بىلتىر دارىلىك پرەپاراتتارعا باعا بەلگىلەۋ جۇيەسىن جەتىلدىرۋ ماسەلەسى بىرنەشە رەت تالقىلاندى. ءدارى-دارمەكتەردىڭ وبەكتيۆتى قۇنىن قالىپتاستىرۋدا بالامالى اقپاراتتى پايدالانۋعا نەگىزدەلگەن اشىق, ءتيىمدى تەتىكتەردى قۇرۋدىڭ ماڭىزى جونىندە ايتىلدى. ايتسا ايتقانداي, بيىل ەلدە دارىلىك زاتتارعا باعا بەلگىلەۋدىڭ تەتىكتەرى جاڭاراتىن بولدى.
دارىلىك پرەپاراتتاردىڭ باعاسىن قالىپتاستىرۋ ۇدەرىسى تولىعىمەن تسيفرلاندىرىلعان. ءوتىنىش بەرۋشىگە باعا بەلگىلەۋمەن اينالىساتىن ساراپشىلارمەن تىكەلەي بايلانىسۋدىڭ قاجەتى جوق. قازىردە بيزنەس ۇدەرىستەردى قايتا قۇرۋعا ەرەكشە نازار اۋدارىلىپ وتىر. سەبەبى الدىڭعى جۇيە 5 جىلعا دەيىن سوزىلۋى مۇمكىن ۇدەرىستىڭ كولەمى مەن ۇزاقتىعى ءۇشىن سىنعا ۇشىراعان ەدى. دەنساۋلىق ساقتاۋ مينيسترلىگى جۇمىستى ۇيلەستىرۋ بارىسىندا تسيفرلىق تەحنولوگيالاردى, ء«بىر تەرەزە» قاعيداتىن پايدالانا وتىرىپ, فارماتسەۆتيكالىق نارىققا قاتىسۋعا ءوتىنىش بەرۋشىلەرگە بارىنشا جاعداي جاساۋعا ۇمتىلىپ وتىر. مۇنىڭ جاي-جاپسارىن دەنساۋلىق ساقتاۋ ۆيتسە-ءمينيسترى ەرجان نۇرلىباەۆ ءباسپاسوز ءماسليحاتىندا ايتىپ بەردى.
ء«بىر تەرەزە» قاعيداتى بويىنشا قايتا قۇرۋ (رەينجينيرينگ) جۇرگىزىلدى. ناتيجەسىندە, ءوتىنىش بەرۋشى تۇپكىلىكتى تىركەۋ كۋالىگىن الادى. دارىلىك پرەپاراتتىڭ شەكتى قۇنىن انىقتاۋدان, ءوتىنىش بەرۋشىنىڭ وتىنىشىنە سايكەس بەرىلگەن ءوتىنىمدى ەسكەرە وتىرىپ, بارلىق قولدا بار تىزىمدەرگە, ياعني ۇلتتىق فورمۋليار, امبۋلاتوريالىق ءدارى-دارمەكپەن قامتاماسىز ەتۋ ءتىزىمى, سق-فارماتسيانىڭ بىرىڭعاي ديستريبيۋتورى نومەنكلاتۋراسىنىڭ تىزبەسى ەنگىزۋدەن بىردەن وتەدى. وسىلايشا, باعا بەلگىلەۋ تەتىگى بيىل ىسكە اسادى, ونى قىركۇيەكتە تانىستىرامىز», دەيدى ە.نۇرلىباەۆ.
ءدارى-دارمەك باعاسىن قالىپتاستىرۋ ۇدەرىسىنىڭ ۇلگىسىن جاڭعىرتۋ قازىردىڭ وزىندە كەزەڭ-كەزەڭىمەن ىسكە اسىپ جاتىر. ناتيجەسىندە, بارلىق ءراسىمدى وڭتايلاندىرۋ مەن اۆتوماتتاندىرۋدى قوسا العاندا, دارىلىك زاتتاردى تىركەۋ ۇدەرىستەرىن قايتا قۇرۋ – پرەپاراتتاردىڭ نارىققا شىعۋ ۋاقىتىن 5 جىلدان 2 جىلعا دەيىن قىسقارتۋعا مۇمكىندىك بەرەدى.
«سق-فارماتسيا» ءوتىنىم بەرۋشى كومپانيانىڭ الدىن الا قورىتىندىسىنا سايكەس 1727 دارىلىك پرەپارات اتاۋىن ساتىپ الۋ قاجەت بولسا, ونىڭ 1581-ءى بويىنشا جەتكىزۋ شارتتارى جاسالعان. سايكەسىنشە, 4 قاڭتاردان تاۋارلار بەرىلە باستاعان. بىرىڭعاي ديستريبيۋتور ءدارى-دارمەكپەن قامتاماسىز ەتۋدى مۇمكىندىگىنشە ەرتە باستاۋى قاجەت بارلىق ءىس-شارالاردى قابىلداعان. باسقا پرەپاراتتارعا قاتىستى ساتىپ الۋ ۇدەرىستەرى جالعاسىپ جاتىر. بولىنگەن قاراجاتتان 57 ملرد تەڭگە ۇنەمدەلگەن, الدا بۇل سوما ۇلعايادى. ۇنەمدەلگەن قاراجات حالىقتى دارىلىك پرەپاراتتاردىڭ قاجەتتى كولەمىمەن قامتاماسىز ەتۋگە جۇمسالادى.
«مەملەكەت باسشىسىنىڭ تاپسىرماسىمەن دارىلىك پرەپاراتتاردىڭ ازايتىلمايتىن قورىن انىقتاۋعا قارجى ءبولىندى. قاجەتتى ءدارى-دارمەك ساتىپ الىنادى. جىل سوڭىندا, وتپەلى كەزەڭدە, وسى قور ەسەبىنەن ەل ازاماتتارىن دارىلىك پرەپاراتتارمەن ۇزدىكسىز قامتاماسىز ەتەتىن بولامىز», دەدى ە.نۇرلىباەۆ.
دارىلىك پرەپاراتتارعا وتىنىمدەردى قالىپتاستىرۋ ۇدەرىستەرىن ولاردى دەربەستەندىرىلگەن ەسەپكە الۋ قاجەتتىگىنە قاراي تسيفرلاندىرۋعا ەرەكشە نازار اۋدارىلعان. ياعني ءوتىنىمدى ۋچاسكەلىك تەراپەۆتەر جاساي باستايدى. وسىلايشا, تاعايىندالعان ەمگە سايكەس جەكەلەگەن پاتسيەنتكە جىلدىق ءوتىنىم قالىپتاسادى. ودان ءارى كاسكادتىق ادىسپەن قالىپتاستىرۋ ەمحانالار, قالا, وبلىس بولىنىسىندە دارىلىك قامتاماسىز ەتۋدىڭ اقپاراتتىق جۇيەسىندە جۇرگىزىلەدى. پرەپاراتتى پاتسيەنتكە بەرۋ كەزىندە سايكەستەندىرۋ ادىستەرى, ونىڭ ىشىندە بيومەتريالىق تەحنولوگيالاردىڭ كومەگى پايدالانىلادى. ازاماتتاردىڭ مۇمكىندىكتەرى مەن جاس ەرەكشەلىگىن ەسكەرە وتىرىپ, بىرنەشە ءادىس-ءتاسىل قولدانىلادى. بۇل ءبىرىنشى كەزەكتە ەمحانادان ءدارى-دارمەك الىپ جۇرگەن سوزىلمالى سىرقاتى بار پاتسيەنتتەردىڭ ۋاقىتىن ۇنەمدەيدى. ولار ەندى سارىلىپ كەزەك كۇتپەيدى.