىزىلىپ, 150 مىڭ جاس قامتىلدى. جۇمىس بەرۋشىلەرمەن 5 مىڭنان اسا مەموراندۋمعا قول قويىلدى. سونىڭ ءبىرى – پەتروپاۆل قالاسىنداعى كيروۆ اتىنداعى كاسىپورىن. مۇندا ناعىز كاسىبي ماماندار توپتاسقان. ولار شەبەرلىگىن, قارىم-قابىلەتىن كورسەتىپ, ەڭ باستىسى ادالدىعىمەن وتاندىق ءوندىرىستىڭ ىلگەرىلەۋىنە سەپتىگىن تيگىزىپ ءجۇر. وسىنداي مامانداردىڭ ءبىرى – 5-ساناتتاعى تەمىر ۇستاسى سانات ماقانوۆ. ول زاۋىتتا 2009 جىلدان بەرى جۇمىس ىستەيدى. وسى ارالىقتا بىلىكتى مامان «ۇزدىك تەمىر ۇستاسى» بايقاۋىنىڭ جەڭىمپازى اتانىپ تا ۇلگەرگەن. بۇعان قوسا كاسىبي جەتىستىكتەرى ءۇشىن وبلىس جانە قالا اكىمدىكتەرىنەن, يندۋستريا جانە قۇرىلىس مينيسترلىگىنەن بىرنەشە رەت گراموتا الىپ, ەڭبەگى ەلەنگەن. ال 2020 جىلى «ەڭبەك داڭقى» وردەنىمەن ماراپاتتالدى. كۇندەلىكتى ءومىر سالتىنان سپورتتى دا تىس قالدىرعان ەمەس, 2017 جىلى «رينگ پاتشاسى» ءتۋرنيرىنىڭ جەڭىمپازى اتاندى. كاسىپورىن باسشىلىعى دا ۇستانىڭ ەڭبەگىن جوعارى باعالاپ, ءاردايىم قولداۋ ءبىلدىرىپ كەلەدى. باستاپقىدا زاۋىتتىڭ جاتاقحاناسىندا تۇرعان سانات كاسىپوداق ارقىلى ءتيىمدى يپوتەكالىق باعدارلامامەن پاتەر ساتىپ العان.

– جۇمىسشى ماماندار ماڭداي تەرمەن, قارا كۇشپەن ەلىمىزدىڭ ىلگەرىلەۋىنە سەپتىگىن تيگىزىپ وتىر. بىلايشا ايتقاندا, بەلگىلى ءبىر كاسىپورىن, ءوندىرىس نە زاۋىت ءبىر عانا ادامنىڭ, وتباسىنىڭ قامى ءۇشىن ەمەس, ءبۇتىن قازاق ەلىنىڭ بولاشاعىنا دا ۇلەس قوسادى. ءوزىمنىڭ جاۋاپكەرشىلىگى مول سالادا ەڭبەك ەتىپ جۇرگەنىمە ريزامىن. سوندىقتان جاستار­دىڭ وسىنداي ورتادان ءوز ورنىن تاپقانىن, ەڭبەك جولىن زاۋىتتان باستاعانىن قالايمىن, – دەيدى س.ماقانوۆ.

ەلىمىزدىڭ بارلىق وڭىرىندە 200-گە جۋىق بوس ورىندار جارمەڭكەسى وتكىزىلىپ, وعان 5,2 مىڭ ۇيىم قاتىسقان. ناتيجەسىندە, 55 مىڭنان اسا ادام جۇمىسقا شاقىرتۋ الىپ, 562-ءسى ەڭبەككە ارالاسىپ كەتتى.

ىلكىمدى ءىستىڭ يگىلىگىن كور­گەندەردىڭ ءبىرى – تۇركىستاندىق سۇلۋشاش ورازباي. سايرام اۋدا­­نىندا تۇراتىن جاس الدىمەن جۇ­مىس­پەن قامتۋ ورتا­لى­عىنا بارىپ تىركەلگەن. كەيىن ماماندار «بوس ورىندار جارمەڭكەسى» وتەتىنىن حابارلاپ, سول الاڭنان جۇمىس ىزدەۋگە قولقا سالعان.

– ورايى كەلىپ, ءساتى ءتۇسىپ قاسىمبەك داتقا اۋىلىنداعى №64 ورتا مەكتەپكە ءىس جۇرگىزۋشى بولىپ ورنالاستىم. اۋىلدا كوبىنە مۇعالىم مەن دارىگەرگە جۇمىس تابىلادى. ەگەر كاسىپورىن, ءوندىرىس ورنى, تاعى سول سياقتى زاۋىت اۋما­عىنداعى ەلدى مەكەن بولسا, ءتىپتى جاقسى, وزگە دە ماماندىقتار بو­يىنشا ەڭبەك ەتۋگە بولادى. جالپى باعىت-باعدار بەرىپ, ءجون سىلتەيتىن باعدارلامالاردىڭ بولعانى قۋان­تادى, – دەيدى سۇلۋشاش.