ۇلتتىق سپورت قاۋىمداستىعى ۇيىمداستىرعان «ALAMAN» حالىقارالىق مەديا بايقاۋىندا ارىپتەسىمىز, «الەۋمەت جانە سپورت» ءبولىمىنىڭ ءتىلشىسى قۋانىش نۇردانبەك ۇلى توپ جاردى.
بايقاۋعا 200-دەن استام ماتەريال تۇسكەن. 7 اتالىم بويىنشا ۇزدىك ۇمىتكەرلەر انىقتالعان. ونىڭ ىشىندە تەلەۆيزيا, راديو سالاسىندا «ۇزدىك باعدارلاما», ءداستۇرلى ءباسپاسوز باعىتىندا «ۇزدىك اناليتيكالىق ماتەريال», سوسىن «ۇزدىك تانىمدىق ماتەريال», «ۇزدىك سۇحبات», «ۇزدىك فوتوسۋرەت», «شەتەلدىك باق-تا جاريالانعان ۇزدىك ماتەريال», «الەۋمەتتىك جەلىدەگى ۇزدىك ماتەريال» سىندى اتالىمدار بار. جۇمىستاردى پارلامەنت سەناتىنىڭ دەپۋتاتى, باس رەداكتورلار كلۋبىنىڭ پرەزيدەنتى بيبىگۇل جەكسەنباي, پارلامەنت ءماجىلىسىنىڭ دەپۋتاتى اناس باققوجاەۆ, جاناربەك ءاشىمجان, ماكسيم روجين, سىرتقى ىستەر مينيسترلىگى قوعامدىق ديپلوماتيا باسقارماسىنىڭ باسشىسى ءىلياس وماروۆ سىندى قازىلار قۇرامى قاراپ, ساراپتاعان.
جەڭىمپازداردى ماراپاتتاۋ سالتاناتىندا ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ ۇلتتىق سپورتتى ناسيحاتتاۋعا باق وكىلدەرىنىڭ قوسقان ۇلەسى زور ەكەنىن ايتىپ, جۇلدەگەرلەردى قۇتتىقتادى.
«ۇلتتىق سپورت تۇرلەرى وسى كۇنگە دەيىن قارقىندى دامىپ كەلەدى. قاۋىمداستىق ەكى جىلدا قۇندىلىقتاردى ۇلىقتاۋ ىسىندە ايانىپ قالعان جوق. ءتۇرلى رەسپۋبليكالىق جانە حالىقارالىق جارىستار مەن V دۇنيەجۇزىلىك كوشپەلىلەر ويىندارى ۇلتتىق سپورتتىڭ ابىرويىن ودان ءارى بيىكتەتە ءتۇستى. وسى ورايدا حالىققا اقپارات تاراتىپ, ۇلتتىق سپورتتىڭ قىر-سىرىن ناسيحاتتاعان باق وكىلدەرىنە العىسىمدى ايتامىن», دەدى ي.سالجانوۆ.
سونىمەن «ۇزدىك اناليتيكالىق ماتەريال» اتالىمىندا «Egemen Qazaqstan» گازەتىنىڭ ءتىلشىسى قۋانىش نۇردانبەك ۇلى ءبىرىنشى ورىندى جەڭىپ الدى. ارىپتەسىمىز بايقاۋعا «دۇنيەگە ەستىلەدى ءدۇبىرى» اتتى ماقالاسىن ۇسىنىپتى. بۇل اتالىمدا «ناش كوستاناي» گازەتىنىڭ ءتىلشىسى اسحات ابۋل-كادىر ۇلى ەكىنشى ورىن ەنشىلەسە, «AIQYN» قوعامدىق-ساياسي گازەتىنىڭ ءتىلشىسى ناۋرىزبەك سارشاەۆ ءۇشىنشى ورىن الدى.
تولىقتىرا كەتسەك, بايقاۋدىڭ ءوز دەڭگەيىندە وتۋىنە باس رەداكتورلار كلۋبى مەن ۇلتتىق مەديا قاۋىمداستىعى قولداۋ كورسەتكەن. ۇزدىكتەردىڭ اراسىنان قارا ءۇزىپ, 1-ورىن يەلەنگەندەر – 1 000 000 تەڭگە, 2-ورىن العاندار – 700 000 مىڭ تەڭگە, 3-ورىن جەڭىپ العاندار – 500 000 مىڭ تەڭگە قارجىلاي سىياقىمەن قوسا «اLAMAN» حالىقارالىق مەديا بايقاۋىنىڭ تۇعىرىن الدى.