قاڭتاردىڭ ورتاسىنان باستاپ اباي وبلىسىندا قىس قاھارىنا ءمىنىپ, ءبىر جاعىنان ساقىلداعان اياز قىسىپ, ەكىنشى جاعىنان اقتۇتەك بوراننىڭ باستالعانى ايماق حالقىنا اۋىرلىق سالعانى انىق. جەرگىلىكتى بيلىك ورىندارى باقىلاۋدى قولىنا الىپ بارىنشا وبلىس جۇرتشىلىعىنا جاعداي جاساۋعا كۇش سالىپ كەلەدى. مۇنداي شارالاردان وڭىردەگى ءىرى كاسىپورىندار دا تىس قالماي يەلىگىندەگى تەحنيكانى ەل يگىلىگىنە جۇمساۋ ءۇشىن تابيعاتتىڭ توسىن مىنەزىمەن كۇرەسىپ, كوپشىلىك ىسكە بەل شەشىپ كىرىستى.
جاقىندا سونداي مەكەمەنىڭ ءبىرى وڭىرگە بەلگىلى ءىرى كاسىپورىندار تىزىمىندەگى «KAZ Minerals Aktogay» كومپانياسى كۇرە جولداردى كۇرتىك قاردان تازارتىپ, قار قۇرساۋىندا قالعان كولىكتەردى شىعارىپ, اقتوعاي كەنتى ماڭىندا قولايسىز جاعدايعا دۋشار بولعان جۇرتشىلىققا كومەك قولىن سوزدى. 5 اقپاننان 6 اقپانعا قاراعان ءتۇنى وبلىستىق ماڭىزى بار R-129 اۆتوموبيل جولىندا كولىك قوزعالىسىن قيىنداتقان جاعدايدان حاباردار بولعان كومپانيا قىزمەتكەرلەرى قولاستىنداعى اۋىر تەحنيكالاردى پايدالانىپ قالىڭ قار باسىپ قالعان جولداردى تازارتۋعا كىرىسكەن. كومپانيا قىزمەتكەرلەرىنىڭ ەلگەزەكتىگىنىڭ ارقاسىندا جولدا قالعان 15-تەن استام جۇك كولىگى مەن بىرنەشە جەڭىل اۆتوموبيل قار قۇرساۋىنان قۇتقارىلعان.
بۇدان بولەك جەرگىلىكتى اتقارۋشى ورگاندار مەن تۇرعىنداردىڭ ءوتىنىشى بويىنشا اقتوعاي كەنتىنەن رەسپۋبليكالىق تاسجولعا قاراي 60 شاقىرىمنان استام ۋچاسكە تازارتىلعان.
قازىرگى ۋاقىتتا بارلىق كولىك قوزعالىسى قالپىنا كەلتىرىلدى. R-129 تراسساسى بىرنەشە ەلدى مەكەندەردى اۋدان جانە وبلىس ورتالىقتارىمەن بايلانىستىراتىن جالعىز جول. سوندىقتان ترافيكتى قالپىنا كەلتىرۋ جانە ۋچاسكەنىڭ قاۋىپسىزدىگىن قامتاماسىز ەتۋ ءۇشىن جولدى تازارتۋ بويىنشا جەدەل شارالار وتە ماڭىزدى ەكەنى انىق.