اۋىل شارۋاشىلىعى مينيسترلىگى «جۇمىسشى ماماندىقتار قالاسى» فەستيۆالىندەگى اگرارشىلار كوشەسىن «Ecoculture-Eurasia» جشس, «اگروماشحولدينگ KZ», «ەۆرازيا اگرو سەمەي» جشس, Qazsut ءسۇت پالاتاسى, Westfalie, قازاقستاننىڭ جۇمىرتقا وندىرۋشىلەر قاۋىمداستىعى, قازاقستان قۇس وسىرۋشىلەر وداعى جانە سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى سەكىلدى ستراتەگيالىق سەرىكتەستەرىمەن بىرلەسىپ ۇيىمداستىرعان, دەپ حابارلايدى Egemen.kz.
ەگىنشىلىك, مال شارۋاشىلىعى, مەحانيزاتورلار پاۆيلوندارى ورناتىلىپ, سالانىڭ جەتىستىكتەرى كورسەتىلگەن «اگرارشىلار كوشەسىنە» كەلۋشىلەر زاماناۋي اگرارلىق تەحنولوگيالارمەن تانىسىپ, تراكتور جۇرگىزۋ سيمۋلياتورىن سىناقتان وتكىزىپ, يننوۆاتسيالىق ساۋ جابدىعىن كورىپ, جىلىجاي كەشەنىنە 3D-تۋر جاساي الادى جانە باسقا دا قىزىقتى تاجىريبەلەرگە قاتىسا الادى.
اۋىل شارۋاشىلىعى مينيسترلىگىنىڭ ءباسپاسوز قىزمەتىنىڭ مالىمدەۋىنشە اتالعان ۆەدومستۆو, ۇاعببو جانە سەيفۋللين اتىنداعى قازاتزۋ بىرلەسىپ «اوك ماماندارى: مەملەكەت, بيزنەس جانە ءبىلىم ءرولى» تاقىرىبىندا پانەلدىك پىكىرتالاس ۇيىمداستىرعان. وندا سالانى كادرلىق قامتاماسىز ەتۋ ماسەلەلەرى, اۋىل شارۋاشىلىعىنىڭ دامۋىنداعى زاماناۋي ۇردىستەر, تسيفرلىق تەحنولوگيالار مەن بولاشاق ماماندارىنىڭ اوك تيىمدىلىگىن ارتتىرۋداعى ءرولى تالقىلانعان.
اگرارلىق ءوندىرىستى جەدەل يندۋستريالاندىرۋدىڭ ماڭىزدىلىعىنا ەرەكشە نازار اۋدارىلدى. بۇل تەحنيكالىق جابدىقتالۋدى ارتتىرۋ, عىلىمي نەگىزدەلگەن اگروتەحنولوگيالاردى ەنگىزۋ, عىلىمي قولداۋ مەن يننوۆاتسيالىق ازىرلەمەلەردى كۇشەيتۋ, سونداي-اق ناقتى سەكتوردىڭ قاجەتتىلىكتەرىنە ساي كادر دايارلاۋ جۇيەسىن دامىتۋ ارقىلى جۇزەگە اسۋى ءتيىس.
13 اقپانداعى مالىمەت بويىنشا «جۇمىسشى ماماندىقتار قالاسى» فەستيۆالىندەگى اگرارشىلار كوشەسىن 16 مىڭ ادام تاماشالاعان.