ۇلىتاۋداعى اپات: كەنىشتە وپىرىلۋ بولماعان

ەستەرىڭىزگە سالا كەتەيىك, ۇلىتاۋ وبلىسىنداعى «جومارت» كەنىشىندەگى  قايعىلى وقيعاعا تاۋ جىنىسىنىڭ وپىرىلۋى سەبەپ بولعانى ايتىلعان ەدى. 

«العاشقى نۇسقادا قايعىلى وقيعاعا تاۋ جىنىسىنىڭ وپىرىلۋى سەبەپ بولعانى ايتىلدى. الايدا اپاتتان قۇتقارۋ توبى وپىرىلۋدىڭ بولماعانىن انىقتادى. كەنىشتەگى جۇمىس تەرگەۋ اياقتالعانعا دەيىن توقتاتىلدى. تابيعي گازدىڭ جارىلۋىنا نە سەبەپ بولعانى تالدانىپ جاتىر. كومپانيا ۇكىمەتتىك كوميسسيامەن جانە تەرگەۋ ورگاندارىمەن قويان-قولتىق جۇمىس ىستەۋدە جانە قولدانىستاعى قاۋىپسىزدىك ستاندارتتارىنا تۇزەتۋ ەنگىزۋدى جوسپارلاپ وتىر», دەلىنگەن حابارلامادا.

سونىمەن قاتار قايعىلى وقيعاعا بايلانىستى «قازاقمىس» كومپانياسى قازا تاپقان جۇمىسكەرلەردىڭ وتباسىن قولداۋ ءۇشىن شۇعىل ارەكەت ەتىپ, ناقتى شارا قابىلدادى. ءىس بارىسىندا ىشكى شتاب قۇرىلىپ, وتەماقى تولەۋ, مايىتتەردى تاسىمالداۋ, نەسيە بويىنشا مىندەتتەمەلەردى ورىنداۋ جانە وتباسى مۇشەلەرىن جۇمىسپەن قامتۋ ماسەلەلەرى نازارعا الىندى.

كومپانيا باسشىلىعى قازا تاپقان كەنشىلەردىڭ ۇيلەرىنە بارىپ, وتباسىنا كوڭىل ايتتى. سونداي-اق, ەلىمىزدىڭ ءتۇرلى وڭىرلەرىنە مايىتتەردى جەتكىزۋ شىعىنىن ءوز موينىنا الدى. جاقىن تۋىستارىنىڭ ءوتىنىشى بويىنشا ءۇش كەنشىنىڭ ءمايىتى تۇركىستان, قاراعاندى وبلىستارىنا, قالعاندارى جەزقازعان, ساتباەۆ قالالارىنا جەتكىزىلگەن.