«لەنينگرادتىق ورەنىم» كورمەسى اشىلدى

قارۋلى كۇشتەر ۇلتتىق اسكەري-پاتريوتتىق ورتا­لى­­عىندا وتكەن كور­مە­نىڭ اشىلۋ سالتاناتىنا قور­عا­نىس ءمينيسترىنىڭ ورىنباسارى, گەنەرال-مايور شايح-حاسان جازىقباەۆ, لەنينگراد قورشاۋىندا بول­عان ازاماتتار, قارۋلى كۇشتەردىڭ اردا­­گەرلەرى, ارميا گەنەرالى ساعادات نۇرماعامبەتوۆ اتىنداعى اس­كەري كوللەدج كادەت­تەرى, «جاس سار­باز» بالا­لار-جاسوسپىرىمدەر قوز­عا­لى­­­سى­نىڭ تاربيەلەنۋشىلەرى قاتىس­تى.

كورمەگە كەلۋشىلەرگە ەكىنشى دۇنيەجۇزىلىك سوعىسقا قاتىسۋ­شى­لار­دىڭ فوتوسۋرەتتەرى, لەنينگراد اۋما­عىنداعى شاي­قاس ورىندارىنان تابىلعان سنارياد قالدىقتارى, جاۋىن­گەرلەردىڭ قۇجاتتارى مەن جەكە زاتتارى سىندى جادىگەرلەر كور­سەتىلدى.

– لەنينگرادتى جاۋعا بەرمەۋ ءۇشىن ونى ەرلىكپەن قورعاعان جىلدار ەكىنشى دۇنيەجۇزىلىك سوعىس تاريحىندا ەرەكشە ورىن الادى. قالا ءۇشىن شايقاس 900 كۇنگە سوزىلدى, ول شايقاستاردا جاۋىنگەرلەر عانا ەمەس, كوپتەگەن بەيبىت تۇرعىن دا قازا تاپتى. ءبىزدىڭ ەلىمىز دە نەۆا وزەنىنىڭ جاعاسىندا ورنالاسقان قالانى ازات ەتۋگە ەلەۋلى ۇلەس قوستى. اتاپ ايتقاندا, ءبىزدىڭ ەلدە قۇرىلعان اسكەري بولىمدەردىڭ ۇشتەن ءبىرى شايقاسقا قاتىستى. ولاردىڭ ىشىندە 310 جانە 314-اتقىشتار ديۆيزياسى دا بار, – دەدى گەنەرال-مايور شايح-حاسان جازىقباەۆ.

سونداي-اق مينيستر ورىنباسارى ءىس-شارا بارىسىندا مەرگەن سارسەمباي رۇستەمبەكوۆتىڭ, بولىم­شە كومانديرى جولداس ارىقباەۆ­تىڭ, پۋلەمەتشى اعا لەيتەنانت تاستاق نازاروۆتىڭ, قاتارداعى جاۋىن­­­گەر يلگيز تاسباەۆتىڭ, اعا سەر­­­جانتتار يۆان گۋز بەن شانحان قوسوەۆتىڭ سوعىستا كورسەتكەن ەرلىك­تەرىن ەرەكشە اتاپ ءوتتى.

كەڭەس اسكەرىنىڭ لەنينگرادتا كورسەتكەن ەرلىگىن ۇلى اقىن جامبىل جاباەۆ ءوز شىعارما­لا­رىندا جىر­لا­­عانىن ءبارىمىز بىلەمىز. ونىڭ «لەنينگراد­تىق ورەنىم» اتتى ولەڭىن قازاق­ستاننىڭ ەڭبەك سىڭىر­گەن قايراتكەرى, قارۋلى كۇشتەر ورتالىق ءانسامبلىنىڭ ءسوليسى نۇرلان نۇرتازين وقىدى.

نۇرداۋلەت كارىباي,

ق.ا.ياساۋي اتىنداعى حقتۋ ستۋدەنتى