17 اقپان كۇنى ۇلىتاۋ وبلىسىنداعى «جومارت» شاحتاسىندا 7 جۇمىسشى بايلانىسسىز قالعان ەدى, دەپ جازادى Egemen.kz.
تجم كەشە 21:49-دا وقيعا ورنىنا ۇلىتاۋ جانە قاراعاندى وبلىستارىنىڭ توتەنشە جاعدايلار دەپارتامەنتى (تجد) قىزمەتكەرلەرى, كينولوگيالىق ەسەپتوپتار, اپاتتار مەديتسيناسى ورتالىعىنىڭ دارىگەرلەرى مەن قازاقستان تجم پسيحولوگتارى جىبەرىلگەنىن حابارلاعان.
اۆاريالىق-قۇتقارۋ ناتيجەسىندە 18 اقپان ساعات 3:27-دە الدىمەن التى كەنشىنىڭ دەنەسى تابىلدى. ولاردىڭ جەكە باسىن انىقتاۋ شاراسى دەرەۋ قولعا الىنعان. تجم جەتىنشى كەنشىنىڭ دەنەسىنىڭ تابىلعانىن 7:27 -دە مالىمدەدى.
شاحتانىڭ وپىرىلۋى سەبەپتەرىن انىقتاۋ جانە زارداپ شەككەندەرگە كومەك كورسەتۋ جونىندە ۇكىمەتتىك ارنايى كوميسسيا قۇرىلدى.
كوميسسيانى پرەمەر-ءمينيستردىڭ ورىنباسارى ق.بوزىمباەۆ باسقارادى.ۆيتسە-پرەمەرگە مەملەكەتتىك ورگاندار مەن ۇيىمداردىڭ جۇمىسىن ۇيلەستىرۋ ءۇشىن تج ورنىنا شۇعىل بارۋ تاپسىرىلدى.
قايعىلى وقيعاعا بايلانىستى مەملەكەت باسشىسى قازا بولعانداردىڭ وتباسىنا كوڭىل ايتۋ جەدەلحاتىن جولداپ, ءتيىستى ماتەريالدىق قولداۋ كورسەتىلەتىنىن ايتتى. مەملەكەت باسشىسى ۇكىمەتكە توتەنشە جاعدايدىڭ ءمان-جايىن مۇقيات تەكسەرۋ جونىندە مىندەت جۇكتەدى.سالالىق ۆەدومستۆولار مەن ءوڭىر اكىمدىگىنە مارقۇمداردىڭ وتباسىلارىنا بارلىق قاجەتتى كومەك كورسەتۋ تۋرالى تاپسىرما بەرىلدى.
ۇلىتاۋ وبلىستىق پوليتسيا باسقارماسى قايعىلى وقيعاعا بايلانىستى قىلمىستىق ءىس قوزعالعانىن حابارلادى.
«قازاقمىستىڭ» ءباسپاسوز قىزمەتى «جومارت» كەنىشىندە توتەنشە جاعدايعا الدىن الا مالىمەتتەر بويىنشا تابيعي گازدىڭ جارىلۋى سەبەپ بولۋى مۇمكىن ەكەنىن مالىمدەدى.