24 مامىردا “نۇر وتان” حدپ پارتيا قىزمەتىن باسپاسوزدە ۇزدىك ناسيحاتتاعان جۋرناليستەر اراسىندا وتكىزىلگەن “نۇر سۇڭقار” رەسپۋبليكالىق سايىسىنىڭ قورىتىندىسىن جاريالادى. سالتاناتتى ماراپاتتاۋ ءراسىمى استانا قالاسىنداعى كونگرەسس-حولل سارايىندا ءوتتى.
“نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين: “سىزدەرگە بىردەن ايتا كەتەيىن, ساياسي كەڭەس بيۋروسىنىڭ شەشىمىمەن, بۇل سايىس جىل سايىنعى ءداستۇرلى شاراعا اينالادى. سىزدەردىڭ ەڭبەكتەرىڭىز ءبىزدىڭ مەملەكەتىمىز ءۇشىن, حالقىمىز ءۇشىن, تاۋەلسىز قازاقستانىمىز ءۇشىن وتە ماڭىزدى دا جاۋاپتى. سىزدەردىڭ ەلىمىزدىڭ ساياسي تۇراقتىلىعى, بىرلىگى, الەۋمەتتىك-ەكونوميكالىق, رۋحاني دامۋى جولىندا قوسىپ جاتقان ۇلەستەرىڭىز وتە زور. سول ءۇشىن ەلباسىمىز, پارتيامىزدىڭ توراعاسى نۇرسۇلتان ءابىش ۇلى نازارباەۆ ەلىمىزدەگى بۇقارالىق اقپارات قۇرالدارىنا ەرەكشە نازار اۋدارىپ, بارلىق جاعىنان قولداۋ كورسەتىپ كەلەدى. وسى ۋاقىتقا دەيىن سىزدەر, بۇقارالىق اقپارات قۇرالدارى وكىلدەرى, پرەزيدەنتىمىزبەن بىرگە بولدىڭىزدار جانە بولاشاقتا دا سولاي بولىپ قالا بەرەتىندەرىڭىزگە كۇمان جوق”, دەي كەلىپ, “نۇر سۇڭقار” سايىسىنىڭ ءبىزدىڭ ەلىمىزدە جۋرناليستيكانى ودان ءارى دامىتۋدى ىنتالاندىرا تۇسەتىنىنە سەنىم ءبىلدىردى.
“نۇر سۇڭقار” سايىسى جۋرناليستەر اراسىندا “نۇر وتان” پارتياسىنىڭ قىزمەتىن ناسيحاتتاۋ, تۇرعىنداردى پارتيا قىزمەتىمەن كەڭ كولەمدە اقپاراتتاندىرۋ, جۋرناليستەردىڭ شىعارماشىلىق قابىلەتىن شىڭداۋ جانە ىنتالاندىرۋ ماقساتىندا بىرنەشە اتالىمدار بويىنشا وتكىزىلدى.
“ناش دەپۋتات” – ء“بىزدىڭ دەپۋتات” اتالىمى بويىنشا ۇزدىك دەپ تانىلعان قوس ءجۋرناليستىڭ قاتارىندا “ەگەمەن قازاقستان” اق ءتىلشىسى انار تولەۋحانقىزى ماراپاتتالدى. ال سايىستىڭ باس جۇلدەسىن “حابار” اگەنتتىگىنىڭ جۋرناليسى الەكساندر اكسيۋتيتس قانجىعاسىنا بايلاپ, وعان پاتەر كىلتى تابىس ەتىلدى.
“ەگەمەن-اقپارات”.