بيىل وڭىردە 5 ملن 105 مىڭ گەكتار القاپقا تۇقىم سەبۋ جوسپارلانىپ وتىر: 3 ملن 673,6 مىڭ گەكتارعا بيداي, 342 مىڭ گەكتاردان اسا القاپقا ارپا سەبىلمەك. قالعان جەرگە مايلى جانە الەۋمەتتىك ماڭىزى بار وزگە دە داقىلدار ەگىلەدى.
«الداعى كوكتەمگى ەگىس, كۇزگى جيىن-تەرىم ناۋقانىنا ەل كولەمىندە 700 ملرد تەڭگە جەڭىلدەتىلگەن نەسيە قارجىسى ءبولىندى. پرەزيدەنت تاياۋدا نەعۇرلىم ءوتىمدى, نارىقتا جوعارى سۇرانىسقا يە داقىلداردى ءوسىرۋ, شيكىزاتتى ساقتاۋ جانە ونى تەرەڭدەتە وڭدەۋ, سونداي-اق ءونىمدى شەتەلدىك نارىققا كوبىرەك وتكىزۋدى رەتتەۋدى تاعى دا اتاپ ءوتتى. مەملەكەتتىك قولداۋ كولەمى جىل سايىن ءوسىپ كەلەدى. بيىل پرەزيدەنتتىڭ تىكەلەي تاپسىرماسىمەن اۋىل شارۋاشىلىعىن قارجىلاندىرۋ كولەمى رەسپۋبليكا بويىنشا ەكى ەسە ارتادى. وسى مۇمكىندىكتى ءتيىمدى پايدالانا ءبىلۋىمىز كەرەك», دەدى وبلىس اكىمى قۇمار اقساقالوۆ اۋىل شارۋاشىلىعى باسقارماسىنىڭ القا ماجىلىسىندە.
اۋىل شارۋاشىلىعى جانە جەر قاتىناستارى باسقارماسىنىڭ باسشىسى يبراگيم بەكمۇحامەدوۆتىڭ ايتۋىنشا, بيىل كوكتەمگى دالا جۇمىستارىن جۇرگىزۋگە 80,9 مىڭ توننا, كۇزگى جيىن-تەرىم جۇمىستارىنا 83,3 مىڭ توننا ديزەل وتىنى ءبولىندى. تاياۋدا Gosagro.kz اقپاراتتىق جۇيەسىندە جانارماي جەتكىزۋشى وپەراتورلاردىڭ ءتىزىمى جاريالانادى. فەرمەرلەر ديزەل وتىنىن جەتكىزۋشىنى وزدەرى تاڭداپ, ءوتىنىم بەرە الادى.
«اۋىل شارۋاشىلىعى قۇرىلىمدارىنىڭ الدىندا تۇرعان ماڭىزدى مىندەتتىڭ ءبىرى – ەگىس القاپتارىن ءارتاراپتاندىرۋ, مونوداقىلدان الشاقتاۋ. شارۋاشىلىقتار وسى ماسەلەگە باسا كوڭىل ءبولۋى كەرەك. سونداي-اق كەيىنگى كەزدە كارتوپ تاپشىلىعىن سەزىنىپ جاتىرمىز. سوندىقتان كارتوپ القابىن ۇلعايتا تۇسكەن ءجون. ءوڭىر ديقاندارىنىڭ الدىندا جۇگەرى جانە قاراقۇمىق القابىن كەڭەيتۋ مىندەتى تۇر. وسى ماسەلەگە دە مۇقيات قاراۋدى سۇرايمىز. قوستاناي ءوڭىرى مينەرالدى تىڭايتقىشتاردى پايدالانۋدان الدىڭعى قاتاردا كەلەدى. بىلتىر القاپقا 258,6 مىڭ توننا تىڭايتقىش شاشۋ كوزدەلگەن ەدى, بۇل جوسپار دا تولىق ورىندالدى. تەحنيكا پاركىن جاڭارتۋ ينديكاتورى دا ويداعىداي اتقارىلدى», دەدى اۋىل شارۋاشىلىعى ۆيتسە-ءمينيسترى ازات سۇلتانوۆ.
بيىل وڭىردە 755 مىڭ گەكتار القاپتى مايلى داقىل الادى. مال ازىعىنىڭ كولەمى 137,5 مىڭ گەكتارعا دەيىن ۇلعايادى. اۋىل شارۋاشىلىعى كاسىپورىندارى 21 مىڭ گەكتارعا قاراقۇمىق, 6,1 مىڭ گەكتارعا كارتوپ تۇقىمىن ەگۋدى جوسپارلاپ وتىر.
كەڭەس بارىسىندا مەملەكەتتىك قولداۋ تەتىكتەرىن ۋاقىتىندا ءارى ءتيىمدى پايدالانا ءبىلۋ ماسەلەسى دە تالقىلاندى. مىسالى, وتكەن جىلى ىسكە قوسىلعان «كەڭ دالا-2» باعدارلاماسى شارۋالارعا 5 پايىز جىلدىق وسىممەن جەڭىلدەتىلگەن نەسيە الۋعا مۇمكىندىك بەرەدى. نەسيە مەرزىمى – 12 ايعا دەيىن. نەسيە الاتىن كەپىلدىگى جوق فەرمەرلەر «دامۋ» كاسىپكەرلىكتى دامىتۋ قورىنان نەسيە سوماسىنىڭ 85 پايىزىن قۇرايتىن كەپىلدىك الا الادى.
«وسىلايشا, اۋىل شارۋاشىلىعى ءونىمىن وندىرۋشىگە كەپىلدىكتىڭ 15 پايىزىن قويۋ عانا قالادى. باستى ماقسات – اتالعان قولداۋ ءتۇرىن ءتيىمدى پايدالانا وتىرىپ, ءونىم كولەمىن ارتتىرۋدى قامتاماسىز ەتۋ. ءونىمنىڭ ارزانداپ كەتكەنىنە قاراماستان, وڭىردە جاقسى تابىسقا جەتىپ جاتقان شارۋاشىلىقتار از ەمەس. بۇل شارۋاشىلىقتار ەگىن القاپتارىن الدەقاشان ءارتاراپتاندىردى. مال شارۋاشىلىعىمەن دە اينالىسىپ جاتىر. اۋىل شارۋاشىلىعى قۇرىلىمدارىنا مەملەكەت قوماقتى قارجىلاي قولداۋ كورسەتىپ جاتىر», دەدى وبلىس اكىمى.
قوستاناي وبلىسى