«سالاماتتى قازاقستان» پويىزى وتكەن جىلى ءوڭىر-ءوڭىردى ارالاپ, اۋىل تۇرعىندارىنا مەديتسينالىق كومەك كورسەتتى. مامىر ايىندا جولعا شىققان پويىز جىل اياعىنا دەيىن 17 وبلىستاعى ستاتسيونارلىق مەديتسينالىق پۋنكتى جوق اۋداندارعا قاتىناپ ۇلگەردى. مەديتسينا ماماندارىنان قۇرالعان توپ جۇمىسىن سۋ تاسقىنىمەن الىسقان ەلدىڭ باتىسىنداعى ولكەلەردەن باستاعانى دا ۇتىمدى شەشىم بولدى.
«Samruk-Kazyna Trust» قورى «سامۇرىق-قازىنا» كومپانيالار توبى اتىنان الەۋمەتتىك جوبالاردى ىسكە اسىراتىن بىرىڭعاي قايىرىمدىلىق وپەراتورى سانالادى. قور ينكليۋزيا, دەنساۋلىق ساقتاۋ, ءبىلىم, سپورت, مادەنيەت سەكىلدى بىرنەشە باسىم باعىتتار بويىنشا ەلىمىزدىڭ بارلىق وڭىرىندە ءتۇرلى جوبالاردى ىسكە اسىرىپ كەلەدى. وسىنداي الەۋمەتتىك ماڭىزدى جوبالاردىڭ ءبىرى – «سالاماتتى قازاقستان» پويىزى. جوبا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, «سامۇرىق-قازىنا» قورى, دەنساۋلىق ساقتاۋ مينيسترلىگى, «الەۋمەتتىك جوبالار قورىنىڭ» ءوزارا ىنتىماقتاستىعى نەگىزىندە ۇيلەسىم تاپقان.
مەديتسينالىق پويىز جۇمىسىن سۋ تاسقىنىنا بايلانىستى باتىس وڭىرلەردەن باستاپ, جەتىسۋ وبلىسىندا اياقتادى. 121 ستانسانى قامتىپ, 140 شالعاي ەلدى مەكەنگە ايالداپ, 21 مىڭنان استام شاقىرىمدى ءجۇرىپ ءوتتى. بۇرناعى جىلى 35 مامان قىزمەت اتقارسا, بىلتىر 40 مامان تارتىلدى. ولاردىڭ اراسىندا دارىگەرلەر, مەدياتورلار مەن زاڭگەرلەر بولدى. سەبەبى ۇيىمداستىرۋشىلار كەم دەگەندە 100 مىڭ حالىققا جاردەمدەسۋدى ۇيعارىپتى. سايكەسىنشە, مەجە تولىعىمەن ورىندالىپ, كومەك العان تۇرعىندار سانى الدىڭعى جىلمەن سالىستىرعاندا 12 مىڭعا ارتىق بولعان. ءسويتىپ, 104 250 اۋىل تۇرعىنىنا مەديتسينالىق, قۇقىقتىق كومەك كورسەتىلدى. ونىڭ ىشىندە دارىگەرلەر 101 مىڭنان استام ازاماتقا تەگىن مەديتسينالىق كومەك كورسەتتى. ولاردىڭ 54 334-ءى ايەل, 23 685-ءى ەر, 23 282-ءى بالا.
پويىز ءار ستانساعا توقتاپ, جەرگىلىكتى حالىققا دارىگەرلەر تولىق جالپى جانە بيوحيميالىق تالداۋ, فليۋوروگرافيا, ىشكى ورگاندار مەن تامىرلاردى ۋلترادىبىستىق زەرتتەۋ سياقتى ءتۇرلى مەديتسينالىق كومەك كورسەتتى. پويىزدا مەديتسينالىق قۇرال-جابدىقتار جاڭارتىلعان. تۇرعىنداردىڭ باسىم بولىگى جالپى مەديتسينا دارىگەرى مەن تەراپەۆتكە (77 104), نەۆروپاتولوگ (16 382) پەن وفتالمولوگ (15 529) سىندى ماماندارعا قارالعان. مەديتسينالىق پويىزدا دارىگەرلەر 7671 شاعىن وپەراتسيا جاساعان. وڭىرلەر بولىنىسىندە وڭتۇستىك پەن باتىس ولكەدەگى تۇرعىندارعا ەڭ كوپ مەديتسينالىق قىزمەتتەر ۇسىنىلدى.
«Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا ءباسپاسوز ءماسليحاتىندا مەديتسينالىق پويىزدىڭ بيىلعى ناتيجەلەرى جونىندە حابارلادى.
«سالاماتتى قازاقستان» جوباسىنا ەكىنشى جىل قاتارىنان مەدياتورلار مەن زاڭگەرلەر قاتىستى. پويىزدا 6 بىلىكتى مامان, ياعني 3 زاڭگەر مەن 3 مەدياتور بولدى. ناتيجەسىندە, 2 949 ازاماتتىڭ ارىزى قاراستىرىلدى, ونىڭ 1844-ءى مەدياتورعا تۇسكەن ءوتىنىش بولسا, 1105-ءى زاڭگەرگە قاتىستى سۇراقتار بولدى. بارلىعى 1630 ەر ادام, 1 298 ايەل جەكە ماسەلەلەرىمەن مامانداردىڭ كومەگىنە جۇگىندى. تۇرعىنداردان قارىز بەن بانكتەن الىنعان نەسيەلەرگە قاتىستى سۇراق كوپ تۇسكەن. وبلىستار اراسىندا ەڭ كوپ سۇراق ماڭعىستاۋ (1061), اباي, شىعىس قازاقستان وبلىستارى (466), باتىس قازاقستان (304) وبلىستارىنىڭ تۇرعىندارىنان ءتۇستى. اڭعارعانىمىز, جىل سايىن مامانداردىڭ قىزمەتىنە سۇرانىس جوعارىلاپ كەلەدى», دەدى ا.اديەۆا.
ەلدە ەكىنشى دەڭگەيلى بانكتەر مەن شاعىن قارجى ۇيىمدارى الدىنداعى وتەلمەگەن قارىز ماسەلەسى, ءتۇرلى اكىمشىلىك-قۇقىقتىق داۋلار وزەكتى بولىپ وتىر. 9 ملن 660 مىڭ تەڭگە كولەمىندە تولەنبەگەن 12 اليمەنت ءىسى بويىنشا شاعىم تۇسكەن. وسى ورايدا پويىز قىزمەتكەرلەرى 481 ازاماتتىڭ 260 ملن تەڭگە سوماداعى نەسيەلەرىنە يكەمدى كەستە جاساۋعا جاردەمدەستى. 26 ازاماتتىق, 27 قىلمىستىق ءىس مەدياتسيا اياسىندا توقتاتىلدى. زاڭگەر مەن مەدياتور ءتۇرلى الەۋمەتتىك, قۇقىقتىق ماسەلەلەرگە قاتىستى سوتقا 120 شاعىم ازىرلەپ, قولداۋ كورسەتتى. مۇنىڭ ءبارى «سالاماتتى قازاقستان» مەديتسينالىق پويىزىنىڭ اياسىندا تۇرعىندارعا كورسەتىلەتىن كومەك تۇرلەرى كەڭەيىپ كەلە جاتقانىن دالەلدەيدى.