تاۋ-كەن مەتاللۋرگيا كەشەنى سالاسىنداعى ەڭ بەدەلدى «التىن گەفەست» سالالىق بايقاۋىنىڭ قورىتىندىسى شىعارىلدى. ۇيىمداستىرۋ كوميتەتى تاراپىنان بارلىعى 12 اتالىم بويىنشا 110 ءوتىنىم قارالعان بولاتىن. وسىلايشا, جەڭىمپازدارعا تمك ۇزدىك كاسىپورىندارى مەن قىزمەتكەرلەرىنە, سونداي-اق, جوبالىق, عىلىمي, وقۋ مەكەمەلەرىنىڭ ماماندارىنا جانە جۋرناليستەرگە بەرىلەتىن «التىن گەفەست» سىيلىعى تابىس ەتىلدى.
وسى سالا بويىنشا تىڭ ءناتيجەلەرگە قول جەتكىزگەن, وزىق ۇلگى كورسەتكەن ماماندارعا, سونداي-اق, جوبالىق, عىلىمي, وقۋ مەكەمەلەرىنىڭ قىزمەتكەرلەرىنە, جۋرناليستەرگە بەرىلەتىن ۇلتتىق سىيلىق بولىپ تابىلاتىن «التىن گەفەستى» الۋ كىمگە بولسا دا ۇلكەن مارتەبە ەكەندىگى اقيقات.
بۇل رەتتە اتالعان بايقاۋ ءتاجىريبەلەردىڭ جەتىلۋىنە, ولاردىڭ دامۋى مەن ارتۋىنا جاعداي جاساپ, تاۋ-كەن مەتاللۋرگيا سالاسىنىڭ دارىپتەلۋى مەن بەدەلىن وسىرۋگە سەپتەسەدى. كاسىپورىندار اراسىنداعى «2015 جىلدىڭ جوباسى», «يننوۆاتسيالار بويىنشا 2015 جىلدىڭ كوشباسشىسى», «قازاقستاندىق قامتۋ بويىنشا 2015 جىلدىڭ كوشباسشىسى» اتتى ءۇش اتالىمدا 13 كومپانيا باق سىناسقان بولاتىن. ال بۇل ماراپات جىل سايىنعى «AstanaMining&Metallurgy 2015» VI حالىقارالىق تاۋ-كەن مەتاللۋرگيا كونگرەسىنىڭ نەگىزگى وقيعالارىنىڭ ءبىرى ەكەندىگى بەلگىلى. تۇراقتى قاتىسۋشىلاردىڭ ىشىندە «كازتسينك», «KSPSteel», «ەۆرازكاسپيان ستال», «كازحروم», «قازاقمىس» كومپانيالارىنىڭ قىزمەتكەرلەرى, تاۋ-كەن جانە مەتاللۋرگيا وقۋ ورىندارىنىڭ وقىتۋشىلارى مەن ستۋدەنتتەرى, باق وكىلدەرى جانە تاعى باسقالار بار.
«2015 جىل جوباسى» اتالىمىنا اقتوبە رەلس-ارقالىق زاۋىتى باقىلاۋ كەڭەسىنىڭ مۇشەسى كيريلل كيريچەنكو يە بولسا, «يننوۆاتسيا بويىنشا 2015 جىل كوشباسشىسى» يۋرازيا ەنەردجي حولدينگس كومپانياسىنىڭ استانا وكىلدىگىنىڭ ديرەكتورى بولات دوسان, «قازاقستاندىق قامتۋ بويىنشا 2015 جىلدىڭ كوشباسشىسى» ەر-تاي جشس باسقارۋشى ديرەكتورى ەرمەك جاناسوۆ ماراپاتتالدى.
ال «2015 جىلدىڭ گەولوگى», «2015 جىلدىڭ مەتاللۋرگى», «2015 جىلدىڭ ديپلومدىق جۇمىسى» مەن «2015 جىلدىڭ كەنشىسى» اتالىمدارى بويىنشا دا ءبىرشاما ماماندار باق سىناسقان. سونىمەن قاتار, قالىپتاسقان ءداستۇر بويىنشا جۋرناليستەر اراسىندا دا «قازاقستاننىڭ تمك سالاسى تۋرالى باسپاسوزدەگى ۇزدىك جۋرناليستىك جۇمىس», «قازاقستاننىڭ تمك سالاسى تۋرالى تەلەديدارداعى ۇزدىك جۋرناليستىك جۇمىس», «تمك سالاسىنداعى «ەڭبەك ادامى» تۋرالى ۇزدىك ماتەريال» اتتى اتالىمدار جەڭىمپازدارى دا بەلگىلى بولدى.
ايتا كەتەيىك, «التىن گەفەست» سىيلىعىنىڭ جەڭىمپازدارى ءداستۇرلى تۇردە قازىلار القاسىنىڭ جابىق تالقىلاۋىندا انىقتالدى. ولاردىڭ قۇرامىنا سالانىڭ ەڭ بەدەلدى ماماندارى كىرەدى.
ەلميرا ماتىباەۆا,
«ەگەمەن قازاقستان».