جاقىندا عانا شىمىلدىعى تۇرىلگەن «018-اۆتوبۋس» دەپ اتالاتىن پسيحولوگيالىق دراماعا مارتەبەلى كورەرمەن «ساكەن تەاترىنىڭ رەپەرتۋارىنا ەنگەن وزگەشە تۋىندى» دەپ باعا بەردى. سوعان قاراعاندا قازىبەك امانجول ەسىمدى جاس دراماتۋرگ قۇندىلىقتىڭ قۇلدىراعانىن, قوعامنىڭ دەرتىن توپتاپ كەلىپ ءبىر اۆتوبۋستىڭ ىشىنە سىيدىرا العانداي...
دراماتۋرگتىڭ ويىنداعىسىن ساحناعا ءساتتى الىپ شىققان شىعارما رەجيسسەرى ءبيبىاجار ديحاننىڭ كاسىبيلىگى دە ءرول ويناعانداي. مۇنداي بيىك دارەجەدە كوركەمدەي العانىنا دراماتۋرگتىڭ ءوزى دە قايران.
«ساكەن تەاترىنىڭ اكتەرلەرى پسيحولوگيالىق درامانىڭ بولمىسىن, ءمورالىن سەزىنىپ وينادى. ءتىپتى اكتەرلىك شەبەرلىكتەرى ارقىلى كەيىپكەرلەردى شىنايى ەتىپ كورسەتتى. ديالوگتەر وتە ءساتتى شىقتى. رەجيسسەرگە دە العىسىم شەكسىز. «مەن وسىنداي دۇنيەنى جازىپپىن-اۋ», دەپ تاڭعالعانىمدى نەسىنە جاسىرامىن؟» دەيدى قازىبەك امانجول.
پسيحولوگيالىق دراماداعى مارينانىڭ ءرولىن سايا بەكبوسىنوۆا, الينانى ايعانىم ايتباەۆا, ستۋدەنتتى نۇرتىلەك اسىلبەك, كەمپىردى گۇلنار بازارباەۆا, مولدانى راحات قوشجانوۆ, ءۇشىنشى ايەلدى ساياگۇل تاشىمبەكوۆا, ەكىنشى ەركەكتى تالعات سادىقوۆ, ەكىنشى ايەلدى ارۋجان كالەنوۆا, ءبىرىنشى ەركەكتى امانگەلدى مۇقاشەۆ, ءبىرىنشى ايەلدى ءنۇربيبى مۇقان, كاسىپكەردى باۋىرجان نۇرماعانبەتوۆ, ساۋداگەردى جاندوس شاكەن, زاكيردى احاي جۇمامۇراتوۆ ءساتتى سومداپ شىققان.
جول. جولاۋشى... جەر بەتىندەگى تىرشىلىك يەسىنىڭ بارلىعى دا – ءومىر ساپارىندا جۇرگەن جولاۋشى. ول ساپار بىردە ورگە باستايدى, ەندى بىردە تومەنگە قۇلديلايدى.
وزىندىك پلانەتا ىسپەتتى «018-اۆتوبۋستا» تاعدىرلارى توعىسقان ءار كەيىپكەردىڭ ءوز اقيقاتى بار. ادامدىق پەن ناداندىق, كەسىرلىك پەن كەساپاتتىق, ادالدىق پەن ارامدىق ارپالىسقا تۇسەتىن بۇرالاڭ جولدا اپاتتان امان قالعانىنىڭ دا, ارۋاققا اينالعانىنىڭ دا كورەرمەنگە ايتارى, سالار ويى نەگىزدى.
ءسويتىپ, شىعارماشىلىق ۇجىم «018-اۆتوبۋستا» تابىسقان ءتۇرلى تاعدىردان پسيحولوگيالىق پورترەتتەر گالەرەياسىن جاساپتى. اۆتوبۋس ىشىندەگى الەم ارقىلى بۇگىنگى قوعام كەلبەتىن بەدەرلەگەن.
اۆتوبۋستا مولدا, كاسىپكەر, ايەل, ورەكپىگەن جىگىت وتىرادى. اراسىندا جۇكتى ايەل دە بار. اڭگىمە اۆتوبۋستاعىلار جۇكتى ايەلدەردىڭ قوعامدىق كولىكتە قاتىناۋىنا نارازىلىق بىلدىرۋىنەن باستالادى. كيكىلجىڭ سودان ءوربيدى. مولدا بولسا ۋاعىزىن ايتىپ, كاسىپكەر بولسا بايلىعىن ايتىپ ماساتتانادى. ال ايەل جارالى جان سىرىن اقتارادى. ءوزىن اقتاۋ ءۇشىن قورشاعان ورتاسىن, قوعامدى كىنالايدى. ءىس ناسىرعا شاپقان سوڭ, قوعامدىق كولىكتەگى جاس دارىگەر جۇكتى ايەلدى باسقا كولىككە وتىرعىزىپ جىبەرەدى. درامانىڭ سوڭىندا 018-اۆتوبۋس جول اپاتىنا ءتۇسىپ, جولاۋشىلاردىڭ بارلىعى ءتىل تارتپاي كەتەدى. وسىلايشا, اۆتور ۇلكەن ومىرگە شىر ەتىپ كەلەتىن كىرشىكسىز نارەستەنى كىرلەگەن قوعامنان اراشالاپ, امان ساقتاپ قالادى.
ءيا, پسيحولوگيالىق دراما بىرنەشە بۋىننىڭ ساناسى دەرتكە ۇشىراعانىن جەتكىزگەندەي. تۇيىنىندە جاس ۇرپاقتى قوعام دەرتىنە ۇرىندىرماي ساقتاپ قالعانى كورەرمەن ساناسىنا ساۋلە قۇيعانداي اسەر بەردى.
قاراعاندى وبلىسى