ءباسپاسوز كۇنىنە وراي مادەنيەت مينيسترلىگىنىڭ ءتىل كوميتەتى “مەملەكەتتىك ءتىل جانە بۇقارالىق اقپارات قۇرالدارى” اتتى رەسپۋبليكالىق كونكۋرس جەڭىمپازدارىن ماراپاتتاۋ ءراسىمىن وتكىزدى.بۇل كونكۋرسقا ەلىمىزدىڭ قوعامدىق ومىرىندە مەملەكەتتىك ءتىلدىڭ قىزمەت ەتۋ اياسىن كەڭەيتۋ مەن مارتەبەسىن نىعايتۋ باعىتىندا مەملەكەتتىك ءتىلدىڭ احۋالى تۋرالى وتكىر دە وزەكتى سىني ماتەريالدار جاريالاعان جەكەلەگەن تىلشىلەر مەن شىعارماشىلىق توپتار جانە بۇقارالىق اقپارات قۇرالدارى قاتىسقان بولاتىن.
“ۇزدىك باسىلىم”, “ۇزدىك تەلەارنا”, “ۇزدىك راديو”, “ۇزدىك سايت” جانە “ۇزدىك اۆتور” نوميناتسيالارى بويىنشا جەڭىمپاز اتانعاندار مينيسترلىكتىڭ ارنايى ديپلومدارىمەن جانە قارجىلاي سىيلىقتارمەن ماراپاتتالسا, ءبىر توپ جۋرناليست بۇقارالىق اقپارات قۇرالدارى تاراپىنان ارنايى كادەگە يە بولدى. سونداي-اق ءمادەنيەت مينيسترلىگى ەلىمىزدىڭ رۋحاني ومىرىنە اتسالىسقان بۇقارالىق اقپارات وكىلدەرىنە “مادەنيەت قايراتكەرى” توسبەلگىسىن تابىس ەتتى. ارىپتەستەرىمىز – “ەگەمەن قازاقستان” رەسپۋبليكالىق گازەتىنىڭ جاۋاپتى حاتشىسى جانات ەلشىبەك پەن گازەت شولۋشىسى سۇلەيمەن مامەت “مادەنيەت قايراتكەرى” بەلگىسىنىڭ يەسى اتاندى.
بەرىك سادىر.