جەتىسۋدا «جۇمىسشى ماماندىقتار جىلىنا» وراي قولعا الىنىپ جاتقان ءتۇرلى جوبالار اياسىندا «ەڭبەكپەن ەر اتانعان» كوش كەرۋەن مادەني ءىس-شارالارى باستالدى. اۋىل-ايماقتاعى ماماندىق يەلەرىن قاناتتاندىرۋ ماقساتىنداعى جوبا بارىسىندا تۇرعىندار اۋدان ورتالىعىنا جينالىپ, ءوز توپىراعىنان شىققان ەڭبەك مايتالماندارىنىڭ ەرلىگىن ناسيحاتتايدى. ارنايى كورمەلەر ۇيىمداستىرىلىپ, مارتەبەلى مامانداردىڭ ەڭبەگى ايشىقتالادى.
وبلىستىق مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋى-مەن قولعا الىنعان ءىس-شارادا ەڭبەكتىڭ قۇندىلىعىن ۇعىندىراتىن كىتاپتار مەن سۋرەتتەر كورمەسى ءوتتى. ودان بولەك, مۋزەي جادىگەرلەرىنەن كورمەلەر قويىلىپ, كونتسەرتتىك باعدارلامالار ۇسىنىلدى. بۇگىنگە دەيىن وسىنداي كوش كەرۋەن ەسكەلدى, كوكسۋ اۋداندارىندا بولىپ ءوتتى. ءىس-شارا بارىسىندا قارابۇلاق, بالپىق بي اۋىلدارىنداعى مادەنيەت ۇيلەرىندە س.سەيفۋللين اتىنداعى وبلىستىق ورتالىق كىتاپحانا «ادال ادام – ادال ەڭبەك – ادال تابىس» اتتى كىتاپ كورمەسىن ۇيىمداستىردى. ادەبيەتتەگى ەڭبەك ادامىنىڭ بەينەسىن اشاتىن كوركەم شىعارمالار دا كورمەدەن تابىلدى. كوش كەرۋەننىڭ قورىتىندىسىندا كونفەرەنتسيا ۇيىمداستىرىلىپ, ەڭبەك ادامدارىنا ارنالعان جۋرنال شىعارىلادى دەپ جوسپارلانىپ وتىر.
«جوبانىڭ ماقساتى – ەڭبەك ادامدارىنىڭ جەتىستىكتەرىن دارىپتەۋ, قوعامداعى ءرولىن كوتەرۋ, ەڭبەك ادامدارىنىڭ ومىرلىك جولىن ادەبيەت, ونەر تۋىندىلارى ارقىلى تانىتۋ. سول ارقىلى جاستاردى ەڭبەككە, ادالدىققا, جاۋاپكەرشىلىككە تاربيەلەۋ, ايماقتىڭ ەڭبەك داستۇرلەرىن جاڭعىرتۋ ءارى ساقتاۋ, جۇمىسشى ماماندىقتارىنىڭ تاريحى مەن زاماناۋي مۇمكىندىكتەرىن تانىستىرۋ», دەيدى حالىق شىعارماشىلىعى ورتالىعىنىڭ مامانى, اقىن جانگەلدى نەمەرەباەۆ.
جەتىسۋ وبلىسى