اكادەميك كامال ورمانتاەۆ تۋرالى كوپ ايتىلدى, كوپ جازىلدى, ءتىپتى فيلم دە ءتۇسىرىلدى. ول – ەلىمىزدەگى بالالار حيرۋرگياسىنىڭ نەگىزىن قالاعان دارىگەر, مىڭداعان بالانىڭ ءومىرىن قۇتقارىپ, ولاردىڭ تاعدىرىنا اسەر ەتكەن تۇلعا. اتا-انالارعا ءۇمىت, بالالارعا ءومىر سىيلاعان عالىمعا قانداي قۇرمەت كورسەتسەك تە ارتىق ەمەس.
اكادەميك مەديتسينادا ءوز مەكتەبىن قالىپتاستىردى, شاكىرت تاربيەلەدى. ونىڭ وقۋشىلارى بۇگىندە پروفەسسور, دوتسەنت, بىلىكتى مامان اتانىپ, ۇستازىنىڭ ءىسىن جالعاستىرىپ كەلەدى. بۇلاردىڭ كوبى – قاراپايىم اۋىلدان شىققان ازاماتتار. كامال ءسارۋار ۇلى سىر وڭىرىندە تۋسا دا, تۇتاس قازاقتىڭ, ءتىپتى الەمنىڭ دارىگەرى, عالىمى بولا الدى.
پروفەسسور ك.ورمانتاەۆتى قازاق ۇلتتىق مەديتسينا ۋنيۆەرسيتەتى ۇجىمى قايبىر جىلى ء«ححى عاسىردىڭ اۆيتسەنناسى» اتاعىمەن ماراپاتتادى.
ول شىن مانىندە ۇلى دارىگەر, عالىم, ۇستاز بولدى. ونىڭ ەڭبەكتەرى ارقاشان سۇرانىسقا يە. ستۋدەنتتەر مەن دارىگەرلەر كامال ءسارۋار ۇلىنىڭ وقۋلىقتارىن ىزدەپ وقيدى. ناعىز عالىمنىڭ جازعانى شاڭ باسپايدى.
اكادەميكتىڭ مەرەيتويىنا ارنالعان دەرەكتى فيلمدە ونى د.سەليندجەردىڭ «جار جاعالاعان جالعىز» رومانىنداعى كەيىپكەرگە تەڭەگەن ەدىم. رومانداعى كەيىپكەر بالالاردى قۇتقارۋدى ارمانداسا, كامال ءسارۋار ۇلى شىن مانىندە مىڭداعان بالانىڭ ءومىرىن ساقتاپ قالدى. ول – ناعىز دارىگەر, ءوز ءىسىنىڭ جاناشىرى, ۇستاز, اكادەميك. ول اشىق سويلەيتىن, كەيدە قاتال دا كورىنەتىن. بىراق ءاردايىم ادال بولاتىن. وسى قاسيەتى جاڭا ۇرپاققا دا بۇيىرسىن دەيمىز.
تالعات مومىنوۆ,
ۇعا اكادەميگى